مەسرور بارزانی، سەرۆكێ حكومەتا هەرێما كوردستانێ پەیامەك بەلاڤكر و ڕاگەهاند، ب مەرەما هاتنا جه‌ژنا نه‌ورۆزێ و سه‌رسالا نوی یا كوردی، گه‌رمترین پیرۆزباهی ل هەمی كوردستانێ ب تایبه‌تی پێشمه‌رگه‌یێن قه‌هره‌مان، هێزێن ئاسایشا ناڤخۆ، كه‌سۆكار و مالبا‌تێن سه‌ربلند یێن شه‌هید و ئەنفالكریان دكەم و هیڤییا من ئەوە د ناڤ خۆشی، شادی و ئارامییێدا رۆژێن جه‌ژنێ ده‌رباز بكەن، د هه‌مان ده‌مدا داخواز ژ وه‌لاتییان دكەم ل سه‌یران و گه‌شتان دا پاقژییا ژینگه‌ها جوان یا كوردستانێ بپارێزن. هه‌روەسا پابه‌ندی رێنماییێن هاتووچوونێ بن و دویر بن ژ توندوتیژیێ.
سەرۆكێ حكومەتا هەرێما كوردستانێ گۆت، جه‌ژنا نه‌ورۆزێ سمبۆلا ئێكگرتن، ئێكرێزی، سه‌ركه‌ڤتن و ئازادییا كوردستانێ یه, د ئەڤێ سالڤەگەرێدا دووپات ل تەڤاهی و هه‌ڤهه‌لویستێ وەلاتییێن كوردستانێ دكەم ژ بۆ پاراستنا ده‌ستكه‌ڤتێن نه‌ته‌وەیی و به‌ره‌ڤانیكرن ژ مافێن ده‌ستووری یێن گه‌لێ كوردستانێ.
مەسرور بارزانی دیاركر، د ئەڤێ رۆژێدا ل پێناڤ به‌ر‌ژەوه‌ندیێن گشتی و نەهێلانا دلگرانیا وه‌لاتیێن هێژا و دروستكرنا ره‌وشه‌كا ئارام داخواز ژ جێگرێ سه‌رۆكوه‌زیران و تیما وه‌زاری یا ئێكەتی نشتیمانی كوردستانێ دكەم كو پشتی ب دووماهیك هاتنا جه‌ژنا نەورۆزێ, ڤه‌گه‌ڕن بۆ كۆمبوونێن جڤاتا وه‌زیران، دا كو هەمی ئاریشەیان د جهـ و پێگه‌هێن فه‌رم یێن خۆ پێكڤە دانوستاندنێ ل سەر بكەن، كاربكەن ل پێناڤ خزمەتكرنا زێده‌تر یا وەلاتییێن كوردستانێ و جێبەجێكرنا كارناما كابینه‌یا نەهێ یا حكومه‌تا هه‌رێما كوردستانێ.
Comments are closed, but trackbacks and pingbacks are open.