نێچيرڤان بارزانى، سه‌رۆكێ هه‌رێما كوردستانێ ئەڤرۆ چارشەمبی پێشوازى ل ئەنالینا بێربۆک، وه‌زيرا دەرڤەیا ئەلمانیا كر.
سەرۆکایەتییا هه‌رێما كوردستانێ ڕاگەهاند، نێچيرڤان بارزانى سوپاسییا هاریكاری و پشتەڤانییا سه‌ربازى و مرۆڤی و سياسی ل ئەلمانیا بۆ عیراق و هەرێما كوردستانێ كر، هەروەسا دووپات ل هێرشێن تيرۆری یێن به‌رده‌وام كر، عیراق و هەرێما كوردستانێ پێدڤی ب به‌رده‌واميیا پشتەڤانییا ئه‌لمانيا و جڤاكێ نیڤدەولەتی هه‌يە.
سه‌رۆكێ هه‌رێما كوردستانێ و وه‌زيرا دەرڤەیا ئەلمانیا، پەیوەندییێن عیراقێ و هەرێما كوردستانێ دگەل وەلاتێن هه‌ڤسوی، رەوشا ئاوارە و پەنابەران ل هەرێما كوردستانێ، رەوشا شنگال و ئێزدییان ب گشتی و چەندین پرسێن جودا گۆتۆبێژكرن.
وه‌زيرا دەرڤەیا ئەلمانیا دیاركر، ئه‌لمانيا گرنگییێ ب پەیوەندییێن دگەل عیراق و هەرێما كوردستانێ و ئارامى و سه‌قامگيريیا سياسى و ئابووری ددەت، دووپاتی ل گرنگییا ب جهئینانا رێككەفتنا حكومه‌تا هه‌رێما كوردستان و حكومه‌تا عیراقێ بۆ ئاساييكرنا رەوشا شنگالێ كر كو ببیتە ئەگەرێ ڤەگەراندنا ئاوارە و ئاڤەدانكرنا دەڤەرێ.
نێچيرڤان بارزانى ئاماژە ب هەماهەنگییا بهێز د ناڤبەرا سوپایێ عیراق و پێشمه‌رگەی بۆ بەرهنگاربوونا داعش كر و سوپاسییا ئەلمانیا كر بۆ پشتەڤانی و هاریكاریكرنا ئێزدییان و ناساندنا كۆمەلكۆژییێ ب جینۆساید ل پەرلەمانێ ئەلمانییا.
Comments are closed, but trackbacks and pingbacks are open.