دلدار محەمەد
هشکەڕوو هندی بیرا وی دهێت و هندی بیرا من ژی دهێت، مالا خراب دکەت چاڤا تژی ڕۆندک دکەت، بابان پەریشان دکەت و زارۆکان ڤەدلەرزینیت و چارەنڤیسی د مژێ وەردکەت، ئەڤێ جارێ ژی نەکرە نەمەردی و لگەل پێلێن خۆ ژبلی ڕەملێ و وێرانییێ دونیایەکا خەما ئینا و دلێن ژارا ژێ پڕکرن، بەلێ هەوە ڕاستی دڤێت هشکەڕوویی شیا تشتەکێ دی ژی بکەت.
هشکەڕوویێ چ کر؟
ئەو دیوارێ ژ بێ ئۆمێدییێ پەیدابوویی، هەر ستویر و بلند دبوو، کەفتە بەر گەفێن هەرفینێ، ئەو پرا لەق لەقۆک و کەڤنار ل بەر دەرازینکا ژناڤچوونێ، سەر ژ نوی نووژەنکر، هشکەڕوویێ ڤێ جارێ وێرانبوون ب تنێ نەکر، ئەو دەستێن ئەڤە دەمەکە ژهەڤ دوور نێزیکی ئێک کرن ژ دل ب دلۆڤانی سلاڤی هەڤدوو کرن و ئێکودوو ب سلاڤەکا نەرمڤه هەژاند، ئەو سەروچاڤێن ژارییێ ل بن پێلێن پۆسیدەییێ بەرەڤ قۆرمچینێ برین، پشتی دەمەکێ درێژ بشکورینان سەرەدانا وان کر، وان دلێن چپکێن بارانێ نەدهێلان ئەو ژ ترسێ و دوودلییێ و خەمباریێ ڤالا ببن، ئەڤرۆ ئارامییێ کەلها خۆ لێ ئاڤا کر ئەو باوەرییا ل بەر سەکەراتێ، هەناسەیان جارەکا دی قەستا وێ کر، و ڤەگەڕیا ڤەژاندنێ، لەو سەرەرایی وێرانییێ سوپاس بۆ هشکەڕوویێ شیا ب سەلمینیت، کو هندەک دەستێن هەین ڕۆندکان ڤه دمالن و بۆ بێ دەستان دبن دەست، سوپاس بۆ هەر دەستەکێ، ب سەرێ پەریشانەکیدا هاتی و ل جهێ کەربێ ڤیان و ڕێز ڤەگەڕاندی.
Comments are closed, but trackbacks and pingbacks are open.