به‌رهه‌ڤكرن: عیسا بۆتانی
ده‌ربارێ دیرۆكا هونه‌ری یا مالباتا خوه و ناسكرنا هونه‌ر و هونه‌رمه‌ندان ده، هیوا ئاكره‌یی گۆت كو د ده‌ستپێكا سالێن 1980یان ده باپیرێ وی یێ ب ناڤێ حه‌مه ئاكره‌یی ئانكو باڤێ شیمال; مرۆڤه‌كی پر هه‌ز ژ هونه‌ری دكر، ئالیكاریا هونه‌رمه‌ندێن كوردێن مه‌زن كر و هه‌تا ل مالا خوه یا ل كانی قرژاله یا پارێزگه‌ها هه‌ولێرێ، به‌نداڤا مووسلێ، ئاكرێ و دارستانا كه‌له‌كێ ژ وان ره ئاهه‌نگ ساز دكر و ژبۆ پێكانینا به‌رهه‌مێن وان ئالیكاری دكر. د ناڤ وان ده محه‌مه‌د عارف جزیری، عیسا به‌رواری، ته‌حسین ته‌ها، محه‌مه‌د ته‌یب تاهر و سه‌میر زاخۆیی و پشتره هونه‌رمه‌ندێن نفشێ پشتی وان وه‌ك ئە‌رده‌وان زاخۆیی، ئه‌یاس زاخۆیی، شاكر ئاكره‌یی و ره‌مه‌زان ئاكره‌یی.
هیوا ڤه‌ناشێره كو ده‌نگێ ڤان هونه‌رمه‌ندان هه‌ر تم د مالێن وان ده ده‌نگ ڤه‌ددا.
گۆت ژی:”پرانیا ئارشیڤێن وان ئێن وێنه و سترانێن كو نه‌هاتنه بهیستن هین ژی ل مالا مه پاراستینه،” دیسا ژی گۆت:(هه‌ر وها محه‌مه‌د ته‌ها ئاكره‌یی ده‌ما كو هات ده‌رڤه‌یی وه‌لات، نێزی ساله‌كێ ل جه‌م مه ما و ب قاسی كو ژ ده‌ستێ وی هات بابێ من ئالیكاریا وی كر و دوێ ده‌مێ ده ده‌نگ و موزیكا وی ئەز هاندام كو به‌رێ خوه بده‌مه سترانگۆتنێ و بێتر ژ سترانبێژیێ هه‌ز بكم).
هیوا ئاكره‌یی دا زانین كو ئەو د سالا 1991ێ ده ل مووسلێ ژ دایك بوویه و پشتی دو سالان مالێن وان ده‌رباسی ئە‌ورۆپایێ بوویه، ژ ته‌مه‌نه‌كێ بچووك ده ژ كوردستانێ جودا بوویه، لێ ژ به‌ر كو مالباتا وان هه‌رتم گرنگی ب په‌روه‌رده‌كرنا زارۆكێن خوه ل سه‌ر زمان و دیرۆك و هونه‌را كوردی دایه. د ڤی واریده ژی گۆت: (زمان بنگه‌هه‌كه گرینگه ژ بۆ هونه‌رمه‌ندی، ئه‌ز د مالباته‌كه گرێدایی زمان، كه‌ڤنه‌شۆپی و هونه‌ری ده مه‌زن بوومه، ژ به‌ر وێ ژی من كاریبوو هونه‌را خوه راگهینم و سترانێن خوه ب زمانه‌كی پاقژ و كوردی بێژم).
هیوا هه‌ر وسا دا ئاشكه‌ره كرن و گۆت: (من د كۆمبوونێن مالبات و هه‌ڤالێن خوه ده ستران دگۆتن، لێ من دوو سال به‌رێ ده‌ست ب سترانبێژیێ كر ده‌ما كو باڤێ من ژێهاتیبوونا منا هونه‌ری دیت و گه‌له‌ك پشتگیری دا من، من هژماره‌ك سترانێن هونه‌رمه‌ندێ نه‌مر ره‌مه‌زان ئاكره‌یی تۆمار كر و مالباتا هونه‌رمه‌ند ژی پر ژێ هه‌ز كر و ئاموورێ سازا وی دیاری من كر).
هونه‌رمه‌ندێ هیوا ئاكره‌یی دوو ئالبووم هه‌نه، كو ژ چه‌ند سترانێن ره‌مه‌زان ئاكره‌یی پێك تێ، كو سالا 2021ێ هاتیه به‌رهه‌مانین و دبێژه: (هه‌زكرنا خه‌لكێ ژبۆ سترانێن من؛ بوو سه‌ده‌م كو ئەز زێده‌تر هه‌ول بدم و ژ بۆ گه‌لێ خوه كارێن باشتر بكم).
ئاكره‌یی ل سه‌ر خه‌باتا خوه یا داوی كو ژ بۆ بوهار و نه‌ورۆزا ئیسال ئاماده كریه، كو ژ بۆ ملله‌تێ خوه ب ئاوایه‌كی شاد و ریتمیك و ل سه‌ر كانالا خوه یا یوتیوبێ به‌لاڤ دكه ئاخڤت و ده‌ربارێ سترانا نوو ده وها گۆت: (ماشوب ژ سترانێن هونه‌رمه‌ندێن ناڤدار یێن گه‌لێ مه پێك تێ ژ وان حه‌سه‌ن شه‌ریف، ئە‌رده‌وان زاخۆیی، ئه‌یاز یوسڤ زاخۆیی، عە‌بدولواحد زاخۆیی، محه‌مه‌د ته‌یب تاهر و محه‌مه‌د شێخۆ).
د دوایێده ده ژی هیوا ئاكره‌یی به‌هسا كارێ خوه یێ نوو كر كو هه‌ول دایه به‌رهه‌مێ ب مۆهرا كوردی و ره‌سه‌ن تۆمار بكه و سپاسیا هه‌موو كه‌سێن كو د ده‌ستپێكا كارێ سترانگۆتنا وی ده و هه‌یا نها ئالكاریا وی كرنه كر، ژ هه‌لبه‌ستڤان و هونه‌رمه‌ند و مووزیكژه‌ن و كه‌سێن كو تۆمار و وێنه‌كێشیا وی كرنه.
لینكا سترانێ:
Comments are closed, but trackbacks and pingbacks are open.