▪ وه‌زاره‌تا دارایى و ئابوورى یا هه‌رێما كوردستانێ رێنمایێن رێكخستنا گرێبه‌ستێن بانه‌وانى (موساته‌حه‌) به‌لاڤكرن

وه‌زاره‌تێ د نڤیساره‌كێ دا ئاماژه‌ ب وێ ئێكێ كریه‌ كو پێدڤیه‌ هه‌ر 5 سالان جاره‌كێ پێداچوون د بڕێ به‌رانبه‌رێ سالانه‌ یێ بانه‌وانى (موساته‌حه‌) دا بهێته‌ كرن.

ئه‌ڤا ل خوارێ ده‌قێ نڤیسارا وه‌زاره‌تێ یه‌:
“پشتبه‌ستن ب بڕگه‌یا 2 ژ مادده‌یا 15 ژ یاسایا فرۆشتن و ب كرێدانا مولك و مالێ ده‌وله‌تێ ل هه‌رێما كوردستانا ئیراقێ ژماره‌ 1 یا سالا 2021 بڕیارا ده‌ركرنا ڤان رێنمایان هاته‌ دان:

ئێك: پێدڤیه‌ هه‌ر 5 سالان جاره‌كێ پێداچوون د بڕێ به‌رانبه‌رێ سالانه‌ یێ بانه‌وانى (موساته‌حه‌) دا بهێته‌ كرن.

دو: پێداچوون د خالا ئێكێ یا ئاماژه‌ پێ هاتیه‌ كرن دێ ژ لایێ لژنه‌یا خه‌ملاندنێ ڤه‌ هێته‌ ئه‌نجامدان كو د مادده‌یا 8 یا یاسایا فرۆشتن و ب كرێدانا مولك و مالێ ده‌وله‌تێ ل هه‌رێما كوردستانا ئیراقێ ژماره‌ 1 یا سالا 2021 هاتیه‌ رێكخستن.

سێ: پێداچوون د بڕێ به‌رانبه‌رێ سالانه‌ یێ بانه‌وانى ل سه‌ر بنه‌مایێ مفایێ پێشبینیكرى بۆ وان 5 سالێن بهێت د گڕێبه‌ستێ دا یه‌ پشتى ده‌رهێنانا بڕێ به‌رانبه‌رێ كرێ یا سالانه‌ یا گرێبه‌ستێ و خه‌رجیێن نویژه‌نكرنێ و چاككرنا پێدڤى و ره‌چاڤكرنا باج و رسووماتان كو د ستۆیێ بانه‌وان‌ (موساتح)ى دایه‌ ل گه‌ل به‌رچاڤوه‌رگرتنا جهـ و رووبه‌رێ ئه‌ردى.

چار: ل ده‌مێ پێداچوونێ، پێدڤیه‌ داهاتێ گشتى بهێته‌ به‌رچاڤوه‌رگرتن و مه‌رج نینه‌ بها هه‌مى جاران بهێته‌ زێده‌كرن لێ ب چ شێوه‌یان نابیت بهێته‌ كێمكرن.

پێنج: پێداچوون د خه‌ملاندنا گرێبه‌ستێن بانه‌وانى (موساته‌حه) دا ب ڤه‌بڕ ناهێنه‌ هژمارتن تا كو ژ لایێ ده‌ستهه‌لاتا تایبه‌تمه‌ند ڤه‌ نه‌هێنه‌ په‌سه‌ندكرن و د ده‌مێ 15 رۆژان دا ژ رێكه‌فتى كۆنڤیسا خه‌ملاندنێ بڕیارا دویماهیێ ل سه‌ر دێ هێته‌ دان و بڕیارا دویماهیێ ب ڤه‌بڕ دێ هێته‌ هژمارتن.

شه‌ش: د ده‌مێ دیاركرى دا، ل خالا 5 یا ڤێ رێنمایێ دا، ده‌ستهه‌لاتا تایبه‌تمه‌ند داخوازێ ژ لژنه‌یێن تایبه‌تمه‌ند بكه‌ت بۆ دوباره‌ خه‌ملاندنێ، ئه‌گه‌ر بڕێ به‌رانبه‌ر یێ خه‌ملاندى نه‌یێ شایسته‌ بوو، ئه‌ڤه‌ ژى ل گۆره‌ى بڕگه‌یا (دو) ژ مادده‌یا 9 ژ یاسایا فرۆشتن و ب كرێدانا مولك و مالێ ده‌وله‌تێ ل هه‌رێما كوردستانا ئیراقێ ژماره‌ 1 یا سالا 2021.

حه‌فت: پێدڤیه‌ فه‌رمانگه‌ها په‌یوه‌ندیدار ئاگه‌هداریا بانه‌وان (موستاح) بكه‌ت كو خه‌ملاندنا نوى یا هاتیه‌ ئه‌نجامدان ژ به‌رى هنارتنا كۆنڤیسێ بۆ ده‌ستهه‌لاتا تایبه‌تمه‌ند بۆ په‌سه‌ندكرنێ، بانه‌وان (موساتح)ى مافێ نه‌رازیبوونێ یا دیاركرى د خالا پێنجێ یا ڤێ رێنمایێ دا ب رێكا داخوازیه‌كا نڤیسكى هه‌یه‌ كو پێشكێشى ده‌ستهه‌لاتا تایبه‌تمه‌ند بكه‌ت ژ به‌رى په‌سه‌ندكرنا خه‌ملاندنێ.

هه‌شت: پشتى په‌سه‌ندكرنا پێداچوونا خه‌ملاندنێ ژ لایێ ده‌ستهه‌لاتا تایبه‌تمه‌ند ڤه‌، ل سه‌ر بانه‌وانى پێدڤیه‌ ب دانا بڕێ به‌رانبه‌رێ سالانه‌ یێ دیاركرى پشتى پێداچوونێ یێ پابه‌ند بیت، ب به‌روڤاژى، بڕگه‌یا چار ژ مادده‌یا 15 یا یاسایا فرۆشتن و ب كرێدانا مولك و مالێ ده‌وله‌تێ ل هه‌رێما كوردستانا ئیراقێ ژماره‌ 1 یا سالا 2021 دێ هێته‌ جێبه‌جێكرن”.