وه‌زاره‌تا كۆچ و كۆچبه‌رێن عیراقێ راگه‌هاند، ژبلى هه‌رێما كوردستانێ، د عیراقێدا كه‌مپێن ئاواران ل جهان نه‌ماینه، زێده‌تر ژ 35 هزار خێزانێن ئاواره ل كه‌مپێن هه‌رێما كوردستانێ هه‌نه.
عه‌لى عه‌باس په‌یڤدارێ وه‌زاره‌تا كۆچ و كۆچبه‌رێن عیراقێ راگه‌هاند، د عیراقێدا كه‌مپێن ئاواران ب تنێ ل هه‌رێما كوردستانێ ماینه، كه‌مبا جه‌دعه ل باشوورێ مووسلێ بوویه سه‌نته‌رێ پێدانا شیانان ب ئاواران، ئه‌و ئاواره‌یێن ڤه‌دگه‌رن دێ چه‌ند هه‌یڤان ل وێرێ مینن، پشتى شیان پێدانێ دێ ڤه‌گه‌رنه جهێن خوه.
ل دۆر ژمارا ئاوارێن هه‌رێما كوردستانێ، عه‌لى عه‌باس كو هه‌ڤده‌م به‌رپرسێ لقانه ل وه‌زاره‌تا كۆچ و كۆچبه‌رێن عیراقێ دیاركر، 26 كه‌مپێن ئاواران ل هه‌رێما كوردستانێ هه‌نه، نێزیكى 35 هزار و 500 خێزانێن ئاواره ل هه‌رێما كوردستانێ ماینه.
ل هه‌رێما كوردستانێ زێده‌تر ژ 664 هزار ئاواره‌یان هه‌نه، 490 هزار ژ ده‌ڤه‌ى كه‌مپانه، زێده‌تر ژ 174 هزاران ژى دناڤ 26 كه‌مپاندا ئاكنجیبووینه، ئه‌وان ئاواره‌یان ژ ئه‌گه‌رێ شه‌رێ داعشێ جهێن خوه هێلاینه، هه‌تا نوكه‌ژى ژ ئه‌گه‌رێن ئابوورى و جڤاكى و ئه‌منى نه‌شیاینه ڤه‌گه‌رنه جهێن خوه.
Comments are closed, but trackbacks and pingbacks are open.