▪ وەزارەتا دارایی مووچەخۆران ئاگەهدار دکەت

بەرپرسێ ئێک ژ بانکێن وەزارەتا دارایی دەربارێ دابەشکرنا مووچەیی و دەواما بانکان زانیارییان ئاشکرا دکەت و دبێژیت: “ئەگەر فەرمان بۆ مە بهێت، دشێین رۆژێن بهێنڤەدانێ ژی دەوامێ بکەین.“

محەمەد مەلا، رێڤەبەرێ بانکا حەمرین ل هەولێرێ بۆ (باسنیوز) راگەهاند: “ئەو فەرمانبەر و خانەنشینێن مووچەیێ هەیڤا نەهـ وەرنەگرتیە، دشێن سوبەهی ئێکشەمبی سەرەدانا بانکان بکەن و مووچەیێن خۆ وەربگرن.”

ئاماژە ب وێ ژی دا: “ژبەر بهێنڤەدانا سەرێ سالێ تنێ سوبەهی ئێکشەمبی دەوام هەیە.” حکوومەتا هەرێما کوردستانێ بڕیار دایە کۆ ژ 25ێ12ێ 2023، هەتا 1ێ1ێ 2024، ب هەلکەفتا سەرێ سالێ، ل هەمی سازیێن حكوومی بهێنڤەدانا فەرمی بیت، ژ 2ێ1ێ 2024ێ ژی دەواما فەرمی دێ دەست پێ کەت.

رێڤەبەرێ بانکا حەمرین ئاشکرا کر: “ئەگەر فەرمان بۆ مە بهێت، ئەم دشێین ل رۆژێن بهێنڤەدانێ ژی دەوامێ بکەین، بەلێ جارێ تنێ ئێکشەمبیا بهێت مە دەوام هەیە.”

ل دیف وێ لیستێ، کۆ وەزارەتا دارایی راگەهاندبوو، دوماهیک رۆژا دابەشکرنا مووچەیێ هەیڤا نەهـ رۆژا پێنجشەمبیا بووری بوو. ژ لایێ خۆڤه، بەرپرسێ ئێک ژ بانکێن پارێزگەها سلێمانیێ بۆ (باسنیوز) راگەهاند: “ل پێنجشەمبیا بووری ئاریشا تەمویلێ هەبوو، لەورا مووچەیێ پشکەکا زۆر ژ خانەنشینێن سەربازی نەهاتە دان، ژبەرکۆ چاڤەرێینە کۆ دارایی بۆ ئێکشەمبیێ وێ ئاریشەیێ چارەسەر بکەت، ئەگەر نەهێتە چارەسەرکرن دخازین د رۆژا 25ێ ژی بانک بهێنە ڤەکرن و لیستا دابەشكرنا مووچەی بهێتە تمام کرن.”