بەرپرسەكێ وەزارەتا سامانێن سروشتی دەربارێ پرۆسا دابەشكرنا گازا ماڵان زەلاکرنەکێ ددەت و دبێژیت: “ئەگەر بەغدا کوژمێ پێتڤی یێ گازێ بۆ هەرێما كوردستانێ پنێریت، دێ شێین دوو بەرمیلێن گازێ بۆ هەر خێزانەکێ دابین بکەین.”
ڕێبین زەنگەنە، رێڤەبەرێ گشتیێ دیوانا وەزارەتا سامانێن سروشتی، بۆ (فەرمانگەها میدیا و زانیاری) راگەهاند: “ل دەڤەرێن چیایی گاز هاتیە دابەش کرن و نوکە دێ ل ناڤەندێن باژێران دابەش کەین، هەتا نوکە 620 هزار خێزان ژ دابەشکرنا 125 ملیۆن لیترێن گازێ مفادار بوونە.”
ئاماژە ب وێ ژی کر: “ل دەست پێکا ئەڤسالە مە داخاز کریە کۆ حکوومەتا فیدرالی، گازا پێتڤی بۆ هەرێما کوردستانێ پنێریت، بەلێ ئەرکێ خۆ بجهنەئینایە؛ ئەگەر کوژمێ پێتڤی بۆ هەرێما كوردستانێ پنێریت، بێگومان دێ شێین دوو بەرمیلێن گازێ بۆ هەر خێزانەکێ دابین بکەین.”
بەری نوکە رێڤەبەرێ گشتیێ دیوانا وەزارەتا سامانێن سروشتی یێن حكوومەتا هەرێما كوردستانێ، بۆ (باسنیوز) راگەهاندبوو: “وەزارەتا سامانێن سروشتی دگەل كۆمپانیێن گازێ گرێبەست كریە و ب بهایەکێ پالپشتکری گاز ب سەر ولاتیان بهێتە دابەش کرن و ئەو گازا دهێتە دابەش کرن چ پەیوەندی ب بەغداڤە نینە.”
ژ لایێ خۆڤە نەبەز عەبدولحەمید، قایمقامێ ناڤەندا هەولێرێ، بۆ (باسنیوز) راگەهاند: “بەغدا گاز نەهنارتیە، ئەو گازا کۆ هەیە حكوومەتا هەرێما كوردستانێ ب گران برێکا كۆمپانیان كرییە و ب بهایەکێ پالپشتی و ئەرزان ددەتە ولاتیان.”
قایمقامێ ناڤەندا هەولێرێ گوت ژی: “ئەڤسالە حکوومەتا هەرێما کوردستانێ زوویتر ژ سالێن بووری دەست ب دابەشکرنا گازا سپی کریە و پرۆسە ژی دێ یا بەردەوام بیت و دەمێ چەند رۆژانە د ناڤا سەنتەرێ باژێرێ هەولێرێ ژی دهێتە دابەش کرن، هەتا هەمی خێزان ل هەرێما كوردستانێ بەرمیلەكا گازێ وەربگرن، دڤێت 265 ملیۆن لترێن گازا سپی بەردەست بیت.
ڕێبین زەنگەنە ئاشكرا كر: دابەشكرنا گازا ماڵان ب شێوێ لەز کاریگەرییەکا باش لسەر داکەفتنا بهایێ وێ د بازاریدا هەیە و گوت ژی: “ئەو گازا مە دابەش کری دەرئەنجامێن باش لسەر داکەفتنا بهایێ وێ هەبوویە، چاڤەرێینە کۆ پرۆسا دابەشكرنێ ژی بلەزتر بكەن.”
ڕۆژا 4ێ 10ێ 2023، د راگەهاندنەکێدا وەزارەتا سامانێن سروشتی یا حکوومەتا هەرێما کوردستانێ راگەهاند: ”دابەشکرنا گازا سپی دەست پێکر و دەست پێکێ ژی ل دەڤەرێن چیایی دەست ب پرۆسا دابەشکرنا گازێ هاتیە كرن، بودجە بۆ دابەشکرنا گازا سپی ب سەر ولاتییان بۆ زڤستانا ئەڤسالە، ژ لایێ حکوومەتا هەرێما کوردستانێڤە هاتیە دابین کرن، هەر خێزانەک دێ 200 لترێن گازا سپی بەرامبەر 100 هزار دیناران وەرگریت.”
Comments are closed, but trackbacks and pingbacks are open.