وەزیرێ دەرڤە یێ ئەمریكا راگەهاند، وەلاتێ وی دێ ل سەر پشتەڤانیكرنا ئابوورێ عیراقێ و هێزێن ئەمنی یێن عیراقێ د چارچووڤێ شەرێ دژی داعشێ دا، بەردەوام بیت.
ئەنتۆنی بلینكن، وەزیرێ دەرڤە یێ ئەمریكا د چارچووڤێ سەرەدانا خۆە دا بۆ رۆژهەلاتا ناڤەراست ل قاهیرەیا پایتەختێ مسرێ راگەهاند، وەلاتێ وی پەیوەندییەكا ب هێز و هەڤپشكییەكا بەرفرەهـ لگەل حكومەتا عیراقێ هەیە و ئەو دێ هاریكارییا عیراقێ كەن بۆ زێدەتر پێشئێخستنا ئابوورێ وێ.
ب بوچوونا بلینكن، دوو تشتێن گرنگ ل دۆر پەیوەندییێن عیراقێ لگەل ئەمریكا هەنە، ئەوژی هەڤپشكییا بەردەوام د ژناڤبرنا داعشێ دا و پشتەڤانیكرنا هێزێن ئەمنی یێن عیراقێ بۆ ژناڤبرنا پاشماوێن داعشێ و پشت راستبوون ژ وێ یەكێ كو ئەو رێكخراوە دوبارە سەرهەلنادەتە ڤە.
دهێتە زانین، 2 هزار و 500 سەربازێن ئەمریكا ل عیراقێ هەنە كو د چارچووڤێ هەڤپەیمانییا ناڤدەولەتی یا دژی داعشێ و هەڤپەیمانییا ناتۆیێ دا راوێژان پێشكێشی سەربازێن عیراقێ دكەن. هەروەسا ئەمریكا هەتا نوكە 1.6 ملیار دۆلار د پێشخستنا شیانێن هێزێن ئەمنی یێن عیراقێ دا خەرجكرینە و 2.2 ملیار دۆلار ژی وەكو هاریكارییێن مرۆڤی پێشكێشی وی وەلاتی كرینە.
Comments are closed, but trackbacks and pingbacks are open.