پارتى دیموكراتى كوردستان دێ كۆنفرانسێن لق و ناوچه‌یان كه‌ت و به‌رپرسه‌كێ بلندێ پارتى دبێژیت: هه‌لبژارتن دێ ل مه‌كته‌بێن رێكخستنێن پارێزگه‌هان ژى هێنه‌كرن و 4 ئه‌ندام دێ هێنه هه‌لبژارتن.
عه‌لى حسێن، ئه‌ندامێ مه‌كته‌با سیاسى و سه‌رۆكێ مه‌كته‌با رێكخستنا سلێمانیێ بۆ مالپه‌رێ فه‌رمى یێ پارتى گۆت: پشتى گوهۆرینێن ل به‌رپرسێن لقان هاتینه‌كرن، بریاره د ده‌مێ بهێت دا كۆنفرانسێن لق و ناوچه‌یان بهێنه‌كرن و ب هه‌لبژارتن كارگێرێن لقێن پارتى و به‌رپرس و كارگێرێن ناوچه‌یان بهێنه دیاركرن.
وى به‌رپرسێ پارتى گۆت ژى: هه‌لبژارتن دێ ل مه‌كته‌بێن رێكخستنێن پارێزگه‌هان ژى هێنه‌كرن و 4 ئه‌ندام دێ بۆ مه‌كته‌بان هێنه هه‌لبژارتن، كو دێ ب ئه‌ركێ مه‌كته‌بێن رێكخستنێ رابن و هاریكارێن سه‌رۆكێ مه‌كته‌بێ بن.
د كۆنگرێ 14ێ یێ پارتى دیموكراتى كوردستان دا، گوهۆرین د په‌یره‌وێ ناڤخۆ یێ حزبێ دا هاتبوونه كرن و ئێك ژ گوهۆرینان كێمكرنا ژماره‌یا كارگێرێن لق و ناوچه‌یان بوو، كو ئێدى هه‌ر لقه‌كێ دێ 6 كارگێر و هه‌ر لژنه‌كێ 4 كارگێر هه‌بن.
Comments are closed, but trackbacks and pingbacks are open.