دهۆك بارزانی 
کوردستان لە دوای سەدەیەک توانی خۆی بگەینێتە ئەو ئاستە لە بوونی سیاسی و ئیداریی و نیزامییەدا، کە بتوانێ لە ویستی مانەوە وەک گەل لە هەفتاکاندا ، و لە دوای ئەوە ش ئۆتنۆمیخوازی بە پشتیوانی یەک لە داگیرکەران لە سالانی ٨٠دا و لە دوای ئەوەش تەسبیتی فێدرالیزم لە دەستوری عێراقدا، ئێستا داوای سەربەخۆیی بکات. ئەمە خۆی هەنگاوێکی مێژووییە و نیشاندەری پێش وەچوونی کوردستان و پرسی ئەم نەتەوەیەیە.
بەلام ئەم ستراتێژییە لە ناوچەدا تەنیا ستراتێژیی لە مەیدانی سیاسەتدا نییە، بەلکوو ستراتێژیی تر و ئاکتۆری تریش بوونیان هەیە. گرینگە کە ئەوەندەی بتوانین لەوانەی تریش تێبگەین، تاکوو بتوانین پێگەی ستراتێژیی کوردستان لە نێو هیرارکیی گشت ئەم ستراتێژییانەدا دەستنیشان بکەین.
کە ئەوەمان کرد دەبێ سیاسەتی بەرز کردنەوەی پێگەی ستراتێژیی کوردستان لە ناو ئەو هیرارکییەدا دەستنیشان بکەین، بە جۆرێک کە لە هەنگاوەکانمان دلنیا بین.
وەکی کوردستان و میللەتی ژێر دەستە لە رووی دەرونییەوە زۆر حەز دەکەین کە ئەگەر لایەنێک پشتیوانی لێکردین ئەو لایەنە بە کاکە بانگ کەین و پێمان وابێ کە کار تەمامە و دەتوانین بۆی برۆین. ئەم هەستە هەر چەند جوانە لە رووی ئینسانییەوە کە خوازیاری دۆستایەتی باشین لە گەل خەلکانی تر بەلام لە دنیای سیاسەتدا کافی نییە و دەتوانێ بە خۆشباوەریی تەرجومە بکرێتەوە.
ناوەندی سیاسەتی جیهانی/ئامریکا/، وەک تاکوو ئێستا باس کراوە بە نیسبەت ناوچە سیاسەتی هەیە بەلام ئەو سیاسەتە نە بە تەواویی دارێژراوە نەک بە تەواویی رێککەوتنی لە سەر کراوە بەلکوو لە دوای وەسەرکار هاتنی ئیدارەی تازە خەریکە هێند خالی روون دەبێتەوە.
ئەوەی لێمان دیارە شەری دژی تێرۆرە وەک خالێکی سەرەکی، بەلام هەر شەری شەر نییە بەلکوو ئەمە خۆی پرۆسەیەکە و ئاکتۆران دیزاینی ئەو شەرە بە گۆێرەی بەرژەوەندی ئێستا و داهاتوویانەوە دادەرێژن.
ئەوەی لێمان دیارە فراوان خوازی ئێران وەک دەولەتێک جێگای قەبوول نییە و بەرەیەکی فراوانی لە دژ خەریکە ساز دەبێ.
ئەوەی لێمان دیارە سوریا و عێراق وەک دەولەت ولامدەرەوەی پێداویستییەکانی داهاتوو نین و چار نییە دەبێ دابەش بکرێن.
ئەوەی لێمان دیارە بە بێ رێفۆرمی قوول لە حکمرانی لەم ناوچەیەدا ولاتان ئیدارە ناکرێن.
ئەوەی لێمان دیارە بێ توانایی یەکە سیاسییەکانی ناوچە یە لە ئەنجامدانی ریفۆرم کە پرسی دابەشکردنی ولاتانی خستۆتەوە ناو ئەجێندای سیاسەتی جیهانییەوە.
ئەوەی لێمان دیارە پێکهاتەی دانیشتوان و خواستەکانیان لە دنیای گلۆبالی ئەمرۆدا بە جۆرێک گەشەی ئەستاندوە کە سیاسەتی ئینکار و سەرکووت چارە سەر نین، وەک دەهەکانی رابردوو لە ناوچەی ئێمەدا.
ئەوەی لێمان دیارە هەبوونی ستراتێژی جۆراوجۆر لە لایەن ئاکتۆری ناوچەیی و جیهانین لە سیاسەتی ئەم ناوچەیەدا
کامە ستراتێژیی سەردەگرێ؟ کامەیان دەبێتە دەستوری کار زۆرینەی لایەنە پێوەندیدارەکان، گرێدراوی تێکۆشان و کار و خەباتی بەردەوامی وانە لە پێناو ئەوە دا کە لە هیرارکی ستراتێژییەکانی موجوود دا ئاجێندای خۆیان پاڵ پێوە بنن.
بۆیە بۆ کوردستان دوو خال گرینگە ،
یەکەم بزانین کە مەیدانی سیاسەت هەر ئی کوردسان نییە بەلکوو مەیدانێکی کراوەیە و پڕە لە دۆست و دۆژمن و ئاکتۆری جیاواز.
دووهەم، ئیسرار لە سەر مافی خۆمان و گەیاندنی پرسی خۆمان بۆ هەموو لایەنە پێوەندی دارەکان جا چ دۆست بن یان نەیار، پاڵ پێوەنانە بۆ سەرخستنی ستراتێژیی رزگاریی
پاشەکشە لە داوای مافی رزگاریی و سست بوون لە خەبات بۆ دەرگیر کردنی گشت لایەنەکان بە پرسی کوردستانەوە هەر دوویان بریتین لەو هەلە مێژووییانە کە کورد دەتوانێ بیکات. کە ئەوەش ناکەین دەبێ دلنیا بین کە لە سەر سیاسەتی راست و دروستداین.