غیاس خالد زێباری:
هەر کەسەکێ هشیار و چالاک ژلایێ سیاسی و دیرۆکا بزاڤا رزگاریخوازیا کوردستانی و بزاڤا چاکسازی و جڤاکیا کوردستانێ، دزانیت کۆ بزاڤا رزگاریخوازی و شۆڕەشگێریا کوردستانی یا رێکخستی و خودان دیسپلین و پرۆژێن چاکسازیێن جڤاکی یێن باشوورێ کوردستانێ لسەردەستێ ماڵباتا بارزان و پێشەوایێن رێبازا بارزان بوویە، لەوما رێبازا بارزان لسەر دەستێ شێخ و پێشەوایێن ماڵباتا بارزان بەری بسەدان ساڵا هاتیە دامەزراندن بتایبەت شێخ تاژدین و ب بەرداوامی د گەشەبوونێ دا بوویە هەتاکۆ بوویە رێبازەکا گشتگیرا مرۆڤایەتیێ، بتایبەت ل چاریکا ئێکێ یا ساڵێن هزار و هەشت سەدان لسەر دەستێ شێخ عەبدولسەلام بارزانیێ ئێکێ، ئانکۆ بەری ( ٢٠٠ ) دوو سەد ساڵا زێدەتر رێباز هاتە نیاسین و مەزنتر و بەرفرەهتر بوو، و هێلێن سەرەکی بۆ هاتنە دارشتن و دیارکرن، مینا چاکسازیێن جڤاکی و ئایینداری و پەروەردەیی و نەتەوایەتی و بەرێ خەلکەکی بەرەڤ ئاراستەکرن.
هەمی پێشەوایێن وێ کەسایەتیێن بلیمەت بوونە و د سەردەمێ خودا بنەمایێن رێبازا بارزانی کرینە دەستوور و قانوون، بۆ سەرپەرشتی و رێڤەبرنێ، لێ جوداهی دناڤبەرا رەوش و کاودانێن واندا هەبوویە، لەوما ئێک پتر ئێکێ دیتر هاتیە بەرنیاسبوون.
لدووف شێخ عەبدولسەلامێ ئێکێ شێخ محەممەد بارزانی و پاشان شێخ عەبدولسەمێ دوویێ و شێخ ئەحمەد بارزانی، هەتا دگەهیتە مەلا مستەفایێ بارزانی، بەردەوامی دایە رێبازێ و لدووف رەوش و کاودانێن سەردەمێ خۆ لسەر هەمان بنەما و هێلێن سەرەکی ڤەژاندن تێدا کریە.
مەلا مستەفایێ بارزانی کۆ نێزیکی سەد ساڵا پشتی باپیرێ خۆ شێخ عەبدولسەلامێ ئێکێ پێشەوایێ سەردەمێ خۆ یێ رێبازا بارزان ژدایک بوویە و ژبەر تایبەتمەندیا کاودانا ژلایێ جڤاکی و رەوشەنبیری و هزری یێن ب ئەگەرێ پێشەوایێن بەری وی هاتینە دابینکرن ، شیا بیتە ئێک ژ پێشەوایێن مەزن و داهێنەر ل رێبازا بارزانی و وەک پێتڤیەکا فەر گرنگیێ بدەتە بووارێ نەتەوایەتی و نشتیمانی و شۆڕەشگێریێ و دناڤ ڤان بوواراندا دادوەری و قانوون و بنەمایێن رێبازێ پراکتیک بکەت و ژبەر پەیدابوونا ئامرازێن گەهاندنێ و راگەهاندنێ، بارزانی نەمر زێدەتر هاتە نیاسین و بازنا رێبازێ ژی بەرفرەهتر بوو، گەهشتە وی ئاستی رێباز بناڤێ وی بهێتە نیاسین.
د بنەڕەت دا بارزانی نەمر نە خودانێ رێبازێ یە بەلکی پێشەوایەکێ هەری ب باندۆر و مەزنێ رێبازێ بوو ، چونکی نەمر مەلا مستەفایێ بارزانی لسەر هەما رێک و بنەما و هێلێن سەرەکیێن رێبازێ یێن سەردەمێ شێخ ئەحمەد بارزانی و شێخ عەبدوولسەلام و شێخ مەحەممەدی بەردەوامی دایە خەباتێ ، لەوما ئەس دروست نابینم کۆ پاشناڤێ بارزانی نەمر بۆ رێبازێ بهێتە بکارئینان ئانکۆ رێبازێ بناڤێ ( رێبازا بارزانی نەمر ) چونکی (بارزانی نەمر) بوویە ناسناڤێ مەلا مستەفایێ بارزانی ، چونکی ب خەبات و تێکۆشینا خوو یا پڕی مرۆڤایەتی و دادوەری و شۆڕەشگێری و ئاشتەوایی و رێزگرتن و پێکڤە ژیان و سەربلندی یا زێدەتر ل پێنجی ساڵان بۆ بدەست ئینانا ماف و ئارمانجێن خەلکێ کوردستانێ ئەڤ ناسناڤە ژلایێ خەلکێ کوردستانێ پێ هاتیە دان، خابن زۆر جارا لسەر ئاستێ ئۆڕگانێن بلندێن پارتی و کادرێن سەر ئاستێ مەکتەبا سیاسی و سەرکردایەتیێ ڕێبازا بارزانی دکەنە رێبازا بارزانی نەمر، بڤی ڕەنگی ڕۆلێ پێشەوایێن رێبازا بارزان یێن بەری بارزانی نەمر دهێتە ژبیکرن و ژییێ رێبازێ ژی کۆرت دبیت…! چونکی ئەگەر رێبازا بارزانی نەمر بیت، ژیێ رێبازێ ناگەهیتە سەد ساڵان چونکی بارزانی نەمر بەری سەد و بیست ساڵا ژدایک بوویە…! یا درۆست ئەوە رێبازا بارزان ، یان رێبازا بارزانی بکاربینین چونکی شێخ تاژدین و شێخ عەبدوولسەلامێ ئێکێ و شێخ مەحەممەد و شێخ عەبدوولسەلامێ دوویێ و شێخ ئەحمەد ژی پێشەوایێن رێبازا بارزان بوونە و بارزانی نەمر ژی پێشەوایەک بوویە ل پێشەوایێن رێبازا بارزان و ل وان پێشەوایێن بەری خۆ وانەیێن ژیان و رێبەریێ ب شێوازەکێ دادپەروەری و مرۆڤپەروەری و جڤاکی و نشتیمانی و
نەتەوایەتی و ئاشتەوایی و پێکڤە ژیان و وەکهەڤێ و …هتد وەرگرتینە .
ئەڤرۆ ژی سەرۆک مەسعود بارزانی ژبلی سەرۆکێ پارتی دیموکراتی کوردستان و رێبەرێ گەلێ کورد، پێشەوایێ رێبازا بارزانە و لسەر هەمان بنەمایێن پێشەوایێن بەری خۆ نەخاسمە نەمر مەلا مستەفایێ بارزانی پێشەوایی یێ دکەت و وێ دادپەروەریێ و مرۆڤایەتیێ و وەڵاتپارێزیێ و ….. هتد جێبجێ دکەت .
Comments are closed, but trackbacks and pingbacks are open.