ڤه‌كۆلینه‌كا په‌یمانگه‌ها والته‌ر و ئیلیزا ل باژێرێ مالبۆرن یێ ئوسترالى پرۆتینه‌كێ ب هه‌ڤشێوه‌یێ هورمۆنا ئه‌نسۆلینێ ده‌ستنیشان دكه‌ت، كو دشیێت وه‌رگرێن هورمۆنان چالاكبكه‌ت و تووشبوویێن نه‌خۆشییا شه‌كرێ ب تایبه‌تى شه‌كرا ژ جوورێ ئێك مفاى ژێ وه‌ربگرن.
ڤه‌كۆلین ل كۆڤارا زانستێن سرۆشتى به‌لاڤبوویه و دیاردكه‌ت، دشیاندایه پرۆتین ب شێوه‌یێ حه‌پك ل به‌ر ده‌ست بیت، و تووشبوویێن شه‌كرێ پرۆتینى وه‌كو جێهگرێ ده‌رزییا ئه‌نسۆلینێ بكاربینن.
نیكۆلاس كیرك سه‌رپه‌رشتێ ڤه‌كۆلینێ دبێژیت: پرۆتین ژ 33 زنجیره‌یێن ترشێ ئه‌ماینۆ پێكدهێت، دشێت وه‌رگرێن ئه‌نسۆلینێ دله‌شێ میرۆڤیدا چالاكبكه‌ت و هه‌ڤشێوه‌یێ ئه‌نسۆلینێ شه‌كرێ دناڤ خوینێدا كێمبكه‌ت.
سه‌رپه‌رشتێ ڤه‌كۆلینێ مفایێ حه‌پكێ به‌راورد دگه‌ل ده‌رزییا شه‌كرێ دیار دكه‌ت و دبێژیت: هه‌لگرتنا حه‌پكێ و بكارئینانا وێ ب ساناهیتره، هه‌روه‌سا دێ زێده‌تر ل به‌ر ده‌ست بیت.
پیته‌ر فلای بسپۆرێ بایۆلۆجییێ نوشدارى به‌حسا ئه‌گه‌رێن به‌رده‌ستنه‌بوونا حه‌پكا هورمۆنا ئه‌نسۆلیێ دكه‌ت و دبێژیت: ئه‌نسۆلینێ پێكهاته‌یه‌كێ ئالۆز هه‌یه، ئه‌گه‌ر ب رێكا ده‌ڤى بهێته بكارئینان، دێ كارتێكرنا وێ ژبه‌ر ترشێن گه‌ده‌ى كێمبیت.
ڤه‌كۆله‌رێن په‌یمانگه‌هێ به‌لاڤكرییه، دێ ڤه‌كۆلینا خوه پێشئێخن و دێ بزاڤێ كه‌ن د تاقیكرنا بهێتدا ئه‌وێ حه‌پكێ ل سه‌ر رێژه‌یه‌كا مه‌زن یا تووشبوویێن شه‌كرێ تاقیبكه‌ن.
ل دووڤ زانیارییێن مایۆكلینیكا نوشدارى، شه‌كرا جوورێ ئێكێ ژ ئه‌نجامێ كێمى یان نه‌بوونا هورمۆنێ ئه‌نسۆلینێ روو دده‌ت كو نه‌خۆشییه‌كا بۆ ماوه‌ییه، هه‌روه‌سا ئه‌نسۆلین رۆله‌كێ كارتێكه‌ر ل ڤه‌گوهاستنا شه‌كرا خوینێ بۆ ئه‌ندامێن له‌شى هه‌یه، و ده‌رئه‌نجامێ وێ شه‌كرا خوینێ كێم دكه‌ت.
Comments are closed, but trackbacks and pingbacks are open.