▪ کاریگەریا گوهۆڕینێن رۆژهەلاتا ناڤین ل سەر کوردان

ئەڤین بارزانی.

…
رۆژهەلاتا ناڤین بەر ب گوهۆڕینێن بلەز ڤە دچیت، وەلاتێن هەری کاریگەر یێن رۆژهەلاتا ناڤین خوە بۆ قۆناغەکا نوو بەرهەڤ دکەن، تورکیا پشتی چەندین سالێن ناکۆکیان ل گەل ئەمریکا، وەلاتێن ئێکەتیا ئۆرۆپا و وەلاتێن عەرەبی نها دەست ب قۆناغەکا نوو کریە، چونکی تورکیا د قەیرانەکا گەلەک مەزن دایە، پێدڤیا وێ ب وەلاتێن عەرەبی هەیە و کار ل سەر هندێ دکەت ب رێیا پرۆژێن مەزن و بدەستڤەئینانا سەرمایەکێ باش، قەیرانا نها چارەسەر بکەت دا بشێت پێگەهێ خوە بهێز بکەت، هەبوونا درۆنێن بهێز یێن تورکیا کو د شەرێ ل ئۆکرانیایێ ژی دەمەکێ ل دژی رۆسیا هاتنە بکارئینان ئەو یەک سەلماند تورکیا دشێت گەلەک تشتان بۆ پاراستنا پێگەه و بەرژەوەندیێن خوە بکەت.
سەرۆک کۆمارێ تورکیا د سەرەدانا خوە یا بۆ وەلاتێن عەرەبی ب تایبەتی ژی یا بۆ سعوودیێ ب رێیا داخۆیانیێن خوە ئەو پەیامە ژی دا وەلاتێن عەرەبی کو تورکیا بەرهەڤە ل گەل وان دەست ب قۆناغەکا نوو بکەت، هەڤکێشێن نها یێن سیاسی ل دەڤەرێ وەسا کرینە کو تورکیا یا نەچار بیت تا رادەیەکێ خوە ژ رۆسیا دوور بکەت، هەرچەندە ب تەمامی دوورکەفتنا تورکیا ژ رۆسیا ژی بۆ وی وەلاتی باش نابیت.
بابەتێ پرسا سووریێ ئێکە ژ خالێن هەری گرنگ، چونکی نها ل رۆژهەلاتێ سووریێ رەوشەکا نوو یا هەی، د راپۆرتا وەزارەتا دەرڤە یا ئەمریکا دا بەحسێ ڤێ یەکێ هاتیە کرن، ئیران چەکێ مودێرن ددەتە چەکدارێن سووری دا خوە بۆ هەر گوهۆڕینەکێ ل سووریێ ئامادە بکەن، هەرچەندە هەتا نها بالانسا هێزێ د ناڤبەرا ئەمریکا و رۆسیا دایە و هەر دو وەلاتێن زلهێز ژی بۆ بەرژەوەندیێن خوە گەلەک کاران دکەن، لێ یا گرنگ ئەوە کا دێ گوهۆڕینێن نها ل سووریێ چ کاریگەریا خوە ل پاشەرۆژا کوردان کەن؟ چونکی مخابن سەرەرای گەلەک گوهۆڕینان و هاتنا هندەک دەلیڤێن باش لێ کوردان ل سووریێ نەشیان مفایەکا باش ژ وان گوهۆڕینان ببینن، کورد ب ئاریشێن خوە ڤە مژوول بوون، مەها بۆری وەزیرێ دەرڤە یێ رۆسیا لاڤرۆڤی ب رەنگەکێ ئاشکرا دیار کر، وان دڤێت کورد بگەهنە مافێن خوە لێ هەتا نها ژی کورد بۆ ڤێ یەکێ بەرهەڤ نینن، ناکۆکیێن هەر دو جڤاتێن کوردی یێن رۆژئاڤایێ کوردستانێ مخابن کاریگەریا خوە ل داخوازیێن کوردان ژی کریە.

“لێ گەلەک گرنگە کورد ب سیاسەتەکا راست سەرەدەریێ ل گەل روودانێن نها بکەن”.

هەکە ئەم بەرێ خوە بدەینە هەرێما کوردستانێ رەوشەکا دی هەیە، ئیراق و وەلاتێن هەڤسنۆرێ هەرێما کوردستانێ ب هەموو رەنگەکێ یێ کار دکەن دا پێگەهێ کوردان لاواز بکەن، مخابن د ناڤ هەرێما کوردستانێ دا ژی هندەک هێز هەنە تنێ ژ بەر دژبەریا پارتی بەرهەڤن گەلەک کاران بکەن کو د ئەنجام دا ئەو کارێ وان دبیتە زیانەکا گەلەک مەزن بۆ کوردان، بەری نها پێگەهێ کوردان د هەڤکێشێن ل دەڤەرێ دا بهێزتر بوو، ب تایبەتی ژی دەمێ شەرێ داعشێ کو کوردان شیان هەم ل هەرێما کوردستانێ و هەم ژی ل رۆژئاڤایێ کوردستانێ دربێن کوژەک ل مەزنترین رێکخستنا تیرۆرستی ل جیهانێ بدەن و ئەو یەک ژی وەسا کر جیهان پتر بەحسێ کوردان بکەت، لێ مخابن پشتی شەرێ داعشێ هەم کوردان نەشیان ب دبلۆماسیەکا بهێز یا پێدڤی بۆ بهێزکرنا پێگەهێ خوە بکەن و هەم ژی ژ بەر ناکۆکیێن د ناڤبەرا کوردان دا پێگەهێ هەرێما کوردستانێ لاواز بوویە، نها ژی گەلەک پیلان ل دژی هەرێما کوردستانێ دهێنە گێران، لێ گەلەک گرنگە کورد ب سیاسەتەکا راست سەرەدەریێ ل گەل روودانێن نها بکەن.
پارتی دیموکراتی کوردستان یێ بزاڤان دکەت دا مەترسیێن هەی ل سەر هەرێما کوردستانێ نەهێلیت، سیاسەتا پارتی بۆ ڤێ مەرەمێ ژی تا رادەیەکێ زەلالە، لێ مخابن هندەک هێزێن دی تنێ ژ بەر هندەک بەرژەوەندیێن خوە یێن تەنگ ب تەمامی ل دژی بەرژەوەندیێن هەرێما کوردستانێ کار دکەن، ئاستەنگیان دروست دکەن دا هەلبژارتن د دەمێن خوە دا نەهێنە کرن، د بابەتێ بۆدجەی دا دیسان وەسا کرن دا هندەک کارت بکەڤنە دەستێ بەغدا، یێن هەتا دوهی دگۆتن هەکە پارتی پەترۆلێ رادەستی بەغدا بکەت دێ هەمی تشت بیتە شاما شەریف، لێ نها هەر ئەون خوە بێدەنگ کرینە و ل هەمبەر هەلوەست و پیلانێن بەغدا چو داخۆیانیان ژی نادەن، لێ دیسان شاندێ پارتی چوو بەغدا و بەرەڤانی ل مافێن رەوا یێن خەلکێ کوردستانێ کر.