ناجح بێجانـــی
ھەکە ڤەگەرین دیرۆکا سەد سالێن بۆری دێ دیار بیت چەند چیرۆکێن تراژیدی و کۆمکوژی و جینۆساید و ئەنفال و زۆرداریی و دەربەدەری و مالوێرانی ب سەر گەلێ کوردا هاتی یە، ل هەر چوار پارچێن کوردستانێ بێ جوداهی کێم زێدە هەڤسۆیێن مە، ل دویف کاودانان ب هیچ ڕەنگەکی دلۆڤانی ب مە نەبرییە و گەلەک جاران ئەم بخوە ژی دژی هەڤدو بوینە و کەفتنە دبن باندۆرا وان دا، هەتا ڤێگاڤێ ژی بمخابنڤە ئەم نە شیاینە ژێ ڤی کەلتۆری دوور کەڤین یا من بڤێتن بەحس لێ بکم گەلۆ ئەڤا ب سەرێ مللەتێ کورد هاتی بسەرێ کیژ نەتەوەیەکێ دییێ جیهانێ هاتبا باوەردکم هەر ڕیهـ وڕێشارێین وان ژی نەدمان ئەڤ خوەڕاگرییا کورد بۆچی و ژ بەر چ یە چونکو ئەم خودان دۆزەک ڕەواینە و مە باوەری ب هەبوونا وێ یە و ڕاستە هێزا خوە ژ چییا وەردگرین هەر ژکەڤن دا یا گۆتی: ب تنێ چیا دوستێن کوردانن پا بۆچی هندەک جاران ئەم دکەڤین بن باندۆرا دەوروبەریێن دا؟ یانژی گرێدانەکا ( جیۆپۆلتیک )ڤەیە یەکا دۆژمنا چ ژ مە دڤێتن دێ چەوا سەرەدەدییێ دگەل مە کەن ئانکو کوردستان یا دناڤ زێندانەکا چوار دیواری دا، یا ل سەر کوردان گڕنگ ئێکڕێزیا خوە یا نەتەوەیی موکم بکن، هەتا دناڤ جڤاکێن ناڤنەتەوەیی ژی دا ب هەمی پێڤەرێن خوە دزانین ئەڤە زۆلمە ل مە دهێتەکرن و ژ دوێر زەمان ئەڤە ئەردێ مەیە، ئەم ل ڤێرێ دژین و چ جاران نەبوینە جهێ نەڕەحەتی وئالۆزییان بۆ هەڤسۆیێن خوە، بەلکو مە ڤیایە ب ڕێکێن ئاشتیانە داخوازا مافێن خوە بکن، لێ دۆژمنێن مە هەمی جاران شەر ب مە فروتی یە و نەچار بوینە بەرەڤانییێ ژ هەبوونا ناسناما خوە یا نەتەوەیی بکن و هەر دەم بوینە فاکتەریێن سەقامگیرییێ، بەلێ بمخابنڤە ھەر ئەوان هەولدایە مە ژ ناڤببن و ھەر وەک نەتەوەیەکێ زیندی ێین مایین و دکۆکا خوەدا کوردان حەزا پێکڤە ژیان و ئاشتیێ هەیە و ئەو ڤێ چەندێ ب خوە ب دەرفەت دبینن و ئاستەنگا بو مە دورست دکن و بەلێ خودان ئیرادەینە خوە بدەستڤەنادین، ئەڤ تراژیدی هەتا کەنگی؟ ئەگەر ب تنێ مەها (ئادارێ )وەک میناک: وەربگرین کا چ ب سەرێ گەلێ کورد هاتییە دئەڤێ مەهێ دا ڕاستە گەلەک جاران خوە سەربلند دبینن وشانازییێ پێ دکەین دبێژن: دەستکەفتێن باش و ئۆمێدا خوەڕاگریێ د بەخشتەمە ڤێ مەهێ، بەلێ بەرۆڤاژی ژی ڕاستە هەر چ کارەسات وخیانەت ژی دئەڤێ مەهێ دا ب سەر کوردان هاتینە، وەک ڕێکەفتنا خیانەتکارا جەزائیرێ ل ٦ی ئادارا ١٩٧٥ێ و ١٦ی ئادارا ١٩٨٨ێ جینۆسایدا هەلەپچە و سێدارەدانا سەرۆکێ کۆماراکوردستان پێشەوا قازی محەمەد ل ٣١ی ئادارا ١٩٤٧ ێ و ل ٣١ ئادارا ١٩٩١ کوچا ملیونیا خەلکێ کوردستانێ بێ جوداهی، ئەڤە چەند میناک بون مە ئاماژە پێدایی، لەوما دبێژن هەتا ئەڤرۆ ژی ئەڤ تەراژیدی یە د بەردەوامن ب تنێ جۆریێن وان هاتینە گوهاڕتن ژ برسیکرنێ و بێ ڕێزیکرنێ و ئێڕشێن ڕۆژانە ب درۆون و ڕوکێتێن بالیستی بۆ سەر هەرێما کوردستانێ، دۆژمنێن مە ب هەمی رەنگا یێن دژی مە پیلانا دگێڕن نھا ب ناڤێ دادگەها فیدرال وەکو ئەو دبێژن هەر چەندە ب تنێ کورد پەیڤا فیدرال ب کاردئین د ڕاستیێ دا (ئەرەبان) ب گشتی باوەری پێ نینە، یێن باوەری ب هەبوونا تە نەبیت وەکو مرۆڤ دێ چەوا تە ب خودان ماف بینن، لێ رێیا ڕاستودورست ئەڤەیە دڤێتن ئەم لخوە ڤەگەڕین و ل خەلکێ خوە خوەدی دەرکەڤین ناکوکێن ناڤخوەیی بدەینە ڕەخەکی و بەرەیەکێ کوردستانی ونیشتمانی دورست بکن و ب سۆز بن بۆ ئاخ ونیشتمان، دویر ژ هەر ئایدۆلۆژیەکێ ئەڤە دێ مە گەهینت کەناریێن ئارام، بەرۆڤاژی ئەڤێ وەزعێ مە باشتر نابیت ڕۆژ بۆ ڕۆژێ دوژمنێن مە یێن چلا دکولن وچاڤەریێ کەفتنا مەنە، ئەرێ بو پێداچوونەکا دووربین و دویر ژ هەر بەرژەوەندیەکێ هزرا خوە ناکن کا چەوا ئەڤ ئازادیا ئەڤرو تێدا دژین ب چ دەردەسەریی وخوینا هەزاران جانگوریێن ڤی مللەتی ژ پێخەمەت ئازادی و سەرخوەبوونێ هاتیە ڕشتن یا فەرە سەر هەر تاکەکی کورد وەکو بیبیکا چاڤێن خوە ئەڤێ هەریمێ بپارێزن نەهێلن دۆژمن دەستوەردانێ بکن و هیچ جارەکێ ئەوان نەڤیایە کوردستانەکا ئازاد و پيشکەفتی هەبیت. ئەو هزر دکن ئەڤە مەترسی یە ل سەر وان، ئەڤجا دێ ل بەهانا گەرن و ناڤخویا مەژی کەسانێک هەنە پشیەڤانیێ لێ دکن، کوردستان ژی دێ هەر مینت خۆڕاگر و ب هێزتر و ئاڤەدان تر و پێشکەفتی تر و خودێ کوردستانا مە بپاڕێزیت.
Comments are closed, but trackbacks and pingbacks are open.