ئەڤرۆ وەلاتییێن سوید ب مەبەستا پشكداریكرنێ د سێ هەلبژارتنان دا دێ چنە سەر سندۆقێن دەنگدانێ و د هەلبژارتنێن ئەڤسالە یێن وی وەلاتی دا 15 كورد بەربژارن.
هەلبژارتنێن پەرلەمانی كۆ 100 پارتێن سیاسی و بەربژارێن سەربەخۆ تێدا هەڤركییێ دكەن.
هەلبژارتنێن جڤاتا هەرێمان كۆ 122 پارتێن سیاسی و بەربژارێن سەربەخۆ تێدا پشكدارن. هەروەسا هەلبژارتنێن باژێرڤانییان كۆ 321 پارت و بەربژارێن سەربەخۆ تێدا پشكدارن.
نەهـ پارتێن سەرەكی ژی د هەلبژارتنان دا پشكدارن ئەوژی پارتێن سۆسیال دیمۆكرات، پارتا چەپ، پارتا كەسك، پارتا سەنتەر، پارتا لیبرال، پارتا مودێرەیت، پارتا كریستییان دیمۆكرات، پارتا دیمۆكراتێن سوید و سەربەخۆیان.
د هەلبژارتنێن ئەڤسالە یێن وی وەلاتیدا، زێدەتری 15 كوردان بۆ پەرلەمانی و ب دەهان كوردان ژی بۆ هەلبژارتنێن باژێرڤانییان بەربژارن.
لدووڤ ئامارێن نە فەرمی یێن سویدێ ژی، هەژمارا ئاكنجییێن وی وەلاتی 10.35 ملیۆن كەسە. ژ وێ هەژمارێ ژی 2 ملیۆن و 47 هزار و 731 كەس كۆ دبیتە ( 19.7 ) ژ سەدێ كۆچبەرن. پترییا كۆچبەران ژی خەلكێ شەش وەلاتانە:
كورد، یێن هەر چوار پارچێن كوردستانێ
عیراق
سوریا
ئیران
فینلەندا
پۆلەندا
هەرچەندە ئامارێن پشتراستكری نینن، لێ ئامارێن نە فەرمی دیاردكەن كۆ ب لایەنێ كێم 100 هزار كورد ل وەلاتێ سوید ئاكنجی نە. ئەڤێ یەكێ ژی رەنگڤەدان ل هەمی دەستهەلاتێن سویدێ هەبوویە و ب تایبەت دەستهەلاتا یاسادانان و ب جهـئینانێ، ب رەنگەكی كۆ نوكە 7 پەرلەمانتارێن سویدێ كوردن كۆ سەر ب پارتێن جودا جودا نە. هەروەسا زێدەتری 100 ئەندامێن باژێرڤانییان ژی كوردن.
Comments are closed, but trackbacks and pingbacks are open.