ڕێڤەبەرێ گشتیێ ساخلەمیا دهۆکێ ڕاگەهاند، ئەو نها د ناڤ پێلا دوویێ یا کۆرۆنایێ دانە و دبێژیت ژی، 35٪ یا وان پشکنینێن بۆ کۆرۆنایێ ل دهۆکێ دهێنەکرن پۆزەتیڤن.
ئەڤراسیاب موسا ڕێڤەبەرێ گشتیێ ساخلەمیا دهۆکێ د چاڤپێکەفتنەکێ دا دگەل دەنگێ ئەمریکا ڕاگەهاند، خەلکێ دهۆکێ رەغبەتەکا زێدە بۆ ڤاکسین وەرگرتنێ هەیە و وان ژی گەلەک سەنتەرێن ڤاکسیندانێ داناینە ژبۆ کو ب ساناهی بدەست خەلکی بکەڤیت، پلان ئەوە هەیا مەها ئیلۆنا ٢٠٢١ێ ٢٠٪ یا خەلکێ پارێزگەها دهۆکێ ڤاکسینێ وەربگرن.
دیارکریە ژی، کو ل دهۆکێ ڕێژەیا ئاکنجیان ملیۆنەک و ٢٠٠ هزار کەسن و ئێک ملیۆن ئاوارە ژی تێدانە، لێ هەیا نها پشکا ئاوارەیان نەهاتیە هنارتن و ئەو ل پشکا خەلکێ دهۆکێ ڤاکسینێ ددەنە ئاوارەیان، وان حکومەتا فیدرال و (WHO ) لێ ئاگەهدارکرینە داکو پشکا دهۆکێ یا ڤاکسینێ بهێتە زێدەکرن.
ئەو یەک ژی دایەزانین، کو ل دهۆکێ دوو نەخۆشخانە بۆ نەخۆشێن کۆرۆنایێ هاتنە تەرخانکرن و هەیا نها تژی نەبووینە و د نها سەدێ ٦٠ بۆ ٧٠ یا تەختێن نەخۆشخانەیان تژی بووینە.
ڕێڤەبەرێ گشتیێ ساخلەمیا دهۆکێ گوتیە ژی، کو پێلا دوویێ یا کۆرۆنایێ ل ١٥ێ ئادارێ دەستپێکریە و ب ئاوایەکێ ئاسایی ٣ بۆ ٤ مەهان درێژە دکێشیت.
دەربارەی ڕاگەهاندنا قەدەغەیا هاتن و چوونا گشتی ژی ناڤبری ڕاگەهاند، وان پێ باشبوو بەریا ٢٠ ڕۆژان قەدەغەیا هاتن و چوونێ هاتبا ڕاگەهاندن، لێ دیارە ژبەر ڕەوشا ئابوری و جڤاکی نکارن قەدەغەیا هاتن و چوونێ ڕابگەهینن.
Comments are closed, but trackbacks and pingbacks are open.