رێنمایێن دارایی بۆ چارەسەرییا ئاریشا مامۆستایێن وانەبێژ هاتنه‌ ده‌ركرن

زێ بادینان ، بەهجەت بلند:

ئەڤرۆ چارشەمبی 27/10/2021، ب ئیمزا ئاوات جەناب نوری، وەزیرێ دارایی و ئابووری، رێنمایێن دارایی بۆ کرێیا مامۆستایێن وانەبێژ یێن دانەمەزراندی و چارەسەکرنا کێشا وان دەرچوو.
رێنمایێن دارایی یێن وەزارەتا دارایی و ئابووری کو ب ژمارە (14) دەرچوویە، ئاراستەیی گشت وەزارەتان و دەستەیێن نه‌گرێدایی ب وەزارەتان هاتینه‌ کرن و تێدا هاتییە، پالپشت ب نڤیسارا جڤاتا وەزیران و کۆنڤیسێ کۆمبوونا دناڤبه‌را وەزارەتا دارایی و وەزارەتا پەروەردێ ل 19/10/2021، شەش رێنمایی بۆ چارەسەرییا کێشا مامۆستایێن وانەبێژ دەرچووینە، کو تایبەتە ب دیاریکرنا کرێیا مامۆستایێن وانەبێژ یێن دانەمەزراندی لدووڤ گوند و باژێر و سەنتەرێ پارێزگه‌هان و ئیدارێن سەربەخۆ و لبەرچاڤگرتنا باوه‌رنامێن وان.
ئەو رێنمایێن دارایی دێ ل 1/9/2021ێ هێنه‌ جێبەجێكرن و دێ ل رۆژناما وەقائعی کوردستان هێنه‌ به‌لاڤكرن.
پێشتر وەزارەتا دارایی و ئابووری د بزاڤێن بەردەوامدا بوون بۆ چارەسەرییا کێشا مامۆستایێن وانەبێژ، بۆ ڤێ مەبەستێ ژی، 17/10/2021 ل دیوانا وەزارەتا دارایى و ئابووری، وەزیرێ دارایى و ئابوورى ب مه‌ره‌ما چارەسەرکرنا کێشا مامۆستایێن وانەبێژ، ل گەل هەر ئێك ژ وەزیرێ پەروەردێ و سەرۆکێ دیوانا جڤاتا وەزیران کۆمبوویە.