غیاس خالد زێبارى
راسته ئیراقا پشتى دكتاتۆریه‌تێ ئه‌و ئیراقا پشتى شه‌رێ ئازادیێ ل سالا 2003 بناڤ ئیراقه‌كا فیدرالى و دیموكراسى و خۆدان سه‌روه‌رى هاتیه‌ڤ ئاڤاكرن .
د پراكتیك دا ئیراق وه‌ڵاته‌كێ جودایه ژ هه‌مى وه‌ڵاتان , نه سیسته‌م سیسته‌مه‌كێ فیدرالى و دیموكراسى یه نه‌ژى ده‌سهه‌لاتێن وێ د ملكه‌چى ده‌ستوور و قانوونا نه , نه‌ژى چ سه‌روه‌رى مایه ..!
ئه‌گه‌ر ئیراق وه‌لاته‌كێ سه‌ربه‌خۆ و خودان سه‌روه‌رى با دا حكومه‌ت و سازیێن وێ یێن ده‌وله‌تداریێ یێن بهێز و خزمه‌تكار بن، و قانوون دا سه‌روه‌ر بیت و ده‌ستوور ئێكلاكه‌ر بیت ،
لجهێ دیتنا چه‌كدارێن میلیشیایا دناڤ كۆڵانێن پایته‌خى و باژێران پارك و ئاڤاهیێن جوان و بلند دا هێنه دیتن ، دبلۆماتكا و شاندێن وه‌ڵاتان لجهێ رێكارێن دژوار یێن ئه‌منى و بله‌ز ده‌ركه‌فتن ل به‌غدا، دا دگه‌ل خێزانێن خۆ سه‌ره‌دانێن كۆڵانێن كه‌ڤنێن باژارێن وه‌ڵاتى و جهێ شوونوارى و گه‌شتیارى كه‌ن ، یان ژى چالاكیێن هۆنه‌رى و ره‌وشه‌نبیرى و كلتۆرى كه‌ن ، خه‌لكێ وه‌ڵاتێن هه‌ژار كۆم كۆم دا قه‌ستا ئیراقێ كه‌ن بۆ كاركرنێ ، نه خه‌لكێ ئیراقێ كۆم كۆم دا به‌ره‌ڤ سنوورێن مرنێ مشه‌خت بن .
به‌رده‌وامیا ڤێ ره‌وشا نه سه‌قامگیر یا سیاسى و ئێمناهى و جڤاكى، خه‌لكێ ئیراقێ زێده بێ ئۆمێد كریه ، ده‌ستهه‌ڵات كه‌فتیه دده‌ستێ سیاسیێن جێبجێكارێن ئه‌جندایێن وه‌ڵاتێن هه‌رێمى و گۆپ و میلیشیایێن چه‌كدار ، ب گشتى فه‌رمانێن ده‌ره‌كى و گه‌فێن چه‌كدارى ده‌ستهه‌ڵاتدارن ..! پابه‌ندیێن تائیفى جهێ پابه‌ندیێن نه‌ته‌وه‌یى و نشتیمانى گرتیه .
ئه‌گه‌ر ئیراق وه‌ڵاتێ ده‌ستوور و قانوون و سه‌روه‌ریێ با ، دوهى میلیشیایێن چه‌كدار گه‌فێن گۆهــ بڕینێ ل سه‌رۆك وه‌زیرا نه‌دكرن و ئه‌ڤرۆ ژى ماڵا وى ب فرۆكان نه دهاته بۆمبه‌بارانكرن .
هه‌ر چه‌نده بكه‌ر و دارێژه‌رێن پیلانا هه‌وڵا تیرۆركرنا مسته‌فا كازمیێ سه‌رۆك وه‌زیر نه‌هاتینه دیاركرن و هه‌ر كه‌س و لایه‌نه‌ك ده‌ستا بۆ ئێكى درێژ دكه‌ت ، لێ پڕانى وان لایه‌نێن دووڕاندى ل هه‌لبژارتنێن گشتى یێن 10/10/2021 گۆنه‌هبار دكه‌ن ئه‌وێن ژ ئه‌نجامێن ڤان هه‌لبژارتنا د نه‌ڕازى و لایه‌نگرێن خۆ لسه‌ر جادێن پاریته‌ختى كۆمكرى و ئاڵوزیێن ئه‌منى درۆست كرى .
ئاریشه نه ئه‌وه بكه‌ر و پیلان دارێژه‌ر كینه ، ئاریشه ئه‌وه وه‌ڵات و ده‌ستهه‌لاتێن شه‌رعى بێ هه‌بیه‌ت كرن و خه‌لك ژى بێ ئۆمێد كر و ئێخسته د ره‌وشه‌كا دژوانا ئێمناهى و سیاسى دا .
مه بڤێت و نه‌ڤێت دڤى سیسته‌مێ ئیراقێ دا سه‌رۆك وه‌زیر ده‌ستهه‌ڵاتدارێ ئێكێ یه و ره‌مز و نوونه‌رێ ئیراقیا یه ، بێ هه‌یبه‌تكرنا وى بێ هه‌یبه‌تكرنا ئیراقیایه و تاوانه‌كا مه‌زنه .
به‌رده‌وامیا ڤێ ره‌وشا ئیراقێ ئاماژێن دژوار و تارینه ل هه‌مبه‌ر پاشه‌رۆێ ، پشتى گه‌فێن گۆهــ بڕینا سه‌رۆك سه‌رۆك وه‌زیرى ، هه‌وڵا تیرۆكرنا وى ب فرۆكێن دروون هات، دوور نیه پشتى سه‌رنه‌گرتنا ڤێ هه‌وڵێ كۆده‌تایێن له‌شكرى هه‌بن و ئیراق ب پڕاكتیك بكه‌ڤینه بن ده‌ست و دلۆڤانیا میلیشیایێن چه‌كدارێن تائیفى و ره‌وشا یه‌مه‌ن و لوبنانێ لسه‌ر بهێته كۆپیكرن .
ئه‌ڤ هێرشا سه‌ر ماڵا سه‌رۆك وه‌زیرێن ئیراقێ په‌یامه‌كا رۆن و ئاشكریه ژلایێ لایه‌نێن خودان میلیشیا و چه‌كدار بۆ لایه‌نێن سیاسى یێن ئیراقێ بتایبه‌ت ئه‌وێن سه‌ركه‌فتى د هه‌لبژارتناندا كۆ ده‌ستێ وان دگه‌هیته هه‌مى جهــ و لایه‌نان و دێ هه‌مى رێكا بكارئینن بۆ پاراستنا به‌رژه‌وه‌ندێن خۆ و گۆهداریا ده‌ستوور و قانوون و بریارا خه‌لكى ناكه‌ن ئه‌وا د هه‌لبژارتناندا داى و هه‌ر حكومه‌ته‌كا نوو دهێته پێك ئینان پێتڤى یه لدیف حه‌ز و به‌رژه‌وه‌ندێن وان بیت و ئه‌و بریارێ لسه‌ر بده‌ن .
ئه‌ڤ پیلانێن مه‌زن د شیانێن حزبه‌كێ یان گرۆپه‌كى دا نینه ئه‌گه‌ر وه‌ڵاتێن هه‌رێمى لپشت نه‌بن .
ئه‌ڤ ره‌وشا نه شرۆشتى بۆ ده‌وله‌ت و جڤاكێ ئیراقێ گاڤه‌كا سرۆشتى و پێشبینى كریه و ژ ڤه‌رێژا وێ بریارا نه سرۆشتى یا پێكڤه گرێدان و ئاڤاكرنا ئیراقێ یه به‌رى سه‌د سالا كۆ ب كۆته‌كى و بێ ره‌زامه‌ندیا هه‌مى پێكهاتێن نه‌ته‌وه‌یى و ئایینى و ئه‌تنى ده‌وله‌ته‌ك بناڤێ ئیراقێ ئاڤاكرى و ئه‌ڤ هه‌ڤیره دێ زۆر ئاڤێ ڤه‌خۆت و چاڤه‌رێ خرابتربوونێ لێ دهێـته كرن ، تنێ خودێ دزانیت دێ چ بیت .
- نڤیسەرێ هێژا ئەو ناڤێ تە لخارێ هاتیە نڤیسین سەر لێدە بدە ئێکسەر هەموو بابەتێن تە هاتیە بەلاڤکرن هێن … دگەل رێز
Comments are closed, but trackbacks and pingbacks are open.