ب بڕیارا سه‌رۆكێ حوكمه‌تا هه‌رێما كوردستانێ 34 قوتابخانه ل سنوورێ ئیداره‌یا سه‌ربخوه یا زاخۆ دێ هێنه نووژه‌نكرن
رێڤه‌به‌رێ په‌روه‌ردا زاخۆ بۆ روژناما ئه‌ڤرۆ دیار كر، ب بڕیارا سه‌رۆكێ حوكمه‌تا هه‌رێما كوردستانێ 34 قوتابخانه ل سنوورێ ئیداره‌یا سه‌ربخوه یا زاخۆ دێ هێنه نووژه‌نكرن و ته‌مامكرن و دبێژیت: مه پێدڤی یا ب ئاڤاكرنا هه‌ژماره‌یه‌كا دیتر یا قوتابخانه‌یان هه‌ی.
ئیبراهیم ئه‌نوه‌ر، رێڤه‌به‌رێ په‌روه‌ردا زاخۆ گۆت: “ب بڕیارا مه‌سرور بارزانی، سه‌رۆكێ حوكمه‌تا هه‌رێما كوردستانێ گوژمێ ملیاره‌ك و 490 ملیۆن دینار بۆ ته‌مامكرنا سێ قوتابخانه‌یێن ب نیڤه‌رۆ ل سنوورێ په‌روه‌ردا زاخۆ ماین هاته ته‌رخانكرن، مه گه‌له‌ك پێدڤی ب ڤان سێ قوتابخانه‌یان هه‌بوو كو بهێنه ته‌مامكرن، ژ به‌ركو هه‌تا راده‌یه‌كێ دێ قه‌ره‌بالغیا ل سه‌ر قوتابخانه‌یێن مه هه‌ین نامینیت”.
گۆتژی: “هه‌ر ب پشته‌ڤانیا سه‌رۆكێ حوكمه‌تێ ب گوژمێ 795 ملیۆن دیناران 31 قوتابخانه ل زاخۆ دێ هێنه نووژه‌نكرن، ژ به‌ركو گه‌له‌ك بێ سه‌روبه‌ر ببوون و ده‌مه‌كێ درێژه نه‌هاتینه نووژه‌نكرن و هه‌ر ده‌ما پاره‌یێ نووژه‌نكرنا وان قوتابخانه‌یان گه‌هشته به‌ر ده‌ستێ مه، دێ كار تێدا كه‌ین”.
ناڤهاتی دیار ژی كر، بۆ سالا بهێت وان پێدڤی ب ئاڤاكرنا سێ قوتابخانه‌یێن نوو هه‌یه و گۆت: “ب شێوه‌یه‌كێ گشتی ل سنوورێ ئیداره‌یا سه‌ربخوه یا زاخۆ مه پێدڤی ب ئاڤاكرنا 15 هه‌تا 20 قوتابخانه‌یێن نوو هه‌یه”.
ل دوماهیێ گۆت: “د پلانا مه دایه، قوتابخانه‌یێن زین و ئه‌حمه‌دێ خانی و ئاماده‌یا پیشه‌سازی بهێنه خرابكرن و سه‌ر ژ نوو بهێنه دروستكرن ب شێوه‌یه‌كێ سه‌رده‌میانه و دێ مفایه‌كێ باش ژ وان قوتابخانه‌یان ژی بینین”.
Comments are closed, but trackbacks and pingbacks are open.