گێلەشووکا راگەھاندنێ ل باشوورێ کوردستانێ

بەیارێ زاویتەیی

ل کەنالێن راگەھاندنێ ل باشوورێ کوردستانێ ھەر چار وەرزێن سالێ زڤستانە، بارانا نووچان یا بەردەوامە و ھندەک جاران بەفر ژی ل گەل دباریت و مرۆڤی سار دکەن و پێدڤی ب ھندەک درەوێن بەرۆڤاژی وان درەوان دبین یێن ئەو دکەن دا خوە پێ گەرم بکەین. ھەر روودانەکا رووددەت دێ ب پێنج جۆران پێزانین گەھنە مە، ھەر ئێک وەکو خوە و ل دووڤ بەرژەوەندا خوە شرۆڤە دکەت، ئەڤە ژ بلی کو کەنالێن ھندەک حزبان دبنە “بووووق” بۆ ھندەک حزبێن دی، بۆ نموونە دەمێ شنگال ژ لایێ داعشێ ڤە ھاتیە داگیرکرن ھەموو حزبێن کوردستانێ ل وێرێ بوون و ھەموو رەڤین و ھەمیان حزبەکا کوردستانێ تومەتبارکر، و دەمێ ئەو حزبا کوردستانێ ب سەرۆکێ خوەڤە چووینە شنگالێ و د دو رۆژان دا رزگارکری ھەمیان خوە ل مەیدانێ ھلاڤێت و سەرکەفتن بۆ خوە ل قەلەم دا، و ھندەک دەزگەھێن راگەھاندنێ یێن ھندەک حزبان ب زۆری دەستکەفت بۆ ھندەک حزبێن دی ئینا ھژمارێ، ئانکو وەسا دا دیار کرن کو ئێک پێشمەرگەی ب تنێ ژی پشکداری د ئوپەراسیۆنا رزگارکرنا شنگالێ دا نەکریە، ئەڤە ژ بلی کو حکومەتا عیراقی سەرکەفتن بۆ ھێزێن خوە ل قەلەم دا و گۆت دڤێت ئالایێ عیراقێ ل وێرێ بھێتە ھلدان. د کەنالێن مەیێن راگەھاندنێ دا ل باشوورێ کوردستانێ وەکو پەرمیچکێن بەفرێ و تاڤیێن بارانان نووچە و وێنە بەلاڤ دبن و مێشکێن بینەر و خوینەران دوەرپێچن، نە نووچەکێ خێرێ بەلاڤ دکەن و نە ژی دلێ خەلکێ تەنا دکەن، ھەموو نووچە د بێ سانسۆرن و ژ ھەموو پیڤەرێن رۆژنامەڤانیێ ددوورن، ھەمیان ژی سەنگا وی گینیکێ ئاخێ نینە یێ سینگێ پێشمەرگەی ژ فیشەکێن دوژمنێ دپارێزیت. رۆژنامە ژی ل بەر دەرگێن کوشک و دوکانان و ل سەر دەستێ زارۆیان ل سویکا ماستی ب مانشێتێن خوەیێن بریسقەدار ڤە، کەس ژ فەرمانبەرێن خانەنشین پێڤەتر ناکڕیت، یان ژی ئەو گەنجێن خوە وەکو رەوشەنبیر ددەنە دیار کرن و ل سەر تەختکێن چایخانێن ل سەر شۆستەیان گەشتەکا بلەز د ناڤ بەرپەرێن وێ دا دکەن دا خەلک بێژیت یێ رەوشەنبیرە یێ رۆژنامێ دخوینیت. ئەڤە ھەموو ھێشتا نووچە بوون، خودێ نەکەت ببیتە دەمێ شرۆڤەکرنا بویەرەکێ، بێژەر دێ خوە خیسینیت و مێڤان دێ زەڤلەکێن خوە دیار کەت دێ بێژی ملاکمەیە، بینەر ژی دێ ب ھەر دەھـ تلان بۆ مۆر دکەت و دێ بێژیت (واللە تە پەقاند) و ل کولانان بێژنە ئێک و دو تە دیت فلان کەسی ل سەر شاشا تەلەڤزیۆنێ چ ب سەرێ فلان حزبێ یان فلان کەسی ئینا؟ راستە پەیڤا (تە پەقاند) ژ ڤالاتیێ ناھێت، بەلکو ئەو تشتێ وی گۆتی بینەر ژی دڤیا بێژیت چونکو یا ل وێ تێلێ دای یا دلێ وی پێ رحەت دبیت، بەلێ ئەو پەقاندنا بێ سنۆر و بێ سانسۆر و بێ بەلگە بۆچی وەسا ب ئاشکرایی ل سەر کەنالێن راگەھاندنێ دھێتە گۆتن، مانە ھەر تشتی سانسۆر و قانوون و داب و نەریتێن خوە یێن ھەین. ل گەل ڤێ چەندێ ژی ھەر ھەیامەکێ کەنالەکێ نوویێ تەلەڤزیۆنێ و دەزگەھەکێ نوویێ راگەھاندنێ ل کوردستانێ ڤەدبیت، و کۆمەکا گەنجێن نوو وەکو بێژەر و پەیامنێر لێ کار دکەن و گەلەک ژ وان چو باگراوەندێن رۆژنامەڤانی و رەوشەنبیری نینن، لەورا نەشێن پەیاما خوە ب دروستی بگەھینن، بۆ نموونە دیسا دێ بەحسێ ئوپەراسیۆنا رزگارکرنا شنگالێ کەم، ئێک ژ کەنالێن راگەھاندنێ ھند بەحسێ گرنگیا رزگارکرنا شنگالێ و قارەمانەتیا پێشمەرگەی نەدکر ھندی مەتحێن ستافێ خوە و پەیامنێر و وێنەگرێن کەنالێ خوە کرین. یا ژ ھەمیێ کمباختر، نوکە سەردەمەکێ نوو ب سەر مە دا ھاتیە کو بوویە ژێدەرەکێ ب ترس بۆ نووچێن بێ بنەما و شەرێ حزبان و لایەنگرێن وان و ھەر ئێک ب کەیفا خوە شرۆڤان ددەتە روودانان و ب کەیفا خوە لایەنێ دی تومەتبار دکەت. ئەو ژی سەردەمێ فەیسبووکێ و کورێ خالەتا وێ تویتەر و ھەڤال و ھوگرێن وی یوتیووب و سایتێن دی نە. ئەو ژی یا بوویە گارانگۆلکانێ، ھەر لایەنەکی چەند پەیچ ب ناڤێن وەھمی چێکرینە دا دژاتیا لایەنی دی پێ بکەن و ناڤێ وی شێلی بکەن، یان ھەر کەسەک بۆ خوە شرینکرنێ ل بەرچاڤێن لایەنێ خوەیێ سیاسی دێ تەڤڕ و بێرێن خوە راکەت و ب سەرێ لایەنەکێ دا دادەت دا بەرپرسێ وی سحەتخۆشیێ لێبکەت. ئەڤە ژبلی ھەکە ئێکی ڤیا (.. .. .. .. .. . کانیا گوندی) دێ پەیچەکی چێکەت ب ناڤێ (لایەنگر و پشتەڤانێن فلان کوڕێ فلانی) دا وەکو وەرزشڤانێن لەشجوانیێ خوە بتەیسینیت و بێژیتە خەلکی ئەز یێ ھەیم. بلا ئەم باش بزانین (و ئەز دبێژم ئەم باش دزانین) کو کوردستان ب ڤێ چەندێ سەرناکەڤیت و ناگەھیتە شەمەندەفرا وەلاتێن جیھانێ، دژایەتیکرنا ئێک و دو دێ وەلاتێ مە پاشڤە ھێلیت و نە سیاسەتا مە و نە ژی ئابوور و نە ژی رەوشەنبیری و جڤاکێ مە ئاڤا ناکەت. راگەھاندن ل وەلاتێن پێشکەفتی (یێن دیموکراسی) ئەو ئالاڤە یێ وەلات پێ ئاڤا دبیت و ناھێلیت کەس ل دژی بەرژەوەندا وی وەلاتی کار بکەت، سەرێن مەزن دئینیتە خوار و کەسێن خەمخور بلند دکەت، بلا ئەم ژی راگەھاندنا خوە بێخینە د خزمەتا گشتی دا و ل گەل ئێک و دو د راستگۆ بین، نە حزبا مە چ بکەت ئەم ھەر پشتا وێ بگرین، بەلکو پێدڤیە رەخنەکا ئاڤاکەر د ڤان دەزگەھان دا بھێتە کرن دا تشتێن خراب باش بکەین و باشیان باشتر لێبکەین.

نڤیسەرێ هێژا دکاری ئەو ناڤێ تە لخارێ هاتیە نڤیسین هەموو بابەتێن خۆ بینی …. دگەل رێز