ئاکرێ، بازاڕێ سوپێن دارا سست بووە

• زێ بادینان

 ده‌ڤه‌را ئاكرێ‌ سالانه‌ دگه‌ل هاتنا وه‌رزێ‌ زڤستانێ‌ خواستا وه‌لاتیان ل سه‌ر كرینا سۆپێن دارا زێده‌ دبیت، ژ به‌ر كۆ ئاكرێ‌ ده‌ڤه‌ره‌كا چیاییه‌ و به‌فره‌كا باش لێ‌ دباریت، به‌لێ‌ ئه‌ڤساله‌ ژبه‌ر هشكه‌ سالیێ‌ بازارێ‌ سوپێن دارا گه‌له‌ك سست بووه‌.

مشیر هوكی زێبارێ‌، هوستایێ‌ دروستكرنا سوپێن دارا ل ئاكرێ‌ بۆ ئه‌ڤرۆ گۆت: چه‌ندین ساله‌ ل وه‌رزێ‌ پایزێ‌ هه‌تا هه‌یڤا ئێك خواستا وه‌لاتیان لسه‌ر كرینا سوپێن دارا زێده‌ دبوو ژبه‌ركو ئاكرێ‌ ده‌ڤه‌ره‌كا چیاییه‌ و به‌فره‌كا زۆر دباری سالانه‌ چه‌ندین ساله‌ سوپا دروست دكه‌م چوسالا وه‌ك ئه‌ڤساله‌ بێ‌ بازاری نه‌بووه‌.

گۆت ژی: پار سال ڤی ده‌می رۆژانه‌ سێ‌ بۆ چار سوپا من دفرۆتن، به‌لێ‌ ئه‌ڤساله‌ پتری 20 سوپێن دروستكری هه‌نه‌ و كه‌س ناكریت، ژ به‌ر كۆ هشكه‌سالیه‌ و كه‌ش و هه‌وا سار نه‌بوویه‌ كو وه‌لاتی سوپه‌یا بكرن ئه‌ڤساله‌ هه‌موو ب هیڤیا گازێ‌ ڤه‌، له‌ورا ژی كه‌س سوپا ناكریت.

ئاشكرا كر: ئه‌ڤساله‌ هه‌تا نوكه‌ 15 سوپه‌ فرۆتینه‌ پار سال هه‌تا ڤی ده‌می پتری 80 سوپا من فرۆت بوون كۆ پار ل هه‌موو ده‌ڤه‌را قه‌ستا من دكر بۆ كرینا سوپاس، به‌لێ‌ ئه‌ڤساله‌ ئه‌و بازار نه‌مایه‌ و ئه‌گه‌رێ‌ سه‌ره‌كی ژی ئه‌وه‌ كو نه‌هاتنا به‌فرو بارانا بۆیه‌ ئه‌گه‌ر كه‌ش و هه‌وا زۆر سار نه‌بیت وه‌لاتی ب سوپێن گازی ئیدارا خۆ بكه‌ن.

خویاكر: ئه‌ڤساله‌ بهایێ‌ پلیتێ‌ دروستكرنا سوپا گران بوویه‌، به‌لێ‌ مه‌ زێده‌هیه‌كا زۆر نه‌دانایه‌ سه‌ر سوپا ب تنێ‌ دوو جۆرێن سوپا دروست دكه‌م 60 سم ب بۆری ڤه‌ ب 65 هزارا دفرۆشن و 70 سم ب سێ‌ بۆری ڤه‌ ب 70 هزارا كۆ دگه‌ل پار سال هه‌ر جۆره‌كێ‌ سوپێ‌ 5 هزار زێده‌ بوویه‌. ئه‌گه‌ر به‌فرو باران بهێن و دونیا سار ببیت دێ‌ خواستا وه‌لاتیان لسه‌ر سوپا زێده‌ بیته‌ڤه‌، به‌لێ‌ ژبه‌ر هشكه‌ سالیێ‌ ئه‌ڤساله‌ وه‌ك پێدڤی كه‌س سوپێن دارا ناكریت.