بێریڤان خدر ، زاخۆ
باوەرى ژ رەفتارێن هەرە گرنگ و پێدڤیە د ژیانا مرۆڤى یا رۆژانەدا. باوەرى ب خوەبوون یا گرنگە ژ بۆ پشکداریا مرۆڤى یا بەرچاڤ و رۆژانە دهەموو بواراندا و بتایبەتى د بوارێن جڤاکی دا. هەر باوەرى ب خوە بوونە مرۆڤ سەرکەفتنا پێ ب دەستڤە دئینیت و دشێت پرسیارا مافێن خوە بکەت. ئەگەر ئەڤ تشتە بۆ هەر کەسەکى دگرنگ و پێدڤى بن، بۆ ئــافرەتێ گەلەک پێدڤیترن و فەرە بەرى هەر تشتەکى باوەریێ و جورئەتێ بۆ خوە چێ بکەت. بێگومان هەبوونا باوەریێ و جورئەتێ ژى شیان و شارەزایى و سەربۆر پێدڤێن.
شارەزا دبێژن؛ باوەرى ب خوەبوون گەوهەرەکا بها گرانە و دشیاندایە کا دێ ل کیڤەدانى، یان باوەرى ب خوە بوون گەوهەرە وەکو قارەمانی یە. ئەڤە ژى وێ دگەهینیت کو باوەرى ب خوە بوون، باشترین رەفتار و هەلویستە دڤێت ل دەف مرۆڤى هەبیت. هەر باوەرى ب خوەبوونە بەرێ مرۆڤى ددەتە سەرکەفتنا و پشکداریا بەردەوام و بدەستڤە ئینانا ئارمانج و خواست و پێدڤیان. هەر ژ زارۆکینى، ئەڤ باوەریە دڤێت ل دەڤ زارۆکى بهێتە چاندن. ل سەر ڤێ چەندێ ژى خێزان دشێت ڤێ باوەریێ بۆ زارۆکێ چێ بکەت. هندەک خێزان گەلەک جاران باوەریێ نادەنە زارۆکا کچ و وەسا هزردکەن کو هەر تشتەک دڤێت ب دایک و بابان و کەسێن مەزن یێن خێزانێ بیت.
ل ژیێ پێگەهشتنێ ژى دا ژن پێدڤى ب هندیە کو خێزان، کەسوکار و جڤاک رێکێ بدەتێ کو پشکداریا بکەت و باوەرى ب خوە هەبیت. هەردەم ئــافرەت دچاڤێن جڤاکی دا، کەسەکا کێم هێز و کێم شیانە. ئەڤە ژى دبیتە ئەگەرێ هندێ کو ئــافرەت ژى خوە بکێم شیان و کێم هێز و کێم شارەزایى و زانین بزانیت. چونکو هەردەم مرۆڤ خوە دچاڤێن کەسێن دى دا دبینیت و گەلەک جاران ژى ب پیڤەرێن خەلکى هەلسەنگاندنا خوە دکەت. ژ بەر ڤێ یەکێ فەرە بەرى هەر کەسەکى خێزان ئەڤێ باوەریێ بۆ ئـــافرەتێ چێبکەت و هەردەم پشتەڤانا وێ بیت، پەسنا سەرکەفتن و دەستکەفتیێن وێ بکەن. هەتا ئەگەر دهندەک بواراندا ئەڤ هێزو شیانێن باوەرى ب خوەبوونێ ل دەڤ دکێم ژى بن، فەرە خێزان و جڤاک ب گشتى و هەروسا هەڤالێن نێزیک، بزاڤێ بکەن ئەو شیانێن وێ هەین بەرچاڤ بکەن و گەشێ پێ بدەن.
ژ ئەگەرێن هەرە سەرەکیێن بێ باوەریێ ل دەڤ ئــافرەتێ جڤاکە، یان بازنا هەرە نێزیکی ئـافرەتێ یە کو ئەو ژى خێزانە. پتریا جاران خێزان نەشێت پشتەڤانیا کارو پشکدارى و باوەریا ئـــافرەتێ بکەت ژ بەر جڤاکى و هەروەسا ژ بەر باوەرى و داب و نەریتێن بەربەلاڤ دناڤ جڤاکی دا. یان ژى ژ ئەنجامێ مایتێکرنا کەس و کارو خزم یان گوندیێن وێ خێزانێ یە. ئەڤە ژى هەر ژ ئەنجامێ هەبوونا وان پەیوەندیێن ب هێزە یێن هێشتا دناڤ جڤاکێن مەدا هەین و هێشتا گیانێ مایتێکرنێ و بریار پێشڤەدانێ دناڤ جڤاکی دا، هەیە.
هندەک جاران ژى، ئەگەر ئــافرەت ب خوەیە، ئانکو ئــافرەت وێ باوەریێ نادەتە شیان و سەربۆرو شارەزایێن خوە. یان خوە ناکێشتە گەلەک کاران و وەسا هزر دکەت کو دێ تۆشى زیانێ و رەخنا جڤاکى و کەس و کارو هەڤالا بیت، هەتا کو ئەگەر خێزان یا پشتەڤان و هاریکار ژى بیت. ئەڤە ژى گیانێ کێم باوەریێ ددەتە ئــافرەتێ و پتریا کارا بۆ زەلامى دهێلیت. ب ڤێ چەندێ شیانێن ئــافرەتێ پیچ پیچە لاواز و بەرزە دبن.
هندەک ئەگەرێن دى ژى هەنە دیسان گرێدایى ڤان ئەگەرێن سەرى یە، وەکو کێم گەریان و کێم خوێندەوارى و کێم رەوشەنبیرى دبنە ئەگەر ژ بۆ کێم باوەریا ئــافرەتێ.
ژ بۆ هندێ کو باوەریەکا ژ هەژى بۆ ئــافرەتێ چێببیت، فەرە بەرى هەر کەسەکى، خێزان پشتەڤانیەکا دروست یا کچێ بکەت و هەر ژ زارۆکینى وێ چەندێ نیشا بدەن کو ئەو ژى مرۆڤە و دشێت شیانێن باش هەبن و جڤاک و مرۆڤاتى ژى پێدڤى شیان و شارەزایێن وێ یە. هەروسا جڤاک و کەسوکار مایێ خۆ د خواست و ئارمانجێن ئــافرەتێ دا نەکەن و رێکێ بدەنێ ئەو بوارێ ئەو تێدا شارەزا پەرە پێ بدەت و ل دەف خوە پێش بێخیت. یا گرنگە بەرى هەر کەسەکى، ئــافرەتێ باوەرى ب خوە هەبیت و بەردەوام شیانێن خۆ پێشبێخیت و شارەزایێن خوە زێدە بکەت و نیشا خەلکى ژى بدەت. هەروسا بێ دودلى فەرە پشکداریێ دژیارا رەوشەنبیرى، ئابورى، جڤاکى و سیاسى…هتد دا بکەت…
22/2/2022
- دکاری هەموو بابەتێن خۆ ببینی ….
Comments are closed, but trackbacks and pingbacks are open.