(١٩)ـی ئادارێ، ساڵ ڕۆژا فەرمانا ڕاگەھاندنا شەڕی و ھێرش کرنێ بۆ سەر عێراقێ و ڕژێما بەعس و سەدامێ دیکتاتۆر ژلایێ جورج بۆشێ سەرۆکێ ویلایەتێن ئێکگرتی یێن ئەمریکاڤە لـ ساڵا (٢٠٠٣)ـێ.
بەری (١٩) ساڵا وەکی ئەڤڕۆ، لـ دەمژمێر (١٠:٢٠)ـێ بـ دەمێ ڕۆژھەڵاتی لـ شەڤا (١٩ لسەر ٢٠ / ٠٣ / ٢٠٠٣)ـێ، [جورج دەبلیوو بۆش]ـێ سەرۆکێ ویلایەتێن ئێکگرتی یێن ئەمریکا فەرمان دا بـ شەڕی و ھێرش کرنێ بۆ سەر عێراقێ، ئەوژی پشتی کو لـ ڕێکەفتی (١٧ / ٠٣ / ٢٠٠٣)ـێ جۆرج بۆشێ سەرۆکێ ئەمریکا دەرفەت دایە سەدامی و ھەردوو کوڕێن وی کو دماوێ (٤٨) دەمژمێران ـدا دەستا ژ دەستھەڵاتێ بەردەن و عێراقێ بجھ بھێلن، لێ دڕاگەھاندنەکێ ـدا حکۆمەتا عێراقێ ئەو پەیام و داخوازییا بۆشی ڕەت کرەڤە. ئەو بوو لـ سەرسپێدەھییا ڕێکەفتی (٢٠ / ٠٣ / ٢٠٠٣)ـێ باڵەفڕێن ھێزێن ئاسمانی یێن ئەمریکا ئێکەم ھێرش بۆ سەر بەغدا یا پایتەختێ عێراقێ دەستپێکرن و تێدا ھەردوو وەزارەتێن ناڤخۆ و پلاندانانێ و چەندین بنگەھێن سەربازی کرنە ئارمانج و چەندین پێگەھ بوردومان کرن کو گۆمانا ئاکنجی بوونا سەدامی و خێزانا وی تێدا دھاتە کرن.
لـ ڕێکەفتی (٢١ / ٠٣ / ٢٠٠٣)ـێ بـ فەرمی شەڕی دەستپێکر و ھێرشا زەمینی یا ھێزێن ئەمریکا دەستپێکر و ھێزێن ھەڤپەیمانان ژ کەنداوی بەرەف عێراقێ ھاتن و ژ باشوورێ عێراقێ لسەر سنوورێ کوێت ــ عێراق دەربازی ناڤ ئاخا عێراقێ بوون.
ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ
- ناڤەڕۆکا پەیاما سەرۆکێ ویلایەتێن ئێکگرتی یێن ئەمریکا [جۆرج دەبلیوو بۆش] بۆ ھێرش کرنە سەر عێراقێ…
گەلی ھەڤوەڵاتییان: ژ ڤێ دەمژێرێ ھێزێن ئەمریکی و ھێزێن ھەڤپەیمان دەست بـ قۆناغێن دەستپێکی یێن ئۆپەراسیۆنێن سەربازی کرن بۆ داماڵینا چەکێن عێراقێ، و بۆ ڕزگارکرنا گەلێ وێ، و بۆ پاراستنا جیھانێ ژ مەترسییەکا مەزن و نێزیک.
و لسەر فەرمانا من، ھێزێن ھەڤپەیمانان دەست بـ لێدانا چەندین ئارمانجێن دیارکری یێن گرنگ یێن سەربازی کر ژبۆ لاواز کرنا شیانێن سەدام حوسێنی لـ بەرھنگاری کرنا شەڕی و ئەڤە بـ تنێ قۆناغێن دەستپێکێ ـنە کو دێ بیتە ھەوەکا بەرفرەھ و چڕ.
و پتر ژ (٣٨) دەوڵەتان دێ ڕابن بـ پشتەڤانی کرنەکا گرنگ و کارا وەکی بکارئینانا بنگەھێن دەریایی و ئاسمانی، و ھاریکاری کرن بـ پێدانا پێزانینێن ھەواڵگیری و ئۆپەراسیۆنێن لۆجستی، و دگەل بەلاڤ کرنا یەکینەیێن شەڕکەر. ھەر وەڵاتەک ژ وەڵاتێن ھەڤپەیمان یێ ھاتینە ھەڵبژارتن کو بەرپرسیاریەتیێ بکەتە ستۆیێ خۆ و لـ شەرەفا خزمەت کرنێ لـ بەڕەڤانی کرنا مە یا ھەڤپشک ـدا پشکدار بیت.
بۆ ھەمی زەڵام و ئافرەتێن ناڤ ھێزێن چەکدارێن ئەمریکا یێن نوکە لـ ڕۆژھەڵاتا ناڤین ھاتینە بەڵاڤکرن دبێژم کو ئاشتییا جیھانەکا نەئارام و گەلەکێ ستەمدار و زولم لێکری پشت بـ ھەوەڤە گرێدایە، و ئەڤ باوەرییە بـ تەمامی دجھێ خۆ دایە.
و نوکە ئەو دوژمنێن دگەل پسپۆری و وێرەکییا وە ڕوی بـ ڕوی دبن، و ئەو کەسێن دھێنە ئازاد کرن دێ گیانێ شەرەفمەندی و باشییا ھێزێن چەکدارێن ئەمریکا بینن، و دڤێ ململانێ ـدا ئەمریکا دێ بەرسینگێ دوژمنەکی گریت کو ھیچ ڕێزەکێ لـ ڕێسایێن شەڕی و بنەمایێن ڕەوشتی ناگریت.
سەدام حوسێنی ھێز و کەرەستەیێن سەربازی یێن عێراقی لـ دەڤەڕێن سڤیل داناینە، و پێکۆلێ دکەت زەڵام و ئافرەت و زارۆکێن سڤیل و بێگونەھ وەک قەلغانێن مرۆڤی بکار بینیت بۆ پاراستنا ھێزێن خۆ، ئەڤەژی دوماھیک دڕنداتییا وی ـیە لـ بەرامبەری گەلێ خۆ ئەنجام ددەت.
من دڤێت گەلێ ئەمریکا و جیھانێ بزانیت کو ھێزێن ھەڤپەیمانان دێ ھەمی شیانێن خۆ مەزێخن داکو کەسێن سڤیل ژ زیانان بپارێزن. ژبەرکو ئۆپەراسیۆن لـ وەڵاتەکێ خودان سرۆشتەکێ جوگرافی یێ دژوار و بـ زەحمەت بـ تەمەتی ڕووبەرێ ویلایەتا کالیفۆرنیا دێ درێژتر و بـ زەحمەتتر بیت ژ وێ یا کو ھندەک ھزر و پێشبینیێ بۆ دکەن. ھەروەسا ھاریکارییا عێراقی یا بۆ دامەزراندنا دەوڵەتەکا ئێکگرتی و ئارام و ئازاد پێدڤی بـ پابەندبوونا مە یا بەردەوام ھەیە.
ئەم دێ ھێینە عێراقێ بـ ڕێزگرتن بۆ ھەڤوەڵاتیێن وێ و شارستانییەتا وێ یا مەزن و وان بیروباوەڕێن ئایینی یێن تێدا دھێنە پەیارەو کرن، مە ھیچ حەز و ئارەزوویەک لـ عێراقێ نینە ژبلی ھندێ کو ئەم نەھێلین و کونترۆلا دەولەتێ بۆ گەلێ وێ بزڤڕینین.
ئەز دزانم کو ئەڤ شەڤە خێزانێن ئەندامێن ھێزێن چەکدار دێ لاڤا کەن کو خۆشتڤیێن وان ئەوێن لناڤ ھێزێن چەکدار خزمەتێ دکەن بـ سەلامەتی ڤەگەڕیێنە ناڤ کەس و کارێن خۆ، و ملیۆنان ئەمریکی دێ دگەڵ ھەوە لاڤا کەن ژبۆ سەلامەتییا خۆشتڤیێن ھەوە و پاراستنا کەسێن بێگونەھ. ژبۆ قوربانیدانا ھەوە، سوپاسی و ڕێزگرتنا گەلێ ئەمریکی بۆ ھەوە. و دڤێت ھوین بزانن کو ھێزێن مە یێن چەکدار دێ بلەز ڤەگەڕیێن دەمێ ئەرک وان بـ دوماھیک دھێت.
وەڵاتێ مە بـ نەڤیان و دوودلی ـڤە دچیتە ناڤ ڤێ ململانێ، لێ ئارمانج و مەرەما مە یا ڕووھنە کو گەلێ ویلایەتێن ئێکگرتی و گەلێن دۆست و ھەڤپەیمانێن مە ناژیت لـ ژێر دلۆڤانییا ڕژێمەکا دەرکەفتی ژ یاسایێ یا کو بـ چەکێ کۆمکوژ گەفا لـ ئاشتیێ دکەت. و ئەم بـ سوپایێ خۆ، بـ ھێزێن خۆ یێن ئاسمانی و دەریایی، و بـ زێرەڤانێن کەنارێن خۆ، و بـ ھێزێن خۆ یێن پیادەیا دەریایی (مارێنز) دێ ڕێگریێ لـ وێ گەفێ کەین بۆھندێ داکو لـ داھاتی و پاشەڕۆژێ بـ ھێزێن ئاگر ڤەمراندنێ و پۆلیسا و نۆژداران لـ جادەیێن باژێڕێن خۆ ڕێگریێ لێ نەکەین.
و نوکە، پشتی ئەم چوویە ناڤ ڤێ ململانێ ـدا، تاکە ڕێک بۆ کێم کرنا وێ لسەر بکارئینانا ھێزا ئێکلاکەر دمینیت، و وە پشتڕاست دکەم کو ئەڤ ھەوا سەربازی نابیتە ھەوەکا بـ نیڤەرۆ، ژ بلی سەرکەفتنێ، ئەم بـ چ ئەنجامان ڕازی نابین.
گەلی ھەڤوەڵاتییان: دێ بسەر وان گەفان زاڵ بین ئەوێن مەترسی لسەر وەڵاتێ مە و جیھانێ، و دێ دەمێن مەترسیدار دەرباز کەین و دێ گەھینە ئاشتیێ. دێ بەڕەڤانیێ ژ ئازادییا خۆ کەین و دێ ئازافیێ بۆ یێن دی ـژی ئینین و دێ بـ سەرکەڤین.
خودێ وەڵاتێ مە و ئەوێن بەڕەڤانیێ لێدکەن بپارێزیت…
«جورج دەبلیوو بۆش»
سەرۆکێ ویلایەتێن ئێکگرتی یێن ئەمریکا
واشنتون
- دکاری هەموو بابەتێن خۆ ببینی …
Comments are closed, but trackbacks and pingbacks are open.