سەرۆك بارزانی: پێدڤیە حکومەتا عیراقێ قەرەبوویا تاوانا ئەنفالان بدەت
سەرۆك مەسعود بارزانی ئەڤرۆ رۆژا پێنجشەمبی د تویتەکیدا د سالیادا 34 سالیا ئەنفالان راگەهاند: تاوانا ئەنفالان ئێکە ژ نەمرۆڤایەترین و تاریکترین قۆناغێن دەولەتا عیراقێ د سەدا بوریدا کو ئارمانج ژێ ژناڤبرنا گەلێ کوردستانێ بوو، پێدڤیە و ئەرکێ حکومەتا ئیراقێ یە قەرەبوویا ئەڤێ تاوانا مەزن بدەت کو دژی گەلێ کوردستانێ هاتیە ئەنجامدان.
نێجیرڤان بارزانێ: دێ كاركه‌ین بو ناساندنا ئه‌نفالان وه‌ك جینوساید لسه‌ر ئاستێ جیهانێ
ئه‌ڤرۆ 14 نیسانێ نێچیرڤان بارزانى سه‌رۆكێ هه‌رێما كوردستانێ په‌یامه‌ك به‌لاڤكر و راگه‌هاند: ب رێزو ته‌قدیرڤه بیره‌وه‌ریا(182) هزار وه‌لاتیێن بێتاوان یێن كوردستانێ دێ گێرین و سه‌رێ خوه به‌رمبه‌ر گیانی پاكێ شه‌هیدان دچه‌مینین، كو ل سالا 1988 ئێك ژ درنده‌ترین تاوانه د دیروكیدا، كو ده‌ستهه‌لاتا وى ده‌مى یا ئیراقێ ئه‌نفالكرن.
ئه‌نفالێ كۆ ب هه‌شت قۆناغان هه‌ژماره‌كا زۆر یا ده‌ڤه‌رێن كوردستانێ ڤه‌گرت، تا هه‌تا په‌له‌یه‌كا ره‌شه ب ناڤ چاڤێن دیرۆكێ و ئه‌نجامده‌رێن وی و به‌رپرسیاره‌تیا هه‌موو مرۆڤایه‌تیێ یه كۆ چ جاران رێكێ نه‌ده‌ت تاوانه‌كا وه‌كى وێ ل سه‌ر ئه‌ردى دوباره ببیت.
دده‌مه‌كى دا كۆ هه‌رێما كوردستانێ ب ره‌وشه‌كا هه‌ستیار دا ده‌ربازدبیت، باشترین یاد بۆ بلندراگرتنا بیره‌وه‌رییا شه‌هیدێن ئه‌نفالێ و هه‌موو شه‌هیدێن كوردستانێ ئاشتى و پێكڤه ژیان و ئێكرێزییا لایه‌نێن كوردستانى و پێكهاتێن وێ یه پێناڤى مسۆگه‌ركرن و پاراستنا مافێن ده‌ستوورى و پاشه‌رۆژا هه‌رێما كوردستانێ.
دده‌مه‌كى دا دادگه‌ها بلند یا تاوانان یا عیراقێ ئه‌نفال ب جینۆساید و تاوان ل دژى مرۆڤایه‌تیێ دایه ناساندن، دڤێ بیره‌وه‌رییێ دا داخوازدكه‌ین و دۆپات دكه‌ین كۆ حكومه‌تا فیدرالى یا عیراقێ ل به‌رامبه‌ر ئه‌ركه‌كێ یاسایى و ئه‌خلاقى و مرۆڤى دایه بۆ قه‌ره‌بووكرنا كه‌سوكارێن ئه‌نفالكرییان دا هنده‌ك ژ برینێن وان سارێژ ببن.
ل هه‌رێما كوردستانێ ژى هه‌ر چ د شیان دا بیت بۆ خزمه‌تا بتر یا خانه‌وادێن ئه‌نفالكریان بهێته‌كرن و بزاڤ بۆ ئاڤه‌دانكرنا ده‌ڤه‌رێن وان و ڤه‌گه‌راندنا رۆفاتێن شه‌هیدان به‌رده‌وام بن. هه‌روه‌سا ل سه‌ر ئاستێ ناڤده‌وله‌تى ژى دێ ل سه‌ر بزاڤێن خۆه به‌رده‌وام بین بۆ ناساندنا ئه‌نفالێ وه‌ك جینۆساید.
سلاڤ ل گیانێ پاك یێ شه‌هیدان.
نێچيرڤان بارزانى
سه‌رۆكێ هه‌رێما كوردستانێ
مه‌سرور بارزانی: دڤێت حكومه‌تا عیراقێ ب به‌رپرساتیا خۆ رابیت به‌رامبه‌ر قوربانیێن ئه‌نفالان
ل بیره‌وه‌ریا 34 سالیا شالاوا ئه‌نفالان سه‌روكێ حكومه‌تا هه‌رێما كوردستانێ په‌یامه‌ك به‌لاڤكر و راگه‌هاند، د 34 سالیا بیره‌وه‌ریا هه‌وا جینوسایدا ئه‌نفالێدا، ب رێزڤه بیره‌وه‌ریا شه‌هیدێن وێ تاوانا درنده یا رژێما به‌عس یا عیراقێ ساخ دكه‌ین، و هه‌مى ده‌مان دێ ل بیرامه‌بن.
سه‌ره‌راى وێ یه‌كێ كۆ ئه‌نجامده‌رێن وێ تاوانا مه‌زن و سیاسه‌تا نه‌ژاد په‌رست، ب سزایێ خوه گه‌هشتن، لێ پێدڤیه بزاڤێن مه بۆ زێده‌تر دانه نیاسینا هه‌وا جینۆسایدا ئه‌نفالێ و شه‌رمزاركرنا ئه‌نجامده‌ران و رێگریكرنێ ل دووباره‌بوونا وێ تاوانا دژى گه‌لێ كورد یان هه‌ر گه‌له‌كێ دى ل جیهانێ دبه‌رده‌وامبن. نابیت جاره‌كادى ئه‌ڤ كۆم كۆژییه و وێرانكارییه ل كوردستانێ ب هه‌ر ناڤه‌ك یان بیانویه‌كێ بیت بهێته دوباره‌كرن.
دڤێ بیره‌وه‌ریا خه‌مگیندا، جاره‌كادى دووپات دكه‌ین پێدڤیه حكومه‌تا عیراقێ، ل گوره‌ى ده‌ستورى ئه‌رك و به‌رپرسیاره‌تیا خوه د قه‌ره‌بووكرنا كه‌سوكارێن شه‌هیدان و قوربانیێن زیانڤێكه‌فتى یێن هه‌وا ئه‌نفالێ و هه‌موو تاوانێن شه‌رى و وان كۆم كۆژیێن به‌رامبه‌ر خه‌لكێ كوردستانێ هاتینه كرن، بجهبینیت.
ئاشكه‌رایه كۆ ب ئه‌گه‌رێ وان تاوانان، خه‌لك و خاكێ كوردستانێ رووبرووی سیاسه‌تا قركرن و تالانكرنێ و وێرانكرنێ بوویه، ژبه‌ر ڤێ یه‌كێ نابیت ئێدى بابه‌‌تێ قه‌ره‌بووكرنا قوربانیێن ده‌ستێ رژێما پێشتر یا عیراقی بهێته فه‌رامۆش كرن.
حكومه‌تا هه‌رێما كوردستانێ، هه‌رده‌م خۆه ب قه‌ردارێ كه‌سوكارێن شه‌هید و ئه‌نفالكریێن كوردستانێ دزانیت و هه‌موو بزاڤان دكه‌ت كۆ خزمه‌ته‌كا باشتر پێشكێشى وان بكه‌ت و ل دویڤ شیانێن خۆه برینێن وان سارێژ بكه‌ت.
سلاڤ ل گیانێ پاك یێ شه‌هیدێن شالاوێن ئه‌نفالێ و گشت شه‌هیدێن كوردستانێ
مه‌سرور بارزانى
سه‌رۆكێ حكومه‌تا هه‌رێما كوردستانێ
Comments are closed, but trackbacks and pingbacks are open.