پێله‌كا توزبارینێ یا بهێز ئه‌ڤرۆ چه‌ندین پارێزگه‌هێن عیراقێ ڤه‌گرتینه و نێزیكى 800 كه‌سان ل پارێزگه‌هێن ئه‌نبار و نه‌جه‌ف ره‌وانه‌ى نه‌خۆشخانان هاتینه كرن.
ژێده‌ره‌كى ژ رێڤه‌به‌رییا پۆلیسێن پارێزگه‌ها ئه‌نبار راگه‌هاند، پێله‌كا توزبارینێ ب سه‌ر وێ پارێزگه‌هێ دا هاتییه كۆ بوویه ئه‌گه‌ر مه‌ودایێ دیتنێ گه‌له‌ك كێم ببیت. ژبه‌ر وێ یه‌كێ، هێزێن ئه‌منى ل وێ پارێزگه‌هێ كه‌فتینه د حاله‌تێ ئاماده‌باشییێ دا ژبۆ رووبرووبوونا هێرشێن تیرۆرستى یێن چاڤه‌رێكرى.
وى ژێده‌رى دیار ژى كرییه، دگه‌ل هه‌بوونا پێلێن توزبارینێ، ده‌ڤه‌رێن دویر و بیابانى دبنه ئارمانجێن هێرشێن تیرۆرستى. ژبه‌ر وێ یه‌كێ پلانێن ئه‌منى یێن تۆند بو رووبرووبوونا وان دهێنه دانان.
قایمقامێ قه‌زا راوه ل ئه‌نبار دیار كرییه، وان پلانه‌كا ئه‌منى هه‌یه كۆ هه‌ر دوو حه‌فتییان جاره‌كێ ل دویڤ ره‌وشا ده‌ڤه‌رێ دهێته گۆهورین، دگه‌ل ده‌ستپێكرنا پێلێن توزبارینێ ژى ب رێیا كامیران چاڤدێرى ل ده‌ڤه‌رێ دهێته‌كرن و یه‌كه‌یێن له‌شكه‌رى یێن تایبه‌ت چاڤدێرییا ره‌وشا ده‌ڤه‌رێن بیابانى دكه‌ن.
Comments are closed, but trackbacks and pingbacks are open.