ل گۆره‌ی بریاره‌كا وه‌زاره‌تا شاره‌وانی و گه‌شت و گۆزار یا حۆكمه‌تا هه‌رێما كوردستانێ كو بۆ هه‌موو دام و ده‌زگه‌هێن سه‌ر ب وێ‌ڤه ره‌وانه‌كرینه، ئه‌و ده‌ینێن باژێرڤانیان ل سه‌ر هاوولاتیان هه‌ین، وه‌كو موستاحه و كرێ، و كریێن خوه هه‌تا نوكه نه‌داین، پێدڤیه بهێنه دان.
ئه‌ندازیار دیار به‌حری، رێڤه‌به‌رێ گشتێ باژێرڤانیان دیار كر كو هژماره‌كا هاوولاتیان هه‌یه ژ به‌ر تێكچوونا ره‌وشا دارایی، چه‌ند ساله‌كا كرێن خوه یێن موساته‌حا و دوكانا نه‌داینه و ئه‌ڤه ژی بوویه ئه‌گه‌ر كو پاره‌كێ مه‌زن ببیته ده‌ین ل سه‌ر وان و نه‌شیاینه بده‌ن، له‌وما وه‌زاره‌تا شاره‌وانی هزر د ده‌ركرنا ڤێ بریارێ دا كر كو ب شێوه‌یێ قست هه‌موو پاره و ده‌ین ژ وان بهێته وه‌رگرتن یان ژی ئه‌گه‌ر كرێدای بشێن هه‌موو ده‌ینی پێكڤه بده‌ن، دێ ب رێژه‌یا 15% لێ بوورن.
خویاژی كر كو هنده‌ك ژ ئه‌گه‌رێ شه‌رێ داعش و كورونایێ و قه‌یرانا دارایی و هنده‌ك ژی ژ ئه‌گه‌رێ كێمته‌رخه‌میێ ده‌ینێن خوه یێن چه‌ند سالا نه‌داینه و ژ به‌ر هندێ ئه‌ڤ بریاره هاتیه ده‌ركرن وه‌كو بارسڤكیه‌ك بۆ وان هاوولاتیێن ده‌یندارێن باژێرڤانیان.
ئه‌ندازیار دیار ئاشكرا ژی كر، ئه‌ڤه دێ بیته پالده‌ره‌ك كو داهاتێ حۆكمه‌تێ زێده‌ببیت، زێده‌باری هندێ ژی دێ بیته فاكته‌ره‌ك بۆ هندێ زێده‌تر پرۆژه‌یێن حزمه‌تگۆزاری بهێنه ئه‌نجامدان، چونكو 15% ژ داهاتێ باژێرڤانیان بۆ وێ باژێرڤانیێ دمینن بۆ ئه‌نجامدانا پرۆژه‌یان.
ئه‌و یه‌ك ژی دیار كر كو ئه‌و ده‌ستهه‌لات یا بۆ مه هاتیه دان و هاوولاتی دێ داخواز كه‌ت كا ئه‌و پاره ب شێوه‌یێ قست بده‌ت یان ژی هه‌میێ پێكڤه بده‌ت و لێبوورنا سه‌دێ 15 ژیَ بگریت و گۆت ژی: هنده‌ك باژێرڤانی هه‌نه زێَده‌تری 600 ملیون دیناران ده‌ین ل ده‌ڤ هاوولاتیان هه‌نه و هنده‌ك ژی كێمتر، ل دووڤ سنوورێ باژێرڤانیێ دمینیت.
رێڤه‌به‌رێ گشتیێ باژێرڤانیان ئه‌و یه‌ك ژی ئاشكرا كر كو بریاره‌كا دی یا نوو ژی ده‌رچوویه، ه‌ئو ژی ئه‌گه‌ر باژێرڤانیه‌كێ پارچه ئه‌ردێن نایاب و روكن هه‌بن و بهێنه فرۆتن، مافێ فرۆتنێ پێ هاتیه دان، بۆ هندێ پارێ وان پارچه ئه‌ردان پرۆژه‌یێن خزمه‌تگۆزاری ل سنوورێ وێ باژێرڤانیێ هێنه ئه‌نجامدان.
زێده‌تر دبێژیت: نوكه مه كار ل سه‌ر وان پارچه ئه‌ردان كریه و مه پلانێن خوه به‌رهه‌ڤكرینه و رازه‌مه‌ندی و رێنمایی ژ وه‌زاره‌تێ ده‌رچووینه و نوكه د قوناغێن په‌سه‌ندكرنێ دانه و هژماره‌كا زۆر یا پارچه ئه‌ردانه و دێ هێنه راگه‌هاندن و د سه‌رئێكزێده‌كرنێن ئاشكرا دا دێ هێنه فرۆتن.
Comments are closed, but trackbacks and pingbacks are open.