بەرێ بنیاتی بۆ مەزنترین پرۆژێ گەشتیاری ل زاخۆ ھاتە دانان

ب گۆژمێ، 11 ملیار و 500 ملیون دیناران، بەرێ بنیاتێ بۆ ئێک ژ مەزنترین پرۆژێن گەشتیارییێ حکومەتا هەرێما کوردستانێ ل سنۆرێ ئیدارا سەربەخۆ یا زاخۆ هاتە دانان.

ئیدارا سەربەخۆ یا زاخۆ راگەھاند، ئەڤرۆ ڕێکەڤتی 28 ی خزیرانا 2022، ب ئامادەبوونا دکتۆر هێمن هەورامی جێگرێ سەرۆکا پەرلەمانێ کوردستانێ و دکتۆر محمد شوکری سەرۆکێ دەستەیا وەبەرهێنانێ ل حکومەتا هەرێما کوردستانێ و عەلی عەونی بەرپرسێ لقێ 8 پارتی و لژێر چاڤدێرییا گوهدار شێخۆ سەرپەرشتێ ئیدارا سەربەخۆ یا زاخۆ، بەرێ بنیاتێ ئێک ژ مەزنترین پرۆژێ گەشتییارییێ حکومەتا هەرێما کوردستانێ ل زاخۆ هاتە دانان.

ئاماژە کریە، گوھدار شێخۆ د پەیڤا خوەدا دیارکر، دانانا بەرێ بنیاتێ پرۆژێ پارکا دەلال یا گەشتیاری، وێ چەندێ دگەهینیت کو جەنابێ مسرور بارزانی گەلەک ڕژد و پەراشبوویە ژ بۆ هندێ ئێدی سێکتەرێ گەشتوگوزارێ گرنگییەکا تایبەت پێ بهێتە دان.

گوھدار شێخو سەرپەرشتێ ئیدارا زاخۆ گوت:”لدەمێ دەستبکاربوونا مە ل ئیدارا سەربەخۆ یا زاخۆ، هەر ژ دەستپێکێ د گەل لایەنێن پەیوەندیداردا مە هەول دان پلانەکا ستراتیژی داڕێژین هەتا کو بکارین پتر خزمەتا باژارێ خوە بکین و سیمایێ وێ جوانتر بکین و خزمەتگوزاریێن باشتر پێشکێشی خەلکێ خوشتڤی بکەین و سوپاس ژ بۆ خودێ گەلەک ژ پلانا مە کەڤتینە د کاریدا.”

سەرپەرشتێ ئیدارا زاخۆ ئاماژەکر،” بێ گۆمان درۆستکرنا پارکەکا بڤی رەنگی لسەر هەردوو ئالییێن خابیرێ زاخۆ ل نێزیک پرا دەلال، دێ دیمەنەکێ جوان و دلڤەکەر دتە زاخۆ، ئەڤ پرۆژە ب درێژاهییا نێزیکی(2000) مەتران و ڕۆبەرێ (56) هزار مەترێن دووجار و ب گۆژمێ، 11 ملیار و 500 ملیون دیناران لسەر ئەرکێ حکومەتا هەرێما کوردستانێ و و ژ ئالیێ کۆمپانییا ( مێسین ئینشائات ) ڤە دێ هێتە بجھئینان.”