هەرێما كوردستانێ.. ڕۆژانە ئاستێ بەنداڤا دوكان سێ سەنتیمەتران و دەربەندیخان پێنج سەنتیمەتران كێم دبن
ڕێڤەبەرێن هەردوو بەنداڤێن دوكان و دەربەندیخان ئامارێن نووی دەربارێ ئاستێ ئاڤێ دهەردوو بەنداڤاندا ئاشكرا كرن و ڕاگەهاند، ڕۆژانە ئاستێ ئاڤێ د سكرێ دوكاندا سێ سەنتیمەتران كێم دكەت و ل بەنداڤا دەربەندیخان ژی پێنج سەنتیمەتران.
كۆچەر جەمال، ڕێڤەبەرێ بەنداڤا دوكان ڕاگەهاند، بۆ ئەڤ ساڵە ئەوان هیچ گرفتەك نینە د دابینكرنا ئاڤا ڤەخوارنێدا بۆ پارێزگەها سلێمانیێ، بەلێ ڕۆژانە ئاستێ سكرێ دوكان سێ سەنتیمەتران كێم دكەت و نوكە ڕێژەیا ئاڤا سكری 41% یە.
ژلایێ خۆڤە سامان ئیسماعیل، ڕێڤەبەرێ بەنداڤا دەربەندیخان ئاشكرا كر، ژئەگەرێ بەردانا ئاڤێ، ڕۆژانە ئاستێ بەنداڤێ پێنج سەنتیمەتران كێم دبیت، و نوكە ڕێژەیا ئاڤا عمباركری بۆ 40% داكەفتییە.
بەنداڤا دوكان ل ساڵا 1959 ژلایێ كۆمپانیەكا بریتانی ڤە وەكو ئێكەم بەنداڤ ل عیراقێ هاتبوو دورستكرن و حەفت ملیار مەترێن سێجا یێن ئاڤێ عمبار دكەت، نوكە و ژئەگەرێ هشكەساڵیێ تنێ دوو ملیار و 850 ملیۆن مەتر سێجا یێن ئاڤێ تێدا ماینە.
بەنداڤا دەربەندیخان ژی ل ساڵا 1961 ژلایێ كۆمپانیەكا ئەمریكی ڤە هاتییە دورستكرن و نێزیكی سێ ملیار مەترێن سێجا ئاڤێ عمبار دكەت، نوكە تنێ ملیارەك و 163 ملیۆن مەترێن سێجا یێن ئاڤێ تێدا ماینە.
Comments are closed, but trackbacks and pingbacks are open.