شەیما مستەفا
دامەزراندنا پارتی دیموکراتی کوردستان سالا ١٩٤٦ێ ئێک ژوان پێتڤیێن مللەتێ کوردبوویە ئەڤی سەردەمی، ژبەرکو بەریا دامەزراندنا پارتی زێدەتر بزاڤێن جڤاکی و سیاسی یێن سنوردار دھاتنە دامەزراندن و پارتەکا سەرتاسەری نەبو ھەتا خەباتێ بۆ بدەستڤە ئینانا مافێن گەلێ کورد بکەت، بەلێ پشتی سەرھەلدان و شۆڕەشێن بارزان ھزر ھاتەکرن ئەو شۆڕەش و بزاڤێن ھەی ل بارزان ب رێیا پڕۆژەیەکێ سیاسی ببنە بزاڤەکا سەرتاسەریا رێکخستی ئەوبو ١٦ی تەباخا سالا ١٩٤٦ێ پارتی دیموکراتی کوردستان ب سەرۆکایەتیا بارزانی نەمر ھاتە دامەزراندن، ھەر دەستپێکێ خەڵکەکێ سیاسیێ کورد پەیوەندی ب رێزێن پارتی کرو دەمەکێ کێمدا بۆ ئێک پارتێن مەزن یێن عێراقێ و کوردستانێ، پارتی وەک حزبەکا جەماوەریا سیاسی دەست ب خەباتا خۆیا سیاسی کر و ژبلی کوردان ھەموو پێک ھاتێن عێراقی کەفتن ناڤا رێزێن پارتی دیموکراتی کوردستان، راستە بەری پارتی ژی حزب ھەبوون، بەلێ ئەو پێگەھێ پارتی ھەی ھیچ لایەنەکێ سیاسی یێ عێراقی و کوردستانی نەبو ١٦ی تەباخێ وەرچەرخانەکا دیرۆکی یە بۆ دەستپێکرنا خەباتەکا دۆم درێژ.
ھەگەر ئەم ڤەگەڕین دیرۆکا پارتی رۆلێ پارتی ل پێشخستنا جڤاکێ کوردستانی ناھێتە ژبیرکرن، چونکە ژبلی بزاڤێن سیاسی و خەباتا جەماوەری پارتی د ھەموو بیاڤێن ژیانێ دا شیایە خزمەتەکا بەرچاف پێشکەشی خەلکێ کوردستانێ بکەت، دەرکرنا رۆژنامەو گۆڤارێن فەرمیی و چالاکیێن رەوشنبیری و بزاڤێن مەدەنی رۆلەک سەرەکی ھەبوویە لسەردەمێ خوە، ئێک ژ ئارمانجێن پارتی پێگەھاندنێ تاکێ کورد بوویە ب رێیا رێکخراوێن جەماوەری و دامەزراندنا چەندین کۆمەلە و رێکخراوێن سڤیل.
سەرەڕای ئەڤان ئاستەنگ و دژایەتیێن ھەمبەر پارتی ژلایێ دەستھەلاتدارێن عێراقێ، پارتی شیایە رابەرایەتیا دو شۆڕەشێن مەزن بکەت ئەوژی شۆڕەشا ئەیلوولا مەزن و شۆڕەشا گوڵانێ بوو، بتایبەتی شۆڕەشا ئەیلوولێ، ژبەرکو بۆ جارا ئێکێ بو، شۆڕەشەکا سەرتاسەری ل باشوورێ کوردستانێ بھێتە سازکرن و ھەموو تەخ و پێک ھاتە پشکداریێ تێدا بکەن، ددەمێ چواردە سالێن شۆڕەشێ ب چەکێن زۆر سادەیێن ئەڤی سەردەمی کورد شیایە مەزنترین گورز ل رژێمێن وی سەردەمیێن عێراقێ بدەت، ھەتا گەھشتیە رادەیەکی ژبەر ئەڤێ ھێزا مەزن یا شۆڕەشێ چەندین جاران دوژمنی داخوازا دانوستانان ل سەرکردایەتیا شۆڕەشێ کریە، پارتی ب درێژاھیا ٧٦ سالێن تەمەنێ خوە قۆناغ ب قۆناغ کار بۆ بدەستڤە ئینانا مافێن رەوایێن گەلێ کوردستانێ ب ھەموو پێک ھاتێن ئاینی و نەتەوەیی کریە، ئەڤەژی بۆیە ئەگەرێ مانا پارتی دیموکراتی کوردستان وەک ھێزەکا مەزن ل عێراق و کوردستانێ، پیرۆزبیت ١٦ی تەباخێ سالڤەگەڕا پارتی، نەمری بۆ شەھیدێن رێکا ئازادیێ سەروەروێ وان بارزانیێ نەمر و ئیدریسێ جوانەمەرگ.
Comments are closed, but trackbacks and pingbacks are open.