غیاس خالد زێباری
پشتی پارتی دیموکراتی کوردستان بریار دای کۆنگرێ چاردێ لڤان نێزیکان ئەنجام بدەت و دەست ب ئامادەکاریێن هەلبژاتنا نوونەرێن کۆنگرێ کری و ل لیژنێن ناوچا دەرگەهێ خۆ کاندیدکرنێ هاتینە ڤەرکرن، راستە لدیڤ پەیڕەوێ ناڤخۆیی مافێ هەر ئەندامەکێ پارتی یە دەنگی بدەت و خۆ کاندید بکەت، لێ دەستپێکا پرۆسێ ئەز ب نەرێنی و مەترسی لسەر پارتی دبینم ، چونکی هێشتا بەشەکێ زۆرێ جڤاکێ کوردستانێ ب گشتی و ئەندامێن پارتی کۆ بەشەکێ ڤی جڤاکی نە، نەگەهشتینە وی ئاستی کۆ ڕامان و ئەرکێن کۆنگرێ بزانن ..! ژمارەکا زۆرا کادر و ئەندامێن پارتی ب هەڕەمەکی هاتینە دناڤ پرۆسێ دا و خۆ کاندید کریە، بێ لبەرچاڤگرتنا لایەنێ شیانا و ئاستێ رەوشەنبیری و دلسۆزیێ و دێرینیێ، یێن د بازنێ پارتایەتیێ دەردکەڤن بۆ بازنێ عەشیرەتگەریێ و ئۆچاخیێ و ماڵباتیێ، ژبلی ڤێ چەندێ دووبەرەکی و هەڤڕکیێن نەشرین دناڤ ئۆرگانێن پارتی و جەماوەرێ وێدا دێ سەرهەلدەن .
ئەگەر ڕەوش بڤی ڕەنگی یا بەردەوام بیت، دبیت ل داهاتی ئاستەنگ و دووبەرەکیێن زێدەتر دناڤ جەماوەری و رێزێن پارتی دیموکراتی کوردستان دا زێدە ببن و مەترسیێ لسەر داهاتی هەبیت .
لەوما ئەرکێ کۆنگرێ چاردێ یێ پارتی یە ب درستی لسەر ڤان ئاریشا ڕاوەستیت و ل بنەڕەت دا چارەسەر بکەت ، ئەگەر نە ل کۆنفرانسێن ناڤخۆیی بۆ ئۆرگانێن پارتی و نوونەرێن کۆنگرێن داهاتی دا کادر و کەسێن رەوشەنبیر و خودان شیان و هزر و خزمەت، عەشیرەت و ئوجاخ و کەسایەتیێن جڤاکی ل پشت نەبیت، نەشێن خۆ کاندید بکەن و گۆڕەپان دێ بۆ کەسێن نە شاڕەزا ل پارتایەتیێ و کار و بارێن کۆنگرێ هێتە چۆلکرن و ئۆرگانێن پارتی دێ کەڤنە د دەستێن وان نەشاڕەزایان دا . ئەڤە ژی ژ ئەنجامێ نەبوونا هشیاریا پارتایەتی و جڤاکی یە، رێکا چارەسەریا ڤێ چەندێ ژی گرنگیدانا پارتی یە ب گەشەپێدانا مرۆڤی و نەچارکرنا کادر و ئەندامێن پارتی د خۆلێن گەشەپێدانا مرۆڤی ب بەردەوامی و ل پەیڕەوێ ناڤخۆیی بهێتە چەسپاندن ، و مەکتەبەک ل مەکتەب سیاسی بناڤێ گەشەپێدانا مرۆڤی بهێتە ڤەکرن و راهێنەرێن شاڕەزا بهێنە دابینکرن و هەر کەسێ دەرچۆیێن ڤان خۆلا نەبیت مافێ خۆ کاندیدکرنێ بۆ ئەندامەتیا کۆنگرێ و ئۆرگانێن پارتی نە بیت .
ڕەنگە ئەڤ بێ سەرۆبەریا هەی هەمی گۆنەها ئەندام و کادرێن ئۆرگاێن خوارێ یێن پارتی نە بیت، چونکێ وەکی پێتڤی لسەر ستراتیژیەت و پرۆگڕام و پەیڕەوێ ناڤخۆیی و ڕێبازا پیرۆزا بارزانی نەهاتینە تێگەهاندن و پێگەهاندن و گرنگی پێ نەهاتیە دان، چونکێ زۆر جاران درێکا پەیوەندیێن تایبەت یێن کەسایەتیێن جڤاکی داخازی و پێتڤیێن خەلکی هاتینە بجهئینان نەک درێکا ئۆرگانێن خوارێ یێن پارتی .
هەر وەسا گرنگە پارتی وەکی دەستهەڵاتدارا سەرەکی ل هەرێما کوردستانێ پرسا گەشەپێدانا مرۆڤی بکەتە بەشەک ل کارناما حکومەتا هەرێما کوردستانێ و وەکی پێتڤیەکا جڤاکی و مرۆڤایەتیا فەر ببینیت و گرنگیێ پێ بدەت ، چونکی سەردەم سەردەمێ گەشەپێدانا مرۆڤی یە و سازیێن نیڤدەولەتی و وەڵاتێن پێشکەفتی گرنگیەکا باش پێ ددەن و میزانیەکا زۆر بۆ تەرخان دکەن و بەرنامێن گەشەپێدانا مرۆڤی ئێکە ژ فاکتەرێن سەقامگیریا جڤاکی و پێشکەفتنێ .
لەوما ب ئەرکێ کۆنگرێ چاردێ یێ پارتی دزانین ڤێ مەترسیێ ل پێشیا پاشەرۆژا پارتی لابدەت و رێکێ ل تەشەنەکرنێ بگریت .
Comments are closed, but trackbacks and pingbacks are open.