ساخله‌می:
پتریا خه‌لكی ده‌رمانێن ئێشكێمكرنێ دخوون ده‌مێ سه‌رێ وان د ئێشیت، ئه‌و هزر دكه‌ن ئه‌و چاره‌سه‌ریا ئێكانه یا نه‌هێلانا ئێشانا سه‌ری یه.
به‌لێ ئه‌و چاره‌سه‌ریا نموونه نینه، چونكو دگه‌ل خوارنا وان ده‌رمانان هنده‌ك زیان ژی ل له‌شێ مرۆڤی دبن، له‌ورا باشتره مرۆڤ هزر ل رێكێن سروشتی بكه‌ت بو نه‌هێلانا ئێشانا سه‌ری، وه‌كو ڤه‌خوارنا كوپه‌كێ چایا كركه‌مێ یان هلكێشانا بێهنا زه‌یتێن سروشتی كو گه‌له‌ك جاران مرۆڤی ئارام دكه‌ن.
هه‌روه‌سا كۆمه‌كا خوارنان ژی هه‌نه، ڤه‌كولینان دیاركریه كو د كاریگه‌رن بو كێمكرن و نه‌هێلانا سه‌رئێشانێ ژوانژی:
1- نیڤشك: تشتێ زانا ل ده‌ڤ خه‌لكی ئه‌وه كو نیڤشك یێ باشه بو ساخله‌میا رووڤیكان، به‌لێ گه‌له‌ك كه‌س نزانن كو چاره‌سه‌ریا ئێشانا سه‌ری دكه‌ت، دبیت سه‌رئێشان ژ ئه‌نجامێ كێمیا كالسیومی بیت د له‌شی دا، له‌ورا خوارنا نیڤشكی كو یێ پره ژ كالسیومی دێ هاریكاربیت بو كێمكرنا سه‌رئێشانێ، دێ هێشتا باشتر بیت تو كاوچكه‌كێ هنگڤینی یان فێقێی نوو و گه‌هشتی لسه‌ر زێده‌بكه‌ی بو زێده‌كرنا هێزا له‌شی، هه‌روه‌سا دشیاندایه كوپه‌كێ شیری ڤه‌خووی بو وه‌رگرتنا پێدڤیا خوه ژ كالسیومی.
2- موز: مه‌گنسیوم ئێك ژ گرنگترین ژێده‌رێن خوارنێ یه كو رۆله‌كێ مه‌زن دگێریت بو كێمكرنا ئێشانێن سه‌ری، دشیاندایه مه‌گنسیومی ب ده‌ست خوه‌بینی ب رێیا هنده‌ك خوارنان و یا ژ هه‌میان ژی باشتر موزه، چونكو موز ژ رێژه‌كا مه‌زن یا مه‌گنسیومی پێك دهێت و گه‌له‌ك ڤیتامین و كانزایێن گرنگ بو له‌شی دناڤدا هه‌نه.
3- چه‌ره‌زات: دشیاندایه پێدڤیا خوه ژ مه‌گنسیومی وه‌ربگری ب رێیا هنده‌ك چه‌ره‌زاتان و ب تایبه‌ت وه‌كو ( كاجو، كاكلێن باهیڤان، گویز و بنده‌قان)، دێ باشتربیت تێكه‌له‌كێ چه‌ره‌زاتان بخووی بو كێمكرنا ئێشانێن سه‌ری و وه‌رگرتنا مفایێن ساخله‌میێ.
4- شكولاتێن تاری: ده‌مێ ژ ئه‌نجامێ نه‌ئارامیێ تووشی ئێشانا سه‌ری دبی، دێ باشتر بیت پارچه‌كا شكولاتێن تاری بخووی، دشیاندایه ئالوزیا ته كێم بكه‌ت و سه‌رئێشانێ نه‌هێلیت، هه‌موو شكولات ب ڤی كاری رادبن، به‌لێ یێن تاری زیانێن وان كێمترن.
5- شتی: د هنده‌ك ده‌مان دا، ئه‌گه‌رێ ئێشانا سه‌ری هشكبوونه، ل وی ده‌می شیره‌تان ل ته دكه‌ین گه‌له ئاڤێ ڤه‌خوو و شتر بخوون، چونكو ئه‌و فێقیه‌كێ هاڤینێ یێ سڤكه و 92% ژێ ئاڤه، هه‌روه‌سا تاما شتی ژی هێزێ زێده‌دكه‌ت و هه‌ستكرنێ ب وه‌ستیانێ كێم دكه‌ت.
6- ئه‌ڤوكادو: ئه‌و رونێن ساخله‌م یێن دناڤ ئه‌ڤوكادوی دا هه‌ین، مفایه‌كێ مه‌زن بو چاره‌سه‌ریا گه‌له‌ك نه‌خوشیان هه‌یه و ژوانژی نه‌هه‌ڤسه‌نگیا هورمونی كو گه‌له‌ك جاران دبیته ئه‌گه‌رێ هه‌ودانان و سه‌رئێشانێ، له‌ورا یا باشتره ئه‌ڤوكادو ل سه‌ر سیسته‌مێ ته یێ خوارنێ بهێته زێده‌كرن ب تایبه‌ت هه‌كه سه‌رێ ته دئێشیت و ب تایبه‌ت ژی ل ده‌ڤ وان ژنان یێن سه‌رێ وان ل ده‌مێ عاده‌یا هه‌یڤانه دا دئێشیت.
7- قه‌هوه: ڤه‌خوارنا فنجانه‌كێ قه‌هوێ هاریكاره كو مرۆڤ هه‌ست ب هشیاربوونێ بكه‌ت، هه‌روه‌سا قه‌هوه هاریكاره بو كیمكرنا ئێشانا سه‌ری ژ ئه‌نجامێ باشكرنا پالدانا خوینێ بو مه‌ژیێ مرۆڤی.
8- زه‌رزه‌وات: ژێده‌ره‌كێ گه‌له‌ك باش یێن مه‌گنسیومی نه، له‌ورا هه‌كه سه‌رێ ته ئێشا زه‌رزه‌واتێن به‌لگ بخوو، ژ گرنگترین جورێن وانژی: سپیناخ، به‌قده‌نوس و به‌قلی و كه‌له‌می.
Comments are closed, but trackbacks and pingbacks are open.