ئەڤرۆ ل سەلاحەددین سەرۆك مەسعود بارزانی پێشوازی ل كلاوس شترایشەر، کونسۆلێ گشتی یێ ئەلمانیا ل هەولێرێ كر.
د دیدارێ دا رەوشا سیاسی یا دەڤەرێ ب گشتی و یا عیراقێ ب تایبەتی هاتنە گۆتوبێژكرن و هەردوولا تیشك ئێخستە سەر پەیوەندییێن هەرێمێ و بەغدا و بەرنامێ كارێ حكومەتا نوی یا عیراقێ. دۆپاتی ژی ل بجهئینانا رێكەفتنناما دناڤبەرا حكومەتا فیدرالی و حكومەتا هەرێما كوردستانێ دەربارەی شنگالێ هاتەكرن ژبۆ ڤەگەراندنا ئێمناهییێ بۆ دەڤەرێ و دوماهی ئینانێ ب رەوشا ئاوەرەیی یا خەلكێ شنگالێ و ڤەگەریانا وان بۆ زێدێ باب و باپیرێن وان.
گەفێن تیرۆرێ، تەوەرەكێ دی یێ كۆمبوونێ بوون و كونسۆلێ ئەلمانیا ل هەولێرێ دۆپاتكر وەلاتێ وی د شەرێ تیرۆرێ دا دێ وەك هەڤپشك و پشتەڤانێ هەرێما كوردستانێ و عیراقێ مینیت و ئێمناهی و پێشكەفتنا هەرێما كوردستانێ بۆ ئەلمانییا بایەخەكێ تایبەت هەیە.
ژلایێ خۆ ژی ڤە سەرۆك بارزانی سۆپاسییا حكومەت و گەلێ ئەلمانیا كر ژ بۆ هاریكارییا گەلێ كوردستانێ د شەرێ تیرۆرێ دا و پەیوەندییێن گەلێ كورد و گەلێ ئەلمانیا ب دیرۆكی وەسف كرن.
Comments are closed, but trackbacks and pingbacks are open.