بۆ چەندین ساڵان زانستێ پزیشکی دوێ باوەرێ دابوو کۆ ئەگەر ئافرەت بدووگیان کەفت دژییەکێ درەنگدا (نەخاسمە پشتی ٣٥ ساڵیێ) دێ بیتە ئەگەرێ زێدەبوونا ڕێژەیا ژدایکبوونا بەری وەخت وژدایکبوونا زارۆکێ کێم سەنگ ژلایێ لەشی ڤە، وئەڤەژی ڕێژا نەساخیێن زکماکی زێدەدکەت وەک کونبوونا دلی ونەساخیێن دەماری وئاریشێن کڕوموسومی (زارۆکێن مەنغولی وەک نموونە)!
دویڤچوونەک هاتە ئەنجامدان ل وەڵاتێ فینلەندا لسەر پتر ژ ١٢ هزار زارۆکێن ژدایکبووی دناڤبەرا ساڵێن ١٩٨٧-٢٠٠٠ێ ولدیڤ ژییێ دایکێ هاتنە دابەشکرن وتێدا ئاشکرابوو کۆ هەرچەندە ڕێژا زارۆکێن نەئاسایی (ئانکو ئەوێن سەنگا لەشی ژ ٢ کیلو ونیڤا کێمتر یانژی بەری ژییێ هەشت هەیڤیێ پەیدابووین) دناڤ خێزانێن جودا جودادا پتربوویە بڕێژا ١،١٪ (ئەگەر ژییێ دایکێ ٣٥-٤٠ ساڵی بیت) ،و ٢،٢٪ (ئەگەر پتربیت ژ ٤٠ساڵیێ) ببەراورد دگەل دایکێن ژییێ وان ٢٥-٢٩ ساڵی، لێ هاتیە سەلماندن کۆ زارۆکێن ژدایکبووی دهەمان خێزاندا (ودهەر ژییەکێ دایکا وان تێدابیت لدەمێ دووگیانیێ) ئەڤ ڕێژەیە ئێکجار یا کێم وبێ بایەخ بوویە.
ڤەکولەر گەهشتینە وێ باوەریێ کو ئەگەر ڕێژە هندەک یا زێدەژی بیت دزڤڕیتەڤە بۆ هندەک فاکتەرێن جڤاکی وئابووری وساخلەمی ئەوێن ئەو خێزان تێدا دەربازدبن، هەروەک یا خویایە کۆ ڕێژا نەساخیێن دوومدرێژ (مینا پەستانا خوینێ وشەکرێ وجەڵتا ونەساخیێن دلی) دگەل ژیێ مرۆڤی زێدەدبن، وژییێ درەنگێ دایکێ بخۆ وبتنێ نابیتە ئەگەرێ زێدەبوونا ڕێژا زارۆکێن نەئاسایی.
ئانکو ئەگەر بوارێ ساخلەمیێ یێ دایکێ یێ باشبیت ودووچاری چ نەساخیێن دوومدرێژ نەبیتن (دگەل بورینا تەمەنی) وئەگەر خۆ ژ نەریتێن خەلەت دویرئێخستبیت وەەک جگارکێشانێ ومەی ڤەخارنێ؛ دهێتە پێشبینیکرن کۆ ساخلەمیا زارۆکێن وێ دێ دهەمان ئاستدا بیتن ئەڤجا ژییێ وێ لدەمێ ژدایکبوونێ ژ ٣٠ ێ کێمتربیت یانژی ژ٤٠ ساڵیێ پتربیت!!
ژپەرتوکا #ب_هزرێن_ساخلەم_بژی یا د.عدنان ئاکرەیی هاتیەوەرگرتن
Comments are closed, but trackbacks and pingbacks are open.