با ساڵی نوێ، ساڵی کار و کردار بیت، نەک تەنها پیرۆزبایی و هیوا خواستن

نەوزاد محەمەد

غوبلز .. وەزیری ڕاگەیاندنی هیتلەر بو، لەسەر دەمی جەنگی جیهانی دووەم ناوبانگی دەرکرد، خاوەنی دروشمی ” درۆ بکە درۆ بکە، تا خەڵک پێت باوەر بکەن ” .

لەم سەردەمە دروشمەکە داهێنانی زیاتری تێدا کراوە بووەتە ” درۆ بکە ردۆ بکە درۆ بکە، بەو درۆیە جێگای خۆت بکە “.

سەرنج بدەن، مرۆڤی ئێستا چ ئاڤراندنێکی کردووە لە هێزی عەقل دا، چۆن بە قۆڵی بیر دەکاتەوە و چ مەودایەکی فراوانی بۆ داهێنانی هزری خوڵقاندووە، بێ گومان لە لایەنی نەرینی یەوە.

بیرکردنەوە لە بەرژەوەندی تاییەت و دەستکەوت و خۆ پێگەیاندن، هەموو سنورەکانی بەزاندووە و عەقلی بردۆتە خانەیەکی تری ئاستی ژیری، خۆیان لەگەڵ تەواوی دۆخەکە گونجاندووە، مەگەر ئینشتاینیش ئەوەی کردبێت و پێی زانیبێت.

ئەوەی ئێستا لای خۆمان دەگوزەرێ و ئەو دیاردانەی بەرچاو دەکەون، ڕێک لەو بازنە دایە و دەتوانین نتویان بنێین غوبلزەکان، خەڵکانێک ئەو دروشمەیان کردۆتە رێگا و سەرچاوەی خۆ پێ گەیاندن وخۆشگوزەرانیان.

دیاردەیەکی مەترسیدار و ڕوخێنەرە، بێ گومان لەسەر حسابی کەسانی دڵسۆز و پاک و ڕاستگۆیە.

ئەگەر لە ماوەی زیاتر لە ٣٠ ساڵی رابردومان، پابەندی کورد بوونی خۆمان بوینایە، هەندێک دیاردە سەریان هەڵنەدەدا، ئێستا هیچ شتێک نەدەبو بە ناوی گەندەڵی و غەدر و ناحەقی و نادادپەروەری و خیانەت و زۆر شتی تریشی بە دوای خۆیدا نەدەهێنا.

لە کۆتایی هەر ساڵێک و سەرەتای ساڵی نوێش، هیوا بە ساڵێکی خۆشتر و باشتر دەخوازین، بەڵام ڕوو لە خرابترە !.

باشە چیمان پێویستە تا ڕاستە ڕێ ببینەوە ؟..

ئایە وەکو هەر جار تەنها پیرۆزبایی و هیوا خواستن بە ساڵی نوێ، تەنها ئەوە بەسە و کێشەکانمان چارەسەر دەکات؟.

یان داوای ساڵێکی جیاواز و پڕ کار و کردار و خزمەت و پابەند بوون و یەکریزی و نواندنی دڵسۆزی و خەمخۆری بکەین؟.

دەست بخەینە سەر خاڵە نەرینی و لاوازەکان و بە دوای چارەسەری گونجاو بگەڕێین.

لە ساڵی ٢٠٢٢، هەنگاوێکی باش و ئەرینی مان بینی، وەکو فراوانی پەیوەندیە دیبلۆماسیەکانی هەرێمی کوردستان، پرۆسەی چاکسازی لە ناو حکومەت، ئاوەدانی و خزمەتگوزاری، ئەمن و ئەمان، بەڵام لەسەر ئاستی سیاسی تەواوی کێشەكان چارەسەر نەکران.

بۆ ساڵی نوێی ٢٠٢٣، دەبێ چاومان لە هەنگاوی باشتر و گەورەتر بێت ..

لە رووی سیاسیەوە پێویستیمان بە یەکریزی لایەنە سیاسیەکانی کوردستانی هەیە، لەبەر ئەوەی پێشهاتی زۆر هەستیارمان ل پێشە، پێویستە حزبە سیاسیەکان بەرژەوەندییە حزبیەکانیان بەلاوە بنێن و دەرگا داخراوەکانی نێوانیان بکەنەوە، لە پێناو بەرژەوەندی گشتی و پاراستنی قەوارەی هەرێمی کوردستان.

لە رووی حوکمرانی، هەوڵی بەدەستهێنانی پشتیوانی زیاتری نێودەوڵەتی، چارەسەر کردنی کێشەکان لەگەل بەغدا، بەردەوامی دان بە پرۆسەی چاکسازی بە شێوەیەکی فراوانتر، بەردەوامی دان بە ئاوەدانی و خزمەتگوزاری بە تایبەت لە سنوری قەزا و ناحیەکان، بەهێز کردنی ژێر خانی ئابوری، ریفۆرمێک لە رووی پەروەردەیی و کۆمەڵایەتی کە زیاتر پێویستیمان بە ناساندنی مێژوو و خەباتی نەتەوەیی هەیە.

لەوانەیە زۆر خاڵی تریش هەبێت کە پێویست بە ئاماژە پێکردن بێت.

ئەگەر بابەت تەنها نەریتێکی ساڵانەی پیرۆزبایی و هیوا خواستن بێت، ئەوە بە لای خۆمەوە و بەو پەری رێزەوە سەری ساڵی نوێی زاینی لە تەواوی کوردستانیان و گەلانی جیهان پیرۆز دکەم و هیوای ساڵێکی پڕ لە گەیشتن بە ئامانج و بەختەوەری یان بۆ دەخوازم.

بەڵام ئێمە وەکو گەلی کورد کە هێشتا بە جۆرێک لە جۆرەکان لە سەنگەری خەبات و بەرگری نەتەوەیی داین، پێویستیمان بە جۆرێکی تری بیرکردنەوە و رێکخستنی تواناکان هەیە، پێویستیمان بە نەخشە رێگای گەیشتن بە ئامانجە گەورەکان هەیە.