پشتى 11 هەیڤێن حوكمڕانیێ و دروستكرنا سازیێن حكومه‌تێ، كۆمارا كوردستان ژ ئالیێ رژێما ئیرانێ ڤه هاته هه‌لوه‌شاندن و دامه‌زرێنه‌رێ وێ ژى هاته سێداره‌دان.
77 سالان به‌ریا نوكه و ل 22-1-1946 ل رۆژهه‌لاتا كوردستانێ و ل باژێڕێ مه‌هاباد ب ئاماده‌بوونا هزاران كه‌سان كو ژ هه‌موو ته‌خ و چینێن جودایێن ناوچه‌یێن كوردستانێ د ناڤدابوون پێشەوا قازى محه‌مه‌د دامه‌زراندنا كۆمارا كوردستانێ راگه‌هاند.
كۆمارا كوردستانێ ل ده‌مه‌كى بۆ ده‌ما 11 هەیڤان ته‌مه‌ن كێشا، لێ چه‌ندین ده‌ستكه‌فتێن مه‌زن د وارێن جودا دا بۆ گه‌لێ كوردستانێ بجهـ هێلان، ژ وان ژى ناڤێ پێشمه‌رگه‌ى، ئالایێ كوردستانێ، سروودا نشتیمانى یا ئه‌ى ره‌قیب و تا نوكه ژى ل هه‌ر چار پارچه‌یێن كوردستانێ رێز ل ڤان ناڤ و ده‌ستكه‌فتان دهێته گرتن.
هه‌ر د وێ رۆژێ دا 20 هزار نوینه‌رێن خه‌لكێ كوردستانێ راگه‌هاندنه‌ك به‌لاڤكر و ل ژماره‌یا 8 یا رۆژنامه‌یا كوردستان دا هاته به‌لاڤكرن و داخواز ژ ده‌ستهه‌لاتا كۆمارى كر، ل هه‌موو جهێن كورد لێ دژین سه‌ربه‌خۆیێ رابگه‌هینن، هه‌لبژارتنێن جڤاتا شوورایێ ده‌ستپێكرن و حكومه‌تا نشتیمانى یا كوردستان، وه‌زاره‌ت و فه‌رمانگه‌هێن پێدڤى ب دامه‌زرینن و هێزه‌كا چه‌كدارى یا نشتیمانى بهێته پێكئینان و ل گه‌ل وه‌لاتێن ره‌خودۆر په‌یوه‌ندیێن ئابۆرى و بازرگانى بهێنه دروستكرن و په‌یوه‌ندیێن كۆمارێ ل گه‌ل حكومه‌تا ئازه‌ربایجانێ بهێنه بهێزكرن.
ل سه‌رانسه‌رى سنۆرێن ده‌ستهه‌لاتا كۆمارێ ئالایێ كوردستانێ ل سه‌ر هه‌موو سازیان هاته دانان و بناغه‌یێ ئێكه‌مین حوكمڕانیا مۆدێرن یا كوردى هاته دامه‌زراندن.
ل هه‌موو قوتابخانه‌یان ب زمانێ كوردى په‌روه‌ردێ ده‌ستپێكر و ب فه‌رمى زمانێ كوردى ل هه‌موو سازیێن سه‌ر ب حكومه‌تا كۆمارێ ڤه هاتنه دامه‌زرانن و دادگه‌هـ و سازیێن ئۆلى و سه‌ربازى ژى هاتنه ڤه‌كرن.
چاپخانه، رادیۆ و سینه‌ما ل ناڤا باژێڕێ مه‌هاباد هاتنه دامه‌زراندن و شانۆنامه هاته گێڕان و هه‌روه‌سا رۆژنامه‌یا كوردستان كو دو رۆژان جاره‌كێ ده‌ردكه‌ڤت هاته به‌لاڤكرن و پێنج کوڤار هاتنه چاپكرن كو ئێك ژ وان كوڤارن گرێدایى زاڕۆیان بوو و دبیته ئێكه‌م كوفارا زاڕۆیان.
ژ روویێ ئابۆرى ڤه ب سیسته‌مێ باج ل سه‌ر داهاتێ وه‌لاتیان و هنارتنا به‌رهه‌مێ چاندنێ به‌ستى، لێ پشتى 11 هەیڤێن حوكمڕانیێ ژ ئالیێ كۆمارا ئیسلامى یا ئیرانێ ڤه هاته رۆخاندن و دامه‌زرێنه‌رێ وێ ژى هاته سێداره‌دان
Comments are closed, but trackbacks and pingbacks are open.