هه‌ولێر، قائید میرۆ
به‌رپرسه‌كا وه‌زاره‌تا چاندنێ راگه‌هاند، پلانا حوكمه‌تا هه‌رێما كوردستانێ یه ئه‌ڤ ساله هنارتنا به‌رهه‌مێ نافخۆ بۆ ده‌رڤه بهێته زێده‌كرن و راسته‌وخۆ ژلایێ نڤیسینگه‌ها سه‌رۆكێ حوكمه‌تا هه‌رێما كوردستانێ سه‌رپه‌رشتیا هنارتنا به‌رهه‌می بۆ بازاڕێن جیهانێ دهێته‌كرن. ل دۆر بازاڕێ هێك و مریشكا ژی دبێژیت: زێده‌ی بازاڕێ ناڤخۆ هێك و مریشك هه‌نه و عێراقێ رێكێ ناده‌ت مریشكێن كوردستانێ بچنه پارێزگه‌هێن ناڤه‌ڕاست و باشوورێ عێراقێ تنێ رێك دایێ هێك بچن و نوكه وه‌زاره‌ت پێداچوونێ بۆ هنارتنا به‌رهه‌مێ هێكا دكه‌ت بۆ پارێزگه‌هێن عێراقێ.
دكتۆر زێدا محه‌مه‌د، رێڤه‌به‌را گشتیا پلاندانانێ ل وه‌زاره‌تا چاندنێ بۆ رۆژناما ئه‌ڤرۆ دیار كر” ل سالا بۆری ل گۆره‌ی پلانه‌كا حوكمه‌تا هه‌رێما كوردستانێ به‌رهه‌مێ هنارێن هه‌رێما كوردستانێ هاتنه هنارتن بۆ بازاڕێن جیهانێ، نڤیسینگه‌ها سه‌رۆكێ حوكمه‌تێ سه‌رپه‌رشتیا پرۆسا هنارتنا به‌رهه‌مێ نافخۆ بۆ ده‌رڤه دهاته‌كرن، ئه‌ڤ ساله ژی هه‌مان پلان هه‌یه و ژبلی به‌رهه‌مێ هنارێن نافخۆ بڕیاره سێڤێن به‌راریا و به‌رهه‌مێ هنگڤینی بهێنه هنارتن، وه‌زاره‌تا چاندنێ دێ مۆله‌تا هنارتنا به‌رهه‌می ده‌ته هه‌موو كه‌سه‌كی ئه‌گه‌ر بخوازیت د چوارچوڤێ حوكمه‌تێ به‌رهه‌مێ نافخۆ ببه‌ته ده‌رڤه‌ی وه‌لاتی.
زێده‌تر گۆت: هه‌ر به‌رهه‌مێ بهێته هنارتن بۆ ده‌رڤه مه‌رجێن خوه هه‌نه، ژ وان ژی هه‌بوونا باوه‌رناما ساخله‌می و چه‌ند پشكنینه‌ك بۆ بهێنه‌كرن، هنارتنا هناران پرۆسه‌كا سه‌ركه‌فتی بوو ده‌رگه‌هه‌ك هه‌مبه‌ر هنارتنا به‌رهه‌مێ نافخۆ ڤه‌كر، لیژنه‌یه‌ك هه‌یه بۆ هنارتنا به‌رهه‌مێ نافخۆ حوكمه‌تا هه‌رێما كوردستانێ پشته‌ڤانیا به‌رهه‌مێ نافخۆ دكه‌ت و بۆ په‌یداكرنا بازاڕی دێ به‌رده‌وامبیت ل سه‌ر سیاسه‌تا هنارتنا به‌رهه‌مێ كوردستانێ بۆ وه‌لاتێن جیهانێ.
دكتۆر زێدا محه‌مه‌د ئاماژه‌كر” حوكمه‌تا عێراقێ رێگریێ ل هنارتنا به‌رهه‌مێ مریشكێن كوردستانێ دكه‌ن و رێكێ ناده‌ت مریشك ل پارێزگه‌هێن هه‌رێمێ بچنه پارێزگه‌هێن ناڤه‌ڕاست و باشوورێ عێراقێ، هه‌ر چه‌نده عێراقێ بڕیارا 183ێ یا تایبه‌ت ب قه‌ده‌غه‌كرنا هاورده‌یا مریشكان راكریه، به‌لێ دیسان رێگره ل هه‌مبه‌ر به‌رهه‌مێ هه‌رێما كوردستانێ، د ده‌مێ نوكه دا هه‌رێما كوردستانێ به‌رهه‌مێ هێك و مریشكا شیایه زێده‌تری خواستا بازاڕێ نافخۆ به‌رهه‌م بینیت.
خویاژی كر، نوكه عێراق رێكێ دده‌ت هێك بچنه پارێزگه‌هێن ناڤه‌ڕاست و باشوور، به‌لێ چونكه بهایێ هێكا یێ بلندبووی د بازاڕێن نافخۆ، له‌وڕا نوكه ئه‌م وه‌كی وه‌زاره‌ت یێ پێداچوونێ دكه‌ین ئه‌گه‌ر بهێت و رێكێ بده‌ینه هێكێن نافخۆ بچنه ده‌ڤه‌رێن دی یێن عێراقێ دێ چه‌ند كاریگه‌ری ل سه‌ر بازاڕێ نافخۆ هه‌بیت، مه داخواز ل وه‌زاره‌تێن په‌یوه‌ندیدار كریه ئه‌ڤێن خوارنێ بكار دئینن گرێبه‌ستێ دگه‌ل پڕۆژێن نافخۆ بكه‌ن و تنێ هێك و مریشكا نافخۆ بهێته بكارئینان، بڕیاره هه‌یڤا ئادارێ گرێبه‌ستێن فه‌رمانگه‌هێن حوكمه‌تێ ب دووماهی بهێن و سۆز هاتیه‌دان گرێبه‌ستێن نوو دگه‌ل پڕۆژێن نافخۆ بهێته‌كرن بۆ ڤێ چه‌ندێ بازاڕێ نافخۆ هه‌بیت و هێك و مریشكا جووتیارێ مه بهێته بكارئینان نه‌ك یا ده‌رڤه بهێته بكارئینان و بازاڕ بۆ به‌رهه‌مێ نافخۆ بهێته په‌یداكرن.
Comments are closed, but trackbacks and pingbacks are open.