سەردار هێتوتی
کورد بێ کو بچینە سەر پێناسەکرنێ و دیرۆک و ئەردنیگاریا وان، گەلێ 40 ملیونیێ بێ دەولەتن و دابەشی سەر چەندین وەڵاتێن جیهانا ئەڤرۆ بوونە، هند ژ وان لسەر جهوارێن کەڤن ماینە و هندەکان ژی کوچباری هەلبژارتیە و قەستا ئەوروپا و کێشوەرێ ئەمریکا کریە، ئەڤ گەلە ژبلی کو وەلاتێ وان پارچە بوویە، دیرۆک و زمان و چاند و کلتور ژی کار یێ لسەر دهێتەکرن بۆ پارچەکرنێ.
ل هەرێما کوردستانێ د ڤان ساڵێن بۆری دا، رۆژا ئاڵا و رۆژا جلکێن نیشتیمانی هاتیە دیارکرن و ژ لایێ ناڤەندێن خاندنێ یێن هەر دوو وەزارەتێن خاندنا بلند و پەروەردێ و پتریا سازیێن دیتر یێن هەرێمێ دهێنە ساخکرن کو ئەڤە جهێ دلخۆشیێ و دەستخۆشیێ یە.
خەلک ب گەرمی ڤان هەر دوو هەلکەفتا ساخ دکەت و خۆ ژ بۆ وان بەرهەڤ دکەت و یا فەربوو کو ژ مێژە رۆژا زمانێ کوردی ببا فەرمی و رۆژا پێشمەرگە و رۆژا بیرئینانا شەهیدان هاتبا دانان و ژ مێژە یا فەربوو کو ناڤەندێن مەزن یێن دیرۆکی و جوگرافی و زمانزانیێ و پاراستنا کلتوری ل زانینگەهان هاتبا دانان و گەلەک فەرتر بوو کو ل سەر ئاستێ جیهانێ رۆژا جیهانی یا چاند و کلتوورێ کوردان هاتبا دانان.
گەلێ بەلوچ، ئێک ژ گەلێن دابەشکریە دناڤبەرا هەر سێ وەڵاتێن پاکستان و کۆمارا ئیسلامی یا ئیرانێ و ئیماراتا ئیسلامی یا ئەفغانستانێ و ب گشتی سەرژمێریا وان دبیتە نێزیکی 15 ملیون کەسا و پتریا وان ل پاکستانێ دژین و درست دبنە سێکا کوردان و ڤی گەلی لسەر ئاستێ جیهانێ رۆژەک تایبەت هەیە کو 2ێ هەیڤا مارس یا هەر سال رۆژا جیهانی یا چاندا بەلوچانە، لێ کوردان چ رۆژەک هەیە.
ل باشووری وەک لسەری مە ئاماژە دایێ، رۆژا جلکێت کوردی هاتیە دانان ل هەرێمێ و هندەک ب نەزانین ڤێ رۆژێ ب شاشی ل قەلەم ددەن و وەسا دەنە دیارکرن کو هەمی رۆژ یێن تایبەتن ب رۆژا جلکێت کوردی بێی کو رۆژەکێ کەسەکی بەرگیز ل بەژنا وان دیتبیت. لەوما دبێژم یا فەرە ب ڕێکێن تایبەت کار لسەر رۆژا جیهانی یا چاندا کوردی بهێتەکرن و نابیت چ تشتەک ل هیڤیا شاگردێن خارنگەهێن ئەورۆپا و بازرگانێن سیاسی یێن باشووری بمینن.
Comments are closed, but trackbacks and pingbacks are open.