ئاوارە نێروەیی
یا بۆ مـه بوویه عـه‌ده‌ت هه‌ر جاره‌كا ره‌مه‌زانێ كارێ خۆ كر، دا ب مێڤانداری ب سه‌ر مه دا بێت، هێشتا ئه‌و نه‌گه‌هشتییه به‌ر ده‌رێن مه، تشتێ به‌ری هه‌مییێ -وپتر ژ هه‌مییێ- ئه‌م هزرێن خۆ تێدا دكه‌ین ئـــه‌وه كـــانـێ ئه‌م سفرا خۆ ل ڤێ هه‌یڤێ دێ چاوا به‌رهه‌ڤ كه‌ین، وشیڤ وپاشیڤێن خۆ دێ چاوا ب خه‌مل ئێخین..
به‌ری ره‌مه‌زان بگه‌هته مه ئه‌م به‌ریكێن خۆ بۆ ڤه‌دكه‌ین، وهێشتا مه ده‌رگه‌هێن خۆ بۆ ڤه‌نه‌كرین ئه‌م (مه‌طبه‌خێن) خۆ بۆ ئاماده دكه‌ین، هه‌ر وه‌كی ره‌مه‌زان هه‌یڤا خزمه‌تكرنا زكییه وچو ددی نه!
و ل وی ده‌مێ ئه‌م به‌ریكێن خۆ بۆ ره‌مه‌زانێ ڤه‌دكه‌ین دا تاما ده‌ڤێن مه خۆشتـر لـێ بێت گه‌له‌ك ژ مه هندی ژێ دئێت چاڤێن خۆ بۆ ڤه دكه‌ن، وبه‌رهه‌ڤییا خۆ دكه‌ن دا بشێن ب ڕه‌نگه‌كێ شامل وتمام دویچوون وموتابه‌عا وێ درامایێ بكه‌ن یا شه‌یتانی ئاگرێ وێ گه‌ش كری.. هه‌ر وه‌كی ره‌مه‌زان هه‌یڤا چاڤزلكرنێیه وچو ددی نه!
وهه‌ر جاره‌كا ره‌مه‌زان دگه‌هته مه مایكرفوون ل سه‌ر مینبه‌رێن مزگه‌فت وده‌زگه‌هێن ڕاگه‌هاندنێ بۆ وان گۆتنێن سه‌د جار دوباره‌كی وهزار جار ڤه‌جوی دئێنه چكلاندن، ژ ئنیه‌تێ وحه‌تا تو دگه‌هییه دانا فتران.. هه‌ر وه‌كی ئه‌ڤه جارا ئێكێیه خه‌لك ڕۆژییان دگرت!
ڤێجا دێ بینی هه‌یڤا ره‌مه‌زانێ ب هاتنا خۆ ب سه‌ر به‌ریكێن مه دا دگرت وخالی دكه‌ت، و ب سه‌ر ده‌ڤێن مه دا دگرت وتژی دكه‌ت، د به‌ر چاڤێن مه ڕا دبۆرت بێی وان ژ به‌رێخۆدانا دیمه‌نێن نه ژ هه‌ژی بگرت، و د به‌ر گوهێن مه ڕا دچت ووان بۆ گوهدانا گۆتنێن سه‌دباره ڤه‌دكه‌ت.. و د گه‌ل ڤێ هه‌مییێ ره‌مه‌زان دئێت ودچت بێی ئه‌و نێزیكى دلێن مه ببت، هه‌ر وه‌كی چو ره‌مه‌زان ب سه‌ر مه دا نه‌هاتین!
ره‌مه‌زان دئێت.. وده‌مێ ئه‌و دئێت تو دێ بینی خۆ خودانێن گونه‌هێن مه‌زن ژی حه‌ز دكه‌ن خۆ بگوهۆڕن، ووه‌ك (أمر الواقع) ئه‌و خۆ ب ڕێزێن تۆبه‌داران ڕا دگه‌هینن، ب ڕۆژێ خۆ برسی وتێهنی دكه‌ن، و ب شه‌ڤێ نڤێژ وته‌راویحان دكه‌ن.. به‌لـێ د گه‌ل هندێ ژی ده‌مێ ره‌مه‌زان ژ وان دبۆرت دێ بێژی هه‌ر وه‌كی وان چو ره‌مه‌زان نه‌نیاسینه
Comments are closed, but trackbacks and pingbacks are open.