دا ئەم ژی ببن ئێك
بێریڤان خضر
ھەر ژ سەردەمێ عوسمانیا و صەفەویا و ب درێژاھییا مێژووا ٦٠٠ سالێن شەری و ناكوكیێن دناڤبەرا واندا و تا نوكە ژی، تورکیا و ئیران دگەل ئێك د سیاسەتا خوەدا ھەڤدژن و چاوا بۆ (پولەکا ٥٠٠ دیناری، ھەمی ناكوكی و ھەڤدژیێن خوە دانە ئالیەكی و ب ئێك دەنگ هاتن سەر خەت!!
مە هەمیان دیت و لبەر جاڤێ جیهانێ هەمیێ تورکیا و ئیران د گورەپانا سیاسی دا د کونا دەرێزیێ ڕا ل ئێک و دوو دنێرن، بەلێ بشتی ڤی پولەیێ ٥٠٠ دیناری، تورکیا خو نەرازی کری و گوتی نەخشێ کوردستانێ لبن پێ مەیە، ئەو کوردستانا دان ب مافێ وێ ژلایێ ئقلیمی و دەولی ڤە هاتیکرن، ئێکسەر ئیران ژی هات سەر خەت و نەرازی بوونا خوە دژی کوردا بۆ وی پولەی دیار کر.
ل ڤێرێ مـە دڤێت ئەم ببن دەولەت و مرادا دلێ هەر تاکە کوردەکی شەرەفمەندە، ئەرێ مادەم مە دڤێت ببن دەولەت بوی ئەم ژی وەکی دوژمنان ئێک دەست و ئێک لایی نابن. بوچی ئەم وێ ناکەن یا دلێ دوژمنان بێ بسوژن ب گیانەکی نەتەوەیی بەرەڤانیێ ژ دوزا گەلێ کورد و کوردستانێ ناکەن و بەرەف کوردستانەکا سەربەخوی ڤە ناچن .
بلا ئەم دەست ژ هەمی تەوەران بەردن و بێن سەر خەت دا ئێدی تورک و عەرەب و فارس، تبلێت خو درێژ نەکەن سەر ئاخا کوردستانێ، ئەو ئاخا هەر بوستەکی وێ ب خوینا شەهیدەکی یێ هاتی ئاڤدان و رزگارکرن .
بلا بەس بیت خیانەتا ناڤخویی، بلا بەس بیت دوژمن کاریا ئێک و دوو، بلا پێکڤە دەولەتا کوردستانێ ئاڤا بکەن داکو ببتە گولەیەک دجاڤێ دوژمن و نەحەز و نەیاران دا ….
