▪ وەرزش ورۆژیگرتن ئەرێ دێ کارتێکرنێ ل سەر هێز وشیانێن وەرزشڤانی هەبن

ڤەکولەرێن بوارێ ساخلەمیێ بۆچوونێن جودا هەنە وجیاوازیەکا بەرچاڤ هەیە کا هەتا چ ڕادەیەکی رۆژیگرتن دێ کارتێکرنێ ل سەر هێز وشیانێن وەرزشڤانی هەبن، بەلێ پتریا وان ڕێکەفتینە کو کارتێکرن ل سەر شیانێن لەشی بو وەرزشێن کورت-خایەن یان یێن سڤک نینە، بەلی بو وەرزشێن دووم درێژ (پتر ژ دەمژمێرەکێ) کارتێکرنێ ل ئەدایێ وان دکەت ژبەر گەکەک ئەگەران (هشکبوون، لاوازیا کالوریان، نڤستنا نەڕێکخستی). و هندەک ڕێنمایێن تایبەت هەنە بۆ وەرزشڤانێ رۆژیگر:
– بێگۆمان گوهڕین درۆست دبن ل دەمێن ئەنجامدانا ڕاهێنانان ودەمێن خوارنێ ونڤستنێ یێن وەرزشڤانی ،بەلێ پێدڤیە وەرزشڤان ڤان گۆهڕینان ئەنجام بدەت بکێمی ٢ حەفتیا بەری دەستپێکرنا ڤێ مەهێ ژبوی ڕاهاتنا لەشی لسەر ڤان گۆهڕینێن نەهنگاڤ.
– دەمێن وەرزشێن سڤک وکورت وەک خۆ بمینن بەلێ بو وەرزشێن درێژ پێدڤیە ل دەستپێکا شەڤێ بن (نابیت درەنگی شەڤ بیت) یان ئێڤاریەکا درەنگ بەری فتارێ داکو بشێت ئێکسەر پشتی وەرزشێ هێزا خۆ قەرەبوبکەت لدەمێ روژی شکاندنێ.
– جەمێ پاشیڤێ یێ گرنگە بۆ وەرزشڤانی وهندی بشێت گیرۆ بکەت ژبوی پتر دانا هێزێ بۆ لەشێ وی ددەمێ رۆژیێ دا
– پێدڤیە ئاڤەکا زۆر ڤەخوت لدەمێن ناڤبەرا شیڤ وپاشیڤێ دا،بەلێ ئاڤەکا زۆر بەری ڕاهێنانان کارتێکرنێ ل شیانێن وی دکەت وپێدڤیە کێم کێمە بیت، وئەگەر ل دەمێ رۆژێ ڕاهێنانان بکەت تەڕکرنا دەڤی ب ئاڤێ بێی ڤەخوارن فاکتەرکێ هاریکارە
– خوارنێن وەرزشڤانی پیچەک دجیاوازن ژ خەلکێ دیکە، پێدڤیە ٦٠-٧٠ ٪ ژ پێکهاتا خوارنا وی کاربۆهێدرات بن ویا دیکە پڕوتین بن. وهندی بشێت دۆهناتیا کێم بکەت چونکی لەشێ وی گران دکەت.
– باش نڤستن یا گرنگە بۆ وەرزشڤانێ رۆژیگر نەخاسمە نڤستنا ب شەڤ، وهەکە بشێت نقرۆسکێن پشتی نیڤرۆ ژی ژدەستخو نەکەتن.
– پێدڤیە ڕاهێنان بهێنە ئەنجامدان ل کەش وهەوایەکێ گۆنجای کو پلا گەرماتیێ گەلەکا بلند نەبیت، ورێژا شێداریێ یا درۆست بیت وهوڵا وەرزشێ باش یا فينك وهوين کری بیت.
– بێهنڤەدانێن ژبلی دەمێ ڕاهێنانان دگرنگن کو هندی بشێت خو نەوەستینیتن ونەمینتە ل بەر تیشکا حه‌تاڤێ.

** ئەڤ بابەتە هاتیە وەرگرتن ژ پەرتووکا #ساخلەمیاتە_دهەیڤا_ڕەمەزانا_پیرۆزدا