ئیراقێ پێدڤی ب هه‌رێمێ هه‌یه وگرنگه سه‌قامگێریه‌كا سیاسی و ئابۆری په‌یدا بیت
چاڤدێره‌كێ سیاسی دبێژیت، سه‌رۆكێ هه‌رێما كوردستانێ نێچیرڤان بارزانی ڕۆله‌كێ مه‌زن هه‌بوو د نێزیكرنا ئالیێن سیاسی دا ل ئیراقێ و پێشبینی دهێته‌كرن كو د هه‌لبژارتنێن په‌رله‌مانێ كوردستانێ دا هنده‌ك ئالیێن سیاسی تووشی شكه‌ستنێن مه‌زن ببن و هنده‌ك ئالیێن نوو ده‌ركه‌ڤن.
ره‌مه‌زان نه‌سره‌دین مسته‌فا، چاڤدێرێ سیاسی بۆ ڕۆژنامه‌یا (ئه‌ڤرۆ) گوت” بێگومان ڕێككه‌فتنا د ناڤبه‌را به‌غدا وهه‌ولێرێ دا ئێك ژ ڕێككه‌فتنێن گرنگه هه‌ر ژ سالا 2007 وهه‌تا نوكه چونكه هێش پێشڤه‌چوون ل سه‌ر بابه‌تێ په‌ترۆل و غازێ د ناڤبه‌را هه‌ردو ئالیان دا گوهۆڕین ب خوه‌ڤه نه‌دیتیه و ئه‌ڤه جارا ئێكێ یه ڕێككه‌فتن ب فه‌رمی دهێته ئه‌نجامدان، یا گرنگتر ژ ڕێككه‌فتنێ بجهئینانا وێ یه چونكه سه‌ربۆرا هه‌رێما كوردستانێ ل گه‌ل به‌غدا ل قۆناغێن بۆری چه‌ندین جاران ڕێككه‌فتنێن سیاسی و له‌شكری هه‌بووینه و نه‌هاتینه بجهئینان له‌وما به‌رده‌وام ناكۆكی هه‌بووینه”.
ڕه‌مه‌زانی گوت ژی” قۆناغا ئه‌ڤرۆ ئه‌وا ئیراق تێدا ده‌ربازدبیت وه‌رچه‌رخانه‌كه ل ڕۆژهه‌لاتا ناڤین و وه‌لاتێن هه‌رێمی ودێ كۆمه‌كا گوهۆڕینان دروست بن و دڤێت ئیراق گوهۆڕینان بكه‌ت و پێگه‌هێ خوه بهێز بێخیت و ئیراقێ پێدڤی ب هه‌رێما كوردستانێ هه‌یه وگرنگه سه‌قامگێریه‌كا سیاسی و ئابۆری په‌یدا بیت و هه‌ر چ نه‌بیت ل سێ سالێن بهێت دا ئیراق یا به‌رهه‌ڤ بیت بۆ گوهۆڕینان و ئالیێن شیعی ژی گه‌هشتنیه وێ باوه‌ریێ دڤێت گوهۆڕین ڕاسته‌وخوه ل ئیراقێ بهێنه‌كرن و تایبه‌ت ئالیێ شیعێ وه‌كو ده‌وله‌تا قانوونێ چونكه هه‌ر ئالیه‌كێ سیاسی یێ ئیراقێ هه‌كه پێگه‌هێ ئابۆری گه‌شێ بكه‌ت گومان نینه چار سالێن داهاتی ژی دێ شێت پێگه‌هێ خوه مسوگه‌ر بكه‌ت”.
دیاركر ژی” سه‌ره‌دانێن نێچیرڤان بارزانی، سه‌رۆكێ هه‌رێما كوردستانێ و ڕۆلێ وی د نێزیككبوونا به‌غدا و هه‌ولێرێ دا گه‌له‌ك یا كارا بوویه ل پتریا گۆتارێن هاتینه پێشكێشكرن ل سالڤه‌گه‌را دامه‌زراندنا ڕێكخراوا (به‌در) ده‌ستخوه‌شی ل سه‌رۆكێ هه‌رێما كوردستانێ دهاتنه‌كرن چونكو ڕۆله‌كێ مه‌زن یێ هه‌بوویه دنێزیككرنا هه‌ر دو ئالیان دا و باوه‌ر دكه‌م هه‌تا ئاسته‌كێ باش دێ هه‌بیت دا ئه‌ڤ ڕێككه‌فتنه وه‌كو خوه بهێته بجهئینان چونكه هه‌ر د ناڤا شیعه‌یان دا هنده‌ك ده‌نگێن نه‌شاز هه‌نه كو ئه‌ڤ ڕێككه‌فتنه نه‌هێته بجهئینان و دیار دكه‌ن بۆ ئالیێ شیعی كو ئه‌ڤه فه‌رمیكرنا په‌تر‌ۆلا هه‌رێما كوردستانێ بوویه و دبیته خاله‌كا بهێز بۆ كوردستانێ”.
زێده‌تر گوت” باوه‌رناكه‌م هه‌لبژارتنێن داهاتی ل كوردستانێ نه‌خشێ سیاسی ب گوهۆڕن و پارتی دێ بزاڤێن مه‌زن كه‌ت پێگه‌هێ خوه و هه‌ژمارا كورسیێن خوه بپارێزیت هه‌كه زێده‌تر لێ نه‌كه‌ت, لێ پارتی ژی د ناكۆكیێن به‌رده‌وام دایه ل گه‌ل ئالیه‌كێ سیاسی و ئه‌و ئالی هه‌موو بزاڤان دكه‌ت پێگه‌هێ پارتی لاواز بكه‌ت و مه‌ره‌م ئه‌وه پێگه‌هێ خوه بپارێزیت، دوور نابینم ئێكه‌تی نشتیمانی كوردستان و بزاڤا گۆران توشی شكه‌ستنێ ببن د هه‌لبژارتنان دا چونكه ئه‌ڤ هه‌لبژارتن گه‌له‌ك دێ بزحمه‌ت بووینه و هه‌تا دیاركرنا ڕۆژا هه‌لبژارتنان ژی یا بزحمه‌ت بوویه چونكه ڕه‌وشا وان یا ناڤخوه‌یی ل ئاسته‌كێ گه‌له‌ك خراب دایه و پێشبینی دهێنه‌كرن هنده‌ك هێزێن نوو دروست ببن و پشكداریێ د قۆناغا داهاتی یا په‌رله‌مانی دا ببن و به‌رده‌وام گوهۆڕین دێ په‌یدا بن لێ نه ب وی ڕه‌نگی كو پێگه‌هێ پارتی گوهۆڕین تێدا دروست ببیت وه‌كو پێشتر مه ئاماژه پێكری و دبیت شكه‌ستنێن مه‌زن دناڤ ئێكه‌تیێ و گۆڕان دا دروست بن”.
خویاكر” پارتی دشێت مفای ژ ڕێككه‌فتنا هه‌ولێرێ و به‌غدا وه‌ربگریت بۆ بهێزكرنا پێگه‌هێ خوه وه‌كو پارته‌ك ل ئه‌ڤرۆ و پاشه‌ڕۆژێ چونكه بابه‌تێ ئابۆری كارتێكرن ل سه‌ر ڕه‌وشا سیاسی هه‌یه و هه‌ر كارتێكرنه‌كا سیاسی كارتێكرنه‌كا ئابۆری د دووڤ دا دهێت له‌وما باشتره پارتی ڤێ ڕێككه‌فتنێ بكه‌ته د ناڤا پڕۆژه‌یێ خوه یێ پاشه‌ڕۆژێ دا”.
Comments are closed, but trackbacks and pingbacks are open.