وه‌زاره‌تا ناڤخۆ یا حكومه‌تا هه‌رێما كوردستانێ دراگه‌هاندنه‌كێدا داخواز ژ حزب و لایه‌نێن سیاسى كر، د چ هه‌لكه‌ڤتاندا ده‌مانجه و كلاشینكۆفان وه‌كو دیارى پێشكێشى ئه‌ندام و لایه‌نگرێن خوه نه‌كه‌ن.
راگه‌هاندنا وه‌زاره‌تا ناڤخۆ كو ئاراسته‌یى پارت و هێزێن سیایى یێن مۆله‌ت پێداى یێن هه‌رێما كوردستانێ هاتییه كرن، یا تایبه‌ته ب قانوون و رێنمایێن بوارێ چه‌كى.
سه‌باره‌ت قانوون و رێنمایێن بوارى چه‌كى، وه‌زاره‌تا ناڤخۆ دراگه‌هاندنا خوه‌دا پێنج داخوازى ئێخستینه به‌رده‌ستێ حزب و لایه‌نێن سیاسى و داخوازا هاریكارى و پشته‌ڤانییێ ژ وان دكه‌ت.
ده‌قێ داخوازییێن وه‌زاره‌تا ناڤخۆ بۆ حزب و لایه‌نێن سیاسى :
ئێك / دخوازین حزب و هێزێن سیاسى پشكدارییێ د هه‌وێن هووشیاركرنا وه‌لاتى و ئه‌ندامێن خوه‌دا بكه‌ن بۆ هندێ كو ئه‌گه‌ر ل ره‌وشێن پێدڤى نه‌بیت، بلا چه‌ك د مالێن واندا نه‌بیت و چه‌كێ بێ مۆله‌ت نه‌هه‌لگرن، هه‌بوونا چه‌كى ل هه‌ر ماله‌كێ دێ ئه‌گه‌رێن تودوتیژى و تاوانان و ئێكلاكرنا ئاریشه‌یان خۆ ئه‌گه‌ر د بچووك ژى بن ب تودوتیژییێ زێده‌تر لێكه‌ت، له‌وما ئه‌گه‌ر گه‌له‌ك یا پێدڤى نه‌بیت بۆ سلامه‌تییا گیانێ وه‌لاتییان و ئه‌ندامێن خێزانێن وان یا گۆنجاى نابیت چه‌ك د مالێن واندا بیت.
دوو / مه پێ باشه ئاگه‌هدارییا هه‌موو ئه‌ندام و لایه‌نگرێن خوه بكه‌ن، ئه‌وێن چه‌ك هه‌ى ل دووڤ قانوون و رێنمایان خوه ب گۆنجینن.
سێ / دخوازین كه‌نالێن خوه یێن میدیایى بێخنه د خزمه‌تا پرۆسه‌یێن به‌لاڤكرنا هووشیارییا توندوتیژییێدا، بۆ هندێ وه‌لاتییێن خوه پال بده‌ین كو ناكووكییان ب رێكا دادگه‌هـ و په‌یوه‌ندییێن جڤاكى و دانوستاندنان چاره‌سه‌ر بكه‌ن، و په‌نایێ بۆ چه‌ك و توندوتیژییێ نه‌به‌ن.
چار / دخوازین چ حزب و لایه‌نێن سیاسى چه‌كێ ده‌مانجه و كلاشینكۆف د چ هه‌لكه‌ڤتاندا وه‌كو دیارى پێشكێشى ئه‌ندام و لایه‌نگرێن خوه نه‌كه‌ن.
پێنج / دخوازین حزب و لایه‌نێن سیاسى ژ پێخه‌مه‌ت كێمكرنا ده‌رفه‌تا تاوانان و ب كارئینانا چه‌كى ل باره‌گایێن خوه، كۆگه‌هێن هه‌لگرتنا چه‌كى بۆ زێره‌ڤانێن خوه دروست بكه‌ن، داكو زێره‌ڤانێن باره‌گایێن وان ب تنێ ل ده‌مێن زێره‌ڤانیكرنێ چه‌كى هه‌لبگرن و دگه‌ل خوه نه‌به‌نه مال.
وه‌زاره‌تا ناڤخۆ راگه‌هاند ژى، ب جهئینانا ئه‌ڤان پێنگاڤان، دێ زه‌مینه‌یه‌كا باشتر بۆ كۆمه‌لگه‌ها كوردستانێ بۆ كۆنترۆلكرنا چه‌كى و كێمكرنا دیارده‌یا چه‌كدارییێ دروست بیت، و ئه‌ڤه دێ بیته ئه‌گه‌رێ كێمبوونا ده‌رفه‌تا تاوان و توندوتیژییان، و مفایێ ڤێ چه‌ندێ دێ پاراستنا گیانێ وه‌لاتییان بیت، له‌وما چاڤه‌رێى پشته‌ڤانى و هاریكارییێ ژ هه‌موو هێز و لایه‌نێن سیاسى دكه‌ن.
Comments are closed, but trackbacks and pingbacks are open.