غیاس خالد زێباری
ئێک ژ ئەرکێن راگەهاندنێ پاراستن و ڤەژاندنا زمانی یە، بتایبەت یێن مللەت و نەتەوەیێن بێ قەوارێن سیاسی یێن سەربخۆ، چونکی مەترسیا ناڤچوونێ لسەر هەیە، هەرچەندە خەلکێ کوردستانێ زێدەتر ل ( ٣٠ ) ساڵایە خودان قەوارەیەکێ نیمچە سەربخۆ و سازیێن فەرمی یێن رێڤەبرنێ لێ هێشتیا چ دەڤۆکێن فەرمی بۆ راگەهاندنێ نەهاتینە دانان، ئازادیا کوردستانێ ژی فاکتەرێ هەبوونا بسەدان گەناڵێن جودا جودا یێن ڕاگەهاندنێ یە دڤێ هەرێمێدا، ئەڤەژی جهێ دلخۆشیێ یە، لێ پێتڤی بوو هەتا نهۆ وەزارەتا رەوشەنبیری و سازیێن ئەکادیمی رێنمایێن تایبەت بۆ زمانێ راگەهاندنێ دەرکربان داکۆ زمانێ کوردی درێکا ڤان کەناڵێن راگەهاندنێ باشتر هاتبا ڤەژاندن و پاراستن، هەرچەندە ب هەبوونا ڤان کەناڵێن راگەهاندنێ ژمارەکا زۆرا پەیڤێن رەسەنێن کوردی ژ مرنێ هاتینە رزگارن و نفشێ نوو ژی سەرهەلی زمانێ شرینێ دایکێ بوویە، لێ هەڤڕکیێن دناڤبەرا هندەک کەناڵێن ڕاگەهاندنێدا بوویە ئەگەر پەیڤێن چەوت و یێن نە ڕاماندار بکاربهێن، ئەڤە ژی زیانێ دگەهینیتە زمانێ کوردی.
ڕەنگە هەما گەناڵ وێ چەوتیێ و پەیڤا راست یا لجهێ وێ ژی بزانیت، لێ ژبەرکۆ ( فلان ) کەناڵی بکار ئینایە، ئەو دێ پەیڤەکا نوو بکارئینیت ( داهێنیت ) .
بۆ نمۆنە د دەنگۆباسێن کەناڵەکێ مەزنێ تەلەفزیونی دا هات: سەرۆک بارزانی پشوازی ل شاندەکێ …………. کر و د کۆمبوونەکێ دا تەکەزی لسەر پاراستنا نرخێن دیموکراسی کر .
دڤێرەدا لجهێ بەهایێن دیموکراسی ( نرخ ) هاتە بکارئینان، ئەرێ نرخ و بەها ئێک ڕامانن ددەن ..؟ ب دیتنا من … نە، چونکی نرخ بۆ وان متای یان کەل و پەلی دهێتە بکارئینان ئەوێن دهێنە کڕین و فرۆتن و بازرگانی لسەر دهێتەکرن، ئەرێ ما دیموکراسی متایە …! بها( بەها ) پەیڤەکا ڕاماندارە بۆ جهێ وێ، چونکی دیموکراسی و مرۆڤایەتی و …… هتد ڕەوشت و بنەمانە و بۆ بازرگانیێ نینە و کڕین و فرۆتن پێ ناهێتەکر . ئەگەر هاتبا گۆتن ( لرۆژا …… سەرۆک بازرانی پێشوازی ل شاندەکێ وەڵاتێ ….. کر و دڤێ کۆمبوونێدا سەرۆک بارزانی تەکەزیکر لسەر پاراستنا بەهایێن دیموکراسی ل کوردستانێ ) دا باشتر و ڕامادارتر بیت.
د زمانێ عەرەبی ژی دا ( نرخ و بەها ) دبنە ( سعر و قیم ) کۆ دوو ڕامانێن جودا ددەن ، ( سعر ) بوو متا و وی کەل و پەلێ دهێتە کڕین و فرۆتن و بازرگانی لسەر دهێتە کرن و ( قیم ) بۆ بنەما و ڕەووشتێن جڤاکی و مرۆڤ و مرۆڤایەتیێ. هیڤی یە گەناڵێن راگەهاندنا کوردی ژبەر نەزارڤەکرنا فلان کەناڵێ دیتر پەنایێ بۆ داهێنانا پەیڤێن چەوت نەدەن ،چونکێ پاراستنا زمانی ئەرکێ وانە و شێواندنا وی ژی تاوانەکا نەتەوەیی یە، بلا پەیڤ یێن کوردەواری و ڕەسەن بن و ملکی هەمی سازی و کەناڵا بن. هەڤڕکیا کەناڵا بلا هەڤڕکی بیت لسەر باشتر پاراستن و ڤەژاندنا زمانی و گەهاندنا ڕاستیێ .
تیبینی:
ــ ئەز نە زمانەڤانم و یێ پشتڕاستم کۆ ڤێ نڤیسینا من ژی چەوتی تێدا هەنە، لێ ئەڤە دیتن و بۆچوونا منە .
Comments are closed, but trackbacks and pingbacks are open.