جێگرا سەرۆکێ لژنا مافێن مرۆڤی ل پەرلەمانێ ئیراقێ ئاشکرا کر، پڕۆژەیەک بۆ دەرکرنا لێبۆرینا گشتی هاتیە بەرهەڤکرن و دبێژیت: ل دەستپێکێ لێبۆرین بۆ ژنان دێ هێتە دەرکرن، ژ بەرکو رەوشا وان وەک پێدڤی نینە.
جوان عەبدوللا، جێگرا سەرۆکێ لژنا مافێ مرۆڤی ل پەرلەمانێ ئیراقێ بۆ رۆژناما ئەڤرۆ دیار کر، لژنەیا مافێ مرۆڤی ل پەرلەمانێ ئیراقێ بەرهەڤیان دکەت ژ بۆی دەرکرنا پڕۆژەقانوونا لێبۆرینا گشتی بۆ ژنێن زیندانکری، ژ بەرکو رەوشا ژنێن د ناڤا زیندانێن ئیراقێ دا یا باش و وەکو پێدڤی نینە و گۆت: “وەزارەتا پەیوەندیدار ژی رازیبوویە بۆ دەرکرنا لێبۆرینا گشتی بۆ ژنێن د ناڤا زیندانێن ئیراقێ دا”.
جوان عەبدوللا گۆتژى: “بڕیارە پێداچوون د رەوشا ناڤا زیندانان دا بهێتە کرن و زیندان ل گورەی تاوانێن ل سەر هاتینە سزادان بهێنە جوداکرن، ژ ئەگەرێ خرابیا رەوشا ناڤا زیندانێن ئیراقێ زیندانی تووشی نەخۆشیان بووینە و هندەک زیندانیان ژی ژییێ وان گەهشتیە ئاستەکی پێدڤی ب لێبۆرینێ هەیە و ژییێ وان گەلەک مەزن بوویە و هێشتا د ناڤا زیندانان دا ماینە و دەمێ خوە تەمام نەکریە”.
Comments are closed, but trackbacks and pingbacks are open.