▪ د. مه‌یاده نه‌جار:
پێدڤیه ده‌ستپێشخه‌ریا سه‌رۆك بارزانی ببیته په‌یمانه‌ك بۆ ئالیێن سیاسی بۆ ڕێككه‌فتنێ
شرۆڤه‌كاره‌كا سیاسی ئاماژه ب وێ چه‌ندێ دكه‌ت، ده‌ستپێشخه‌ریا سه‌رۆك مه‌سعود بارزانی بۆ ئالیێن سیاسی دده‌مه‌كێ گرنگدایه بۆ چاره‌سه‌ركرنا ئاریشه‌یێن د ناڤبه‌را ئالیێن سیاسی دا هه‌روه‌سا دبێژیت، سه‌رۆك بارزانی دشێت ئاریشه‌یان چاره‌سه‌ر بكه‌ت و به‌ری نوكه ژی چه‌ندین جاران سه‌رۆك بارزانی ب پێشنیازێن خوه شیایه نه‌كو ئاریشه‌یێن هه‌رێما كوردستانێ, به‌لكۆ ئاریشه‌یێن ئیراقێ ژی چاره‌سه‌ر بكه‌ت.
د. مه‌یاده نه‌جار، شرۆڤه‌كارا سیاسی بۆ ڕۆژنامه‌یا (ئه‌ڤرۆ) گوت” سه‌رۆك بارزانی لێڤه‌گه‌رێ كوردستانێ یه و كوردێن پارچێن دی ژی ڕێزێ ل بڕیارا سه‌رۆك بارزانی دگرن و گه‌له‌ك جاران ل ده‌رڤه‌ی وه‌لاتی ده‌مێ مه دیدار ل گه‌ل خه‌لكێ بیان دكرن دگوته مه هه‌وه سه‌رۆك بارزانی هه‌یه بۆ چاره‌سه‌ركرنا ئاریشه‌یان، له‌ورا ژی ئه‌و په‌یاما سه‌رۆك بارزانی كو ل بارزان ده‌مێ ڤه‌كرنا مۆزه‌خانا بارزانی یا نیشتمانی هاتیه پێشكێش كرن یا گرنگه بۆ خه‌لكێ كوردستانێ ب گشتی و ئالیێن سیاسی ب تایبه‌تی، چونكه سه‌رۆك بارزانی دشێت ئه‌و ئالۆزیێن د ناڤبه‌را ئالیێن سیاسی دا هه‌ین چاره‌سه‌ر بكه‌ت و ڕه‌وشا سیاسی به‌ر ب ئارامبوونێ ئاراسته‌یه‌كێ ئه‌رێنی ببه‌ت، نه‌كو تنێ ل هه‌رێما كوردستانێ به‌لكو چه‌ندین جاران سه‌رۆك بارزانی ئاریشه‌یێن د ناڤبه‌را ئالیێن سیاسی یێن ئیراقێ ژی چاره‌سه‌ر كرینه، ئانكو ل سه‌ر پێشنیازا سه‌رۆك بارزانی ئالۆزیێن دناڤبه‌را حزبێن ئیراقی دا ژی چاره‌سه‌ربووینه و ئالیێن ئیراقی ب خوه داخواز ژ سه‌رۆك بارزانی كریه ئاریشه‌یێن وان چاره‌سه‌ر بكه‌ت”.
گوت ژی” سه‌رۆك بارزانی كاره‌كێ مه‌زن كریه د پێشكێش كرنا ڤێ ده‌ستپێشخه‌ریێ د ده‌مه‌كێ گه‌له‌ك گرنگدا بۆ چاره‌سه‌ركرنا ئاریشه‌یێن د ناڤبه‌را ئالیێن سیاسی”.
د. مه‌یاده نه‌جار ئاماژه‌كر” ئه‌م باوه‌رین هه‌كه سه‌رۆك بارزانی نه‌بیت كه‌سه‌ك نینه ئاریشه‌یێن د ناڤبه‌را ئالیێن سیاسی چاره‌سه‌ر بكه‌ت، چونكه ئه‌م دزانین نوكه ناكۆكی هه‌نه و ئالیێن سیاسی ناگه‌هن ڕێككه‌فتنێ بۆ ئه‌نجامدانا هه‌لبژارتنان د ئه‌ڤساله‌دا، به‌لێ پێدڤیه پرۆسه‌یا هه‌لبژارتنان هه‌ر بهێته ئه‌نجامدان، هیڤیدارین ئالیێن سیاسی بگه‌هنه ئه‌نجامه‌كی و بگه‌هنه ڕێككه‌فتنێ وهه‌لبژارتن د ده‌مێ خوه یێ دیاركری دا بهێنه ئه‌نجامدان، په‌رله‌مانێ كوردستانێ ژی ده‌ست ب كۆمبوونان بكه‌ت بۆ ڕاستڤه‌كرنا قانوونا هه‌لبژارتنان و كارا كرنا كۆمسیۆنا بلند یا سه‌ربخوه یا هه‌لبژارتن و ڕاپرسیان و ئه‌و هه‌لبژارتنه ببنه جهێ ئومێدا خه‌لكێ كوردستانێ، ئه‌ركێ هه‌موو ئالیێن سیاسی یه ژی مفای ژ ده‌ستپێشخه‌ریا سه‌رۆك بارزانی وه‌ربگرن، هه‌تاكو دڤێت پارتی ژی مفای ژێ وه‌ربگریت و ئاریشه بهێنه چاره‌سه‌ركرن، ژ به‌ر كو هه‌كه ب ڕێكا دانوستاندنان نه‌بیت ئاریشه ناهێنه چاره‌سه‌ركرن به‌رۆڤاژی هێشتا ئاریشه دێ مه‌زنتر بن، پێدڤیه ده‌ستپێشخه‌ریا سه‌رۆك بارزانی ببیته په‌یمانه‌ك د ناڤبه‌را ئالیێن سیاسی دا بۆ گه‌هشتن ب ڕێككه‌فتنێ”.
Comments are closed, but trackbacks and pingbacks are open.