وه‌زاره‌تا چاندن و ژێده‌رین ئاڤێ ژبه‌ر نه‌خۆشیا تایا خوین به‌ربوونێ هنده‌ك رێنما بۆ سه‌رژێكرنا قوربانان د جه‌ژنا قوربانى دا به‌لاڤكرن و راگه‌هاند، قه‌ده‌غه‌یه قوربان ل ده‌رڤه‌یى سه‌ربڕخانه‌یان بهێنه سه‌رژێكرن.
وه‌زاره‌تا چاندن و ژێده‌رێن ئاڤێ یا حكومه‌تا هه‌رێما كوردستانێ رێنما بۆ هه‌ر چار وه‌زاره‌تێن ناڤخۆ، باژێڕڤانى، ساخله‌می و ئه‌وقافێ كرینه كو رێنمایان بجهـ بینن و دوپاتكریه، سه‌رژێكرنا قوربانان ل ده‌رڤه‌یى سه‌ربڕخانه‌یان قه‌ده‌غه‌یه.
هه‌ر د ناڤا رێنمایان دا هاتیه سه‌ربڕینا ئاژه‌لى دێ ل سه‌ربڕخانه‌یێن فه‌رمى بیت و دڤێت دویربكه‌ڤن ژ سه‌ربڕینا سه‌ر جادده و كۆلانان و ب هه‌موو ره‌نگان قه‌ده‌غه‌یه، هه‌روه‌سا دیاركریه، دڤێت هه‌موو رێكارێن خۆپارێزیێ و پاقژیا جهى ل ده‌ما سه‌رژێكرنێ و ئاماده‌كرنا گۆشتى ب ده‌ستگۆركان و جلێن تایبه‌ت بیت و كه‌لوپه‌لێن دهێنه بكارئینان ژى پشتى كارى بهێته تافیلكرن.
رێنمایان دیاركریه، خۆ دویر بكه‌ن ژ كۆمێن ئاژه‌لى ل ده‌ما سه‌ربڕینێ و پاره‌چكرنا گۆشتى بۆ كێمبوونا تووشبوون ب نه‌خۆشیا تایا خوین به‌ربوونێ.
هه‌روه‌سا دیاركریه، ل ده‌ما ڤه‌گوهاستنا گۆشتى دڤێت پله‌یا گه‌رمێ 2 بۆ 6 پله بیت، بكارئینانا كیسێن نایلۆنى دڤێت د رۆن بن و نه د ره‌نگاوره‌نگ بن.
رینمایێن حكومه‌تێ دیاركریه ژى، باشتره گۆشت بۆ ده‌ما 12 تا 24 ده‌مژمێران د ساركه‌ران دا بمینیت و پاشى بهێته بكارئینان و كه‌لاندنا وى ژى د سه‌ر پله‌یا 60%ێ دا بیت.
ل دۆر هاڤتنا به‌رمایكان ژى دیاركریه، نابیت به‌رمایێن قوربانى ل سه‌رجادده و كۆلانان بهێنه هێلان و دڤێت د كیسێن نایلۆنى دا بهێنه هه‌لگرتن و بۆ جهێن تایبه‌ت و دیاركرى ژ ئالیێ سه‌ربڕخانه و جهێن فه‌رمى ڤه هاتیه دیاركرن بهێنه هاڤێتن.
Comments are closed, but trackbacks and pingbacks are open.