گوهدار سلێمان
ھەرێما کوردستانێ یا زەنگینە ب بەرھەمێن خۆ یێن سروشتی و خۆمالی , وەک یا دیار وەرزێ چنینا مازیێ چەند ڕۆژەکە دەستپێکریە و د ئەڤ سالە دا دار مازیێ بەرھەمەکێ باش و زۆر دایە و ژ بەر گرانیا بەرھەمی ل بازاری دا خەلکی قەستا چیایان کریە ژ بۆ چنینێ و ب بھایەگێ گران دھێتە فرۆتن .
دهێتە زانین کو رێڤەبەریا گشتی یا چاندنێ ل پارێزگەها دهۆكێ دیار كر، د دەمێ دو رۆژان دا 50 تەنێن مازییان بۆ دەرڤەیی هەرێما كوردستانێ هاتینە هنارتن و ل سالا بۆری پتری 250 تەنێن مازییان بۆ دەرڤەیی كوردستانێ هاتبوونە هنارتن.
نوح حسەین گەنجەکێ گوندێ گیرەیە سەر ب دەڤەرا دینارتە ددەتە دیارکرن : بەرھەمێ مازیێ ل گوندێ مە ئەڤ سالا یا زۆرە و خەلک گرنگیەکا مەزن ددەتە مازیێ چونکی بەرھەمەکێ ب سەنگ و بھایەکێ گران ھەیە و دناڤ بازاری دا زوی ب زوی دھێتە فرۆتن و گەلەک یا ب مفایە , زێدەتر ژی گوت : بەرھەمێ مازیێ داھاتەکێ باش دگەھینتە خەلکێ و ژ بلی داھاتی دارا مازیێ ئێک ژ وان دارایا کو فێنکترین دار دھێتە ھژمارتن و ھەروەسا بەلگێن وێ بۆ خوارنا گیانەوەران دھێنە بکارئینان .
گوتژی کۆ ئەگەر ئەڤ بەرهەمە پتر گرنگی بۆ بهێتە دان و بهێتە رەوانەکرن بۆ دەرڤە وەلاتی پتر بهایێ وێ دهێتە فرۆتن.
عیمران بەشیر وەلاتیەکێ دەڤەرا دینارتێ یە ددەتە دیارکرن : دارا مازیێ ل کوردستانێ یا زۆرە و لێ چنینا مازیێ گەلەک یا ب زەحمەتە چونکی ل دەڤەرێن چیایی و ئاسێ شین دبن و لێ دگەل ھندێ پارەکێ باش دکەت , بەرھەمێ مازیێ ئەڤان سالێن دوماھیێ گەلەک کێم ب بوو و ھندەک سالان ژی ھەر نە دھاتە بەرھەمی , لێ ئەڤ سالە دارا مازیێ بەرھەمەکێ تازە و باش کریە و بازارێ وێ ژی یێ گەرمە لەورا مە وەک خەلکێ دەڤەرێ قەستا چیایان کریە ژ بۆ چنینا مازیێ ,عیمرانی ھێشتا ژی گۆت : ل بەرێ دا ژ بەر زۆربوونا بەرھەمێ مازیێ,خەلکی مازی وەک داھاتەکێ وەرزی ددانە و دەمێ د بۆ وەرزێ چنینا مازیان یاسایەک بۆ خەلکێ دەڤەرێ دھاتە دانان ئەو ژی ڕۆژەکا تایبەت بۆ چنینێ دەستنیشان دکر و خەلک ب کۆم و پێکڤە ل وێ ڕۆژێ قەستا چیایان دکر ژ بۆ چنینا مازیان , لێ د ئەڤان سالێن دۆماھیێ دا ژ بەر نەبوونا بەرھەمێ مازیێ ئەو یاسایە نەمانە و خەلکی ژی گرنگی نەددا مازیێ, چونکی دبیت ڕۆژێ ھەمیێ کیلویەکا مازیان ژی دەست نەکەفتبا , لێ ئەڤ سالە پێش سالێن بوری ڤە جێاوازیەکا گەلەک کەفتییە بەرھەمی و زێدەبوویە .
عەبدلعەزیز عسمان کو کارێ کرین و فرۆتنا بەرھەمێن خۆماڵی دکەت دبێژیت : دوو جۆرێن مازیێ مە ل ڤێرێ ھەنە ( کەسک و سپی ) و مازیا کەسک ل بازاری دا گرانترە ژ جۆرێ دی ,و ئەڤ سالە جوداھییا کەفتیە بەرھەمێ مازیێ و گەلەک زۆرترە ژ سالا بوری و خەلک ب زۆری دچیتێ و دھێنە دەڤ مە بۆ مەرەما فرۆشتنا بەرھەمێ خۆ , مازی ئێک ژ ئەوان بەرھەمایە کۆ بھایەکێ گران ھەیە ل بازاری دا و زوی ب زوی بھایێ خۆ ژ دەست نادەت , زێدەتر ژی گۆت : ئەم بەرھەمێ مازیێ پتر ھەر ل کوردستانێ و عیراقێ ساخ دکەینەڤە و د فرۆشینە کارگەھان ژ بۆ دروستکرنا چەندین جۆرێن دەرمانان و ھەروەسا د چەندین پیشەسازیان ژی دا دھێتە بکارئینان و ئەگەر سالەکێ مازیێ بەرھەمەکێ زۆر ھەبوو و پێدڤییا بازاری تژیکر ل وی دەمی ئەم بەرھەمێ مازیێ فرێدکەینە دەرڤەی وەلاتی چونکی خواستەکا باش ل سەر ھەیە.
Comments are closed, but trackbacks and pingbacks are open.