بەری (۳٥) ساڵا و ل ڕۆژەکا وەکی ئەڤڕۆ، ل ڕێکەفتی (٥)ـی ئەیلوولا ساڵا (١٩٨٨)ـێ، پشتی (٤٦) ڕۆژان ژ خۆڕاگرییا ھێزێن پێشمەرگێ کوردستانێ، داستانا خواکورک ھاتە تۆمار کرن.
داستانا خواکورک ژ داستانێن بناڤودەنگێن ھێزا پێشمەرگێ کوردستانێ ـیە، کو ھێزا پێشمەرگێ کوردستانێ ب سەرکردایەتییا ڕاستەوخۆیا جەنابێ سەرۆک مەسعود بارزانی، شییا چۆک ب سوپایێ وی دەمی یێ عێراقێ و ڕژێما بەعس دابنیت، کو ل وی دەمێ ب سوپایێ پێنجێ دھاتە دانان لسەر ئاستێ جیھانێ.
سوپایێ ڕژێما بەعسا ژناڤچووی و سەدامێ گۆڕ ب گۆڕ ل ڕێکەفتی (١٩)ـی تەمووزا ساڵا (١٩٨٨)ـێ، ھێرشەکا بەرفرەھ بۆ سەر جھێن ڕزگارکری یێن کوردستانێ ل دەڤەڕا خواکورک دەست پێکر. دوێ ھێرشێ دا پتر ژ (١٥) لیوایێن سەربازی، تۆپخانە و فڕۆکەیێن شەڕی و، تەنانەت چەکێ کیمیاوی ـژی بکار ئینا.
زێدەباری نە بەرامبەرییا ھێزێ، پێشمەرگێن مێرخاز و گیان لسەر دەستێن کوردستانێ، شییان زیانەکا مەزن بگەھیننە ھێزێن ھێرشکەرێن ڕژێما بەعسا عێراقێ.
وی شەڕ ژلایێ سیاسی و سەربازی و ستراتیجی ـڤە، گرنگییەکا مەزن ھەبوو، چونکی پێشمەرگە ژلایێ سەربازی ـڤە شییا دەستکەفتەکێ زۆر ژ چەک و تەقەمەنییا بدەستڤە بینیت، ژلایێ سیاسیـڤەژی بن گۆڕ کرنا وێ خەونا بەغدا بوو کو باوەڕییا وێ ئەو بوو دگەل ب دوماھیک ھاتنا شەڕێ عێراق ــ ئیران، گیانێ بەڕەڤانییا ملەتێ کورد و شۆڕەشا کوردستانێ ـژی دێ ژناڤ چیت، لێ بەڕەڤانییا پێشمەرگێن کوردستانێ ل خواکورک خەونێن ڕژێما بەعس کرنە د گۆڕێ ـدا.
جەنابێ سەرۆک بارزانی ل ناڤ سەنگەرێن شەڕێ خواکورک، دگۆتارەکێ ـدا بۆ پێشمەرگێن قەھرەمانێن پشکدار بوویێن وێ داستانێ ئاماژە ب وێ چەندێ کر کو دێ ل ماوەکێ گەلەکێ نێزیک ڕەوشا ناڤخۆیی یا عێراقێ گوھۆڕین بسەردا ھێت و دوژمن دێ نەچار بیت ل بەرامبەر ڤێ جۆرە بەڕەڤانییا پێشمەرگەی پێداچوونەڤێ ب خۆدا بکەت.
داستانا خواکورک بیە ھێڤێنەک بۆ گیانێ بەڕەڤانیێ و بەرھنگار بوون و ڕاوەستیان ل ھەمبەری زوڵم و زۆردارییا ڕژێما بەعس و سەدامی و سەرھڵدانا شکۆدار یا ئادارا ساڵا (١٩٩١)ـێ ژێ بەرھەم ھات.
د ڤێ بیرەوەرییا پڕ شکۆداری و خۆڕاگری ـدا، سەرێ ڕێز و وەفایێ دچەمینین بۆ گیانێ شەھیدێن داستانا خواکورک و تەڤایا شەھیدێن ڕێکا ڕزگاری و ئازادییا کوردستانێ.
ھیڤییا ساخی و سەلامەتی و تەمەن درێژیێ بۆ جەنابێ سەرۆک بارزانی و سەرکەفتنێ بۆ ملەتێ کورد و پێشمەرگێ کوردستانێ دخوازین.
بژی پێشمەرگە … بژی کورد … بژی کوردستان
ملازم أول وليد نورالدين بوزو هركي
٥ـی ئەیلوولا ۲٠۲۳
Comments are closed, but trackbacks and pingbacks are open.