زێیێ بادینان ــ ساخلەمی:
رێڤه‌به‌رێ گشتى یێ ساخله‌میا پارێزگه‌ها دهۆكێ هۆشدارى ژ به‌لاڤبوونا نه‌خۆشیا كولێرایێ ل پارێزگه‌ها دهۆكێ دان و راگه‌هاند، 50 گومانلێكریێن كولیرایێ ل دهۆكێ هه‌نه و 3 ژ وان پشت راستكرینه.
د. ئه‌فراسیاب مووسا، رێڤه‌به‌رێ گشتى یێ ساخله‌میا پارێزگه‌ها دهۆكێ د كۆنگره‌یه‌كێ رۆژنامه‌ڤانى دا گۆت: 50 گومانلێكرى هه‌نه و 3 حاله‌ت هاتینه پشتراستكرن دو ل زاخۆ نه و ئێك ژى ل دهۆكێ یه و هۆشدارى ژ به‌لاڤبوونا وێ نه‌خۆشیێ دان و داخوازا خۆپاراستنێ ژ وه‌لاتیان كر و گۆت: ره‌وشا گومانلێكریان گه‌له‌ك باشه و پێدڤى ب چ نه‌بووینه.
مووسایى دیاركر، ئه‌وێن خزمه‌تێن خوارنێ پێشكێش دكه‌ن دڤێت رێنمایێن ساخله‌میێ هه‌ر ژ ئه‌ڤرۆ بجهـ بینن و ساخله‌مى ژى ل دۆر بجهئینانا رێكاران دێ توند بیت.
هه‌روه‌سا گۆت: كه‌سكاتیا خاڤ ب چ ره‌نگان نابیت ل خوارنگه‌هان بهێنه پێشكێشكرن و ئه‌گه‌ر بهێنه كه‌لاندن باشتره و داخواز ژى ژ وه‌لاتیان كر، ل ده‌ما ژ بازارى د كڕن ب ئاڤا خوێ یان هه‌ر تافیلكه‌ره‌كێ دى بهێنه شویشتن و تافیلكرن.
دێ چاوا خۆ ژ كولێرایێ پارێزى و نیشانێن وێ چنه؟
كولێرا نه‌خۆشیه‌كا به‌كتریایى یه و به‌لاڤبوونا وێ ب رێكا ئاڤا پیس ب به‌كتریایان دهێته مرۆڤان، نه‌خۆشى دبیته ئه‌گه‌را زكچوون و هشكبوونه‌كا توند و ئه‌گه‌ر نه‌هێته چاره‌كرن پشتى ده‌مه‌كى مه‌ترسیا مرنێ ل سه‌ر نه‌خۆشى دروست دكه‌ت.
ژ دیارترین نیشانێن وێ ژى زكچوون، هشكبوونا له‌شى، دلزڤڕین، دلڕابوون، لاوازى، بێهێزبوون، هشكبوونا پیستى، نزمبوونا فشارا خوینێ و زكئێشن و د ناڤا زاڕۆیان ژى دا نیشانێن وه‌ك خه‌وهاتنه‌كا زێده، تا و خاڤبوونا ماسۆلكانه.
نه‌خۆشیا كولێرایێ ژ كه‌سه‌كى بۆ ئێكى دى دهێته ڤه‌گوهاستن، ب وێ ئه‌گه‌رێ به‌كتریا دشێت ژ ده‌رڤه‌یى له‌شێ نه‌خۆشى ژى بژیت، وه‌ك به‌ركه‌فتنا پیساتیا كه‌سێ تووشبووى یان ژى ده‌ستدانا نه‌خۆشى و جلكێن وى و خوارن و ئاڤا به‌ر وى.
بۆ خۆپاراستن ژ كولێرایێ پێدڤیه ڤان رێنمایان بجهـ بینى:
ده‌ستێن خۆ ب ئاڤ و سابوونێ باش بشۆ ب تایبه‌ت پشتى ژ WC ده‌ردكه‌ڤى، یان ژى نێزیكى كه‌سه‌كێ تووشبوویى دبى.
ڤه‌خوارنا ئاڤا پاقژ و كه‌لاندى و داپۆشینا ژێده‌رێن ئاڤێ.
گۆشتێ نه‌كه‌لاندى نه‌خۆ و ئه‌گه‌ر یێ پشت راست نه‌بى ژ پاقژیا وان ماست، شیر، په‌نیر و قه‌یماغى ژى نه‌خۆ.
شووشتنا كه‌سكاتى و فێقى ب جوانى و رێكوپێكى و ده‌رمانێن تایبه‌ت.
ب به‌رده‌وامى WC بهێته پاقژكرن.
Comments are closed, but trackbacks and pingbacks are open.